Read Masana CAWA'TA TUNITA 8 Bible Online

CAWA'TA TUNITA 8 - Masana bible

CAWA'TA TUNITA 8

¹Lawna humam gum kay Nuwa hiɗi muuriyan kaf hiɗi farayn kaf ma ka kulo kuɗum hay lumna, Lawna hin simeɗ ma ŋolla biw gaa kay nagata, ki kayn nala niyn tun caw hot gaa'a.

²Zul ŋol ma niyn may goy hayam pana hiɗi ɗugul ma dukalawna vunam duka, niy ma dukalawna min sulur loɗi.

³Niyn tun caw hot gaa ŋali ŋali, tun caw hot goy bugolomu, ta-ta buur li kis hiɗi diram dok-vasl kayni, niyn hoti gaa'a.

⁴Hay buurta doogo yam siɗiyata vi til ma siɗiyana, lumda vi Nuwa gaɓ kay hiɗiyt Ararat.

⁵Niyn ka hot gaa'a ta-ta hay til ma doogona. Hay buurta jewta vi til ma doogon kayni, yam hiɗiyn tun caw day kulo'o.

⁶Bugol buur dok-fiɗi lo, Nuwa mal baŋa ma nam kaam kir lumna goyo.

⁷Nam gi gaw-gawn[4] goyo, gaw-gawn kali goyo, nam tuɗa hota, tuɗa hota, ta-ta niyn so goy kay nagata.

⁸Bugolda nam gi gukka, kay na' ma tuɗ ɗuw niyna, la nam hini kiɗay kay nagat kilasige.

⁹May gukka fi liyn ma na' cuk se' gaa hayamɗi, na' hoti kulo talam hay lumda, kay yam nagat ay ɗubi kay niyn tuwa pet. Nam meɗ ɓalam goyo, va'ay kalaf talam hay lumna.

¹⁰Bugol kayni nam cub buur siɗiya lo, nam hot gi gukka ay goy lo.

¹¹May gukka hoti talam hay vulatita, ɗuwa, na' ka hiɗi hum gu-olive ma ŋulomna hay vuna'a. Hay na'ta Nuwa tun caw wi ala niyn hotawa gaa'a yo.

¹²Nam cub buur mara siɗiya lo, nam gi gukka goyo. May na' hotay talam hay lumda loɗi.

¹³Hay busata kis-karkiya ka' kepta vi Nuwa, hay buurta jewta vi til ma jewna, niyn ma kay nagatna soy goyo. Nuwa yaw yam-lumna goyo. Nam ɗuw yam-nagat na kayni, na' goy soya.

¹⁴Hay buurta dok-ma' yam siɗiyata vi til ma ma'n kayni, yam-nagat soowa goy noŋ kiɗi'.

¹⁵Wulini Lawna di tam Nuwa:

¹⁶Kalaŋay goy hay lumna, naŋ hiɗi cata vaŋu, hiɗi gurona vaŋu hiɗi boyna vi gurona vaŋ lay.

¹⁷Cukaŋ muuriyan ay goy kuɗaŋ kaf, sle ma irin kaf ma ka hiɗi naŋu hay lumna, layayna hiɗi farayna hiɗi slen ma harmat gaa kay nagat kafe, kay nam mer goy gaa kay nagata, kay nam biya ŋolo, kay nam dus gaa kay nagat haca-haca', hoba' ya'a.

¹⁸Nuwa kali goy hay lumna hiɗi gurona valamu, cata valamu hiɗi boyna vi gurona valam kaw.

¹⁹Sle ma hay lumna kaf cukay goyo; muuriyan kaf, sle ma harmatn kaf, layayn kaf, slen ma sukka hayamna gaa kay nagat kaf kali goy kuɗ jafam pet.

²⁰Nuwa in giwin-ma-ɗifinna tam Ma-Vatɗina, nam yaw kuɗ farayn ma peldetna, kuɗ layayn ma peldetna kaf kaw, nam ŋalam ɗifin mi Ma-Vatɗina kulo kay giwin-ma-ɗifin namna.

²¹Ma-Vatɗina his his ma fayna, nam ka di hayam kalaf ala: nagat wulin kayni nan min beɗa' goyo kuɗ san loɗi, kay san kayni, varta vi dikam joo'o hay goorta valam pa, sle ma irin kaf nan min vatam goyo ki nan li kayni nala loɗi.

²²Hay li ma nagat ka tuwa, jaf ma cukŋa hiɗi feɗna, sleɗna hiɗi zalla, menda hiɗi cayda, henjeta hiɗi falayta noŋ kaf as vatɗi.