Read Masana 2 SAMUEL 11 Bible Online

2 SAMUEL 11 - Masana bible

2 SAMUEL 11

¹Hay busata ka'ta, hay liyn ma muliyan ka tuɗ goy li duura, David gi Yowab hiɗi sa sunda valamu, hiɗi sa Israyel kafe, kay ci gurona vi Amon, kay sli Rabba kaw. May David kay tuwam hin hay Yerusalem.

²Hay vulatit tara kep, David fok kulo hay va ma buura valamu; nam ka poy kulo kay yam-ziy ma mulda, nala iram cuk kay ca tara kep, na' ka muz tuwa'a. Na' ti cat ta ira' tuni kulo jifiy ŋolo.

³David gi sunda kay job ala na' ti cata vi gige. Nisi dum ala kayni may ti Bat-Seba, goota vi Eliyam cata vi Uriyas ma Hetna ɗisu?

⁴Nala David cuk sumuna kay gara'aya. Na' co talamu, nam bur hiɗi na'a may, bugol na' por tuwa' goy pora,[4] na' hot hay ziyna va'a.

⁵Cat kayni vi haya, na' gi sunda tam David ala: Nan viy kaŋ haya.

⁶Ki kayn nala David gi sunda tam Yowab ala: Uriyas ma Hetna naŋ ma ganti iramiya. Nala Yowab gum iramiya may.

⁷Uriyas kali kat David. David jobom ala Yowab ka nanige, sumun ka nanige, duur ka ir nanige.

⁸Bugol kayni David di'e tam Uriyas. Tuɗaŋ vo vaŋu, muzaŋ seŋ goyo. Uriyas hin ziyna vi mulla, hay li ma nam kali goyo, mulla gi sa kuɗum hiɗi sle ma vulda.

⁹May Uriyas bur gaa hay vun-galana vi mulla, hiɗi sa sunda vi David kafe, nam min kal vo valamɗi.

¹⁰Nisi mar labara tam David ala: Uriyas may kal vo valamɗi. Nala David di tam Uriyas: Naŋ ay kayn goy hay rogoyt paɗi su? Naŋ min tun seŋ vo vaŋɗi kay mige?

¹¹Uriyas hot dit mi David: Timgilla hiɗi sa Israyella hiɗi sumuna vi Yuda ka buri kayn goy hay guɗuku, sa ma ŋolla van Yowab hiɗi sa sunda valam lakay kayn goy hay fulda, may nanu, nan as kal hay ziyna vanu kay ti'e, ci'e, kay bur hiɗi cata vanu kayn as su? Hay semda vaŋu! Nan as li kayni noŋɗi.

¹²David di tam Uriyas: Vaydi naŋ ma mus tani lo, jifini nan ma tunaŋ iraŋu. Nala Uriyas mus hay Yerusalem hay buur na'ta ta-ta liyn fi goyo.

¹³David yum kay ti'e kay ci'e kaw vok iramu nam wiyikim hiɗi dolayna. Liyn co vulati kayni, Uriyas kali goyo kay bur gaa'a, hiɗi sa sunda vi mulamna, may nam min kal vo hay ziyna valam noŋɗi.

¹⁴Hay graw culumta vi buurta ka'ta, David ɗo ɗerwel mi Yowab kep, nam vula' hay ɓam Uriyas.

¹⁵Hay ɗerwel na'ta nam ɗo ala: Colgi Uriyas kulo hay liy ma duur ku ŋolla, vigi tuwgi goy talamu may, kay a sumun ma calamu kay nam mit goyo.

¹⁶Hay li ma Yowab ŋuy hoyok-ziyna, nam col Uriyas hay liyn ma nam wi ala lakay vunam kayn si soje sa wi duur ŋaana.

¹⁷Sum sa hay hoyok-ziyn cukay goy kay li duura hiɗi Yowab; sumun ŋolo kuɗ sa sunda vi David fi mitta. Uriyas ma Hetna kaw fi mitta.

¹⁸Yowab gi sunda tam David kay vulum labara vi slen kaf ma li vun duura.

¹⁹Nam ka di sa ma nam gum sunna ala: Hay li ma vunaŋ vatawa kay vul labara vi duura tam mulla,

²⁰la nam muɗawa ɦiya, la nam daŋawa ala nigi co kulo tam gulmun goboyo kay li duura kay mige, nigi may wi ala sumun gi nagani kulo kay gulmun paɗi su?

²¹Abimelek goora vi Yerubeset cum kayn gige? Cum kayn ti cata hay li ma ma' gi goor-hiɗiy ma lutna ay kulo kay gulmun panɗi su? Nam may mit kayni hay Tebet ɗisu? Nigi tuɗ kulo tam gulmun goboy kay mige? La nam jobaŋawa nalani, naŋ ma hotom dit ala: Uriyas ma Hetna ma sunda vaŋ kaw nam mitiya.

²²Sa ma sunda kaliya. Hay li ma nam co ɗawni, nam vul labara mi David kay slen ma Yowab dumti kafna.

²³Sa ma sunda di tam David: Sumun kayni donota visi suw kuma'a; nisi cukay goy kirma'a hay fulda, may numa zutsi goy bugolsiya ta-ta kalaf hay vun-galana:

²⁴Kulo kay gulmunna pa, sumun ɓe sa sunda vaŋ hiɗi ɓarawta, sa sunda vi mulla ŋolo fi mitta, sa ma sunda vaŋu Uriyas ma Hetna kaw fi mitta.

²⁵David di tam sa ma sunda: Naŋ ma di tam Yowab ala: Nam ma ɓulak dikam kuɗ van kaynɗi, kay kewt cal sa hena, na' muɗ cal sa hen lay; nam ma mok hoyok-ziyn kayn hiɗi dono'o, tom gaa'a may. Naŋ kaw, naŋ ma teŋem iramu.

²⁶Hay li ma cata vi Uriyas hum ala jufa' mitiya, na' tiyimu.

²⁷Hay li ma do'olla vatawa, David gi sun ka'a kay va'ay vo hay ziyna valamu. Na' muɗ goy cata valamu, na' vuɗum goor kepe. Va ma David lumna kayni may firi dik Lawnɗi.