Read Masana 2 SAMUEL 10 Bible Online

2 SAMUEL 10 - Masana bible

2 SAMUEL 10

¹Bugol kayni, mulla vi Amon mita, goora valam Hanun ti mulda hay baŋalamu.

²David di'e: Nan min li ŋaat tam Hanun goora vi Nahak, ki bulum li ŋaat tanu nala. David cuk sa sunda talamu kay teŋem iramu kay mitta vi bulumu. Hay li ma sa sunda vi David co hay nagata vi Amon,

³sa ŋulona vi jafna vi Amon di tam Hanun sa ma ŋolla visi ala: Naŋ var ala David cuk sumuni kayni kay tiy buŋ gasiya su? Nam cuksiyay kataŋ kayni kay ɗuw gul-liyna hay hoyok-ziyna, kay peɗemu, kay tom gaa'a kaw.

⁴Ki kayn nala Hanun yaw sa sunda vi David, nam welsi jiwersi goy gal zeŋeleŋe, sligar ma tisina nam kaam goy guɓuriya, ta-ta kulo cifinsi zaw, bugol kayni nam gisi irsiya.

⁵Hay li ma David hum labara kayni, nam cuk sumun kirsiya, kay sum nisina muɗi zulo ŋolo; mulla disiya: Lakgi ɗawni hay Yeriko, ta-ta jiwergi ɦar tuwa, bugol kayni nigi ma hotiya may.

⁶Hay li ma sum sa Amonna waawa ala nisi muɗ tuwsiyawa bisi kir David, nisi kal jar sa Siriyana sa hay Bet-Rehobna, hiɗi sa Siriya sa hay Sobana, nisi yaw sojen birim dok-ma', lo nisi yaw sumun birimi kuɗ mulla vi Maaka, yaw sumun birim doogo yam ma' jar sumuna vi Tob.

⁷Hay li ma David hum labara namna, nam cuk Yowab hiɗi sojen kaf kay dursiya, nam cuksi si sum sa jufayna.

⁸Gurona vi Amon cukay goyo, nisi zlar goy vun-gala'a kay li duura; sa Siriyana sa hay Soba hiɗi sa hay Rehob, sumuna vi Tob hiɗi Maaka ay zlaray goy visiya may.

⁹Hay li ma Yowab wi ala duur ka vokom lay bugolom lay kayni, Israyella sa wi duur ŋaana kuɗ sum sa nam vilek vok mara goyo, nam tunsi goy vok sa Siriyana;

¹⁰dir sumun ma hinina nam tun ɓasulumna Abiskay voksiya, kay nisi ma duur gurona vi Amon.

¹¹Nam di'e: La sum sa Siriyan dono suwanu, naŋ ma co gutanu; la gurona vi Amon dono suwaŋu, nan ma coys gutaŋu may.

¹²Laŋ dono'o, lakay dono'o kay sumuna vaya, kay hoyok-ziyna vi Lawna vaya kaw, hin Ma-Vatɗin li va ma kiram ŋaana!

¹³Yowab hiɗi sumuna valamu ɦur kulo'o kay dur sa Siriyana, nala sum sa Siriyan mun voksi jaŋi.

¹⁴Hay li ma gurona vi Amon wi ala sum sa Siriyan muni jaŋi, nisi kaw mun jaŋi vok Abiskay, kali kulo hay hoyok-ziyna. Yowab vi tuwam goy gine'e hiɗi gurona vi Amon, hoti hay Yerusalem may.

¹⁵Hay li ma sum sa Siriyan wi ala sum sa Israyella kolawa kisiya, nisi tap donota visiya.

¹⁶Hadadezer gi sunda kay sa Siriya sa ay goy gal hena vi niy-lumna, nisi co'o hay Helam, tuni voksi kayn mi Sobak, ma ŋolla vi sojena vi Hadadezer.

¹⁷Nisi vul labar namna mi David, nam tok sa Israyella kafe, nam ɦaw Yordan kulo'o; co hay Helam. Sum sa Siriyan kot tuwsiyaya kay dur hiɗi David, nisi fok duura hiɗi David.

¹⁸May sum sa Siriyana mun jaŋi vok sa Israyella. David hiɗi sumuna valam cisiya: Keke-ma-duur kis-siɗiya, nam ci sum sa jaŋ kulumayn birim dok-fiɗi kaw. Sobak ma ŋolla vi sojena visi kaw nam calamu, nam mit mit hay liy namna.

¹⁹Hay li ma muliyan sa gaa kuɗ gaŋeraŋa vi Hadadezer wi ala sum sa Israyella kolawa kisiya, nisi li toyta hiɗi sa Israyella, lak gaa kuɗ gaŋeraŋa vi sa Israyella. Sum sa Siriyana may fi dono'o kay gut gurona vi Amon loɗi.