Read Masana 2 SAMUEL 13 Bible Online

2 SAMUEL 13 - Masana bible

2 SAMUEL 13

¹Bugol kayni, law mara li lo. Absalom goora vi David ɓasulum tara ka kepe na' jifiy ŋolo, ya' ala Tamar. Amnon goora vi David mina'a.

²Amnon muɗ loyo, ta-ta nam li tuwam moyo kuɗ goor-bulumta Tamar, kay na' ka hay wayata-pasiyakka,[6] lop ŋolo kay Amnon a nam fa' hagata va'a.

³Amnon banamna ka kep yum Yonadab, goora vi Simeya ɓasum Davidna. Yonadab kayni nam yal ŋolo.

⁴Yonadab di tam Amnon: Naŋu mi goora vi mulla, may graw culumta kaf nan ɗuwaŋ kayni, naŋ ka ŋok vokaŋ lo lo kayn kay mige? Naŋ may danɗi su? Amnon hotom dita: Tamar ɓasum Absalomta nan mina'a.

⁵Yonadab dumu: Buraŋ gaa kay gilikŋa vaŋu, laŋ tuwaŋ moyo, hay li ma buŋ coyawa ɗuwaŋu, naŋ ma dum ala: Vulaŋ hagata tam goor-bunta Tamar kay na' ma co vulan va ma ti'e; na' ma kot va ma tin vok iranu, kay nan ma wumu, yawam hay ɓa'a kay tumu kay.

⁶Amnon bur gaa'a, nam li tuwam moyo. Mulla co kay ɗuwumu. Nala Amnon di tam mulla: Naŋ ma di tam goor-bunta Tamar kay na' ma co'o, kay kot hambulla ma' vok iranu, kay nan ma yawam hay ɓa'a kay tumu.

⁷Tamar ka musi kalaf hay ziyna, David gi sunda ta' ala na' ma tuɗ hay ziyna vi goor-bu'na Amnon kay kotom va ma ti'e.

⁸Tamar kali hay ziyna vi goor-bu'na Amnon, nam ka buri gaa'a. Na' yaw futuwna, hiliɓimu, kot hambulla vok iramu, na' zalamu;

⁹bugol kayni na' sli ŋalayta, na' kom gaa vok iramu. May Amnon min tiɗi. Nam di'e: Gigi ir sumun kaf goy jiya, sum sa kalaf valamna kaf cuki goy jiya.

¹⁰Bugol kayni Amnon di tam Tamar: Narag tinay kalaf hay ziyda buurta, kay nan min tum hay ɓagu. Tamar yaw hambul ma na' kotomna, tuɗum mi goor-bu'na Amnon hay ziyda buura.

¹¹Hay li ma na' ka vulumta kay ti'e, nam bowa'a di'e: Nagaya, burag hiɗi nanu, goor-bunta.

¹²Na' hot dumu: A'a, goor-bunna, muɗan zuloɗi, kay sa as li slen ki kayn nala hay Israyel noŋɗi, naŋ li law ma yawn kaynɗi.

¹³Nanu hiɗi zulota vanu, nan ma tuɗ ɗawn arige? naŋ kaw, naŋ ma hin ɗawni ki sa ma yawi nala hay Israyel. Wulin kayn nan siɗawaŋu, jobaŋ tam mulla, a nan muɗ goy ir vaŋu kayn nam as telaŋɗi.

¹⁴May nam min huma' noŋɗi; nam la' hiɗi dono'o bur hiɗi na'a.

¹⁵Bugol kayni na' muɗ kir Amnon bis ŋolo suw min ma nam mina' jewna. Nam di ta'a: Fokag kulo'o, kalagu!

¹⁶Na' hotom dita: Joota ta naŋ la' tanta naŋ min jora' voko hay li ma naŋ min digiɗan goyo kayn may asɗi.

¹⁷Nam min huma'ɗi, nam yi goor ma sunumna, dum ala; cat waŋŋi digiɗaŋgi goy gine hiɗi nanu, tunaŋgi ira' goy jiya. Bugolda naŋ duk vunni kulo'o.

¹⁸Sligara va' tuwam jariya; kay guro-boyna vi muliyana ay cukum kayn mi sligar ma naana hay li ma nisi bay bur tam sa tuwa. Sa ma sunda vi Amnon digiɗa' goy jiya, nam duk vunni kulo bugola'a.

¹⁹Tamar yak butuw-kun kulo ka'a, jet sligara va' ma jifin goyo, na' cuk ba' ka'a, na' kali hiɗi ciriyna.

²⁰Ɓasu'na Absalom joba'a: Amnon bur hiɗi nak su? Wulin kayni ɓasunta, bag vunagu, kay nam mi ɓasukŋa, kay nam mi goor-bugŋa, nala Lawt kayn nak va' hay dikagɗi. Tamar liyn viy kira'a, na' mus ma' vo hay ziyna vi ɓasu'na Absalom.

²¹Hay li ma mulla David hum slen kayni kafe, dikam ɓulak ŋolo.

²²Absalom min di va ma ŋaa'a lebo jooɗi kaw kay Amnon; may nam vum hayamu, kay nam ɓulakam ɓasulumta Tamar.

²³Busat ma' bugolda, Absalom vul yita tam gurona vi mulla kaf, kay sum sa ka ɗuŋus fok-dimina valam ka ɗawni hay Baal-Hatserot, goboy hiɗi Efrayim.

²⁴Nam tuɗ tam mulla dum ala: Humaŋu, nan ka ka ɗuŋus fok-dimina vanu; naŋ hiɗi sa sunda vaŋu ma tapgiyay kuɗanu.

²⁵Nala mulla di tam Absalom: A'a, goora vanu, numa as tuɗis kafɗi, kay la naɗi numa ma caŋ neke. Absalom so tuwam talamu, may mulla min tuɗ noŋɗi. Nam gum bolo may.

²⁶Absalom di'e: La naŋ asɗi kaw, vulaŋ hagat tam goor-bunna Amnon kay nam ma tuɗis hiɗi numa'a. Mulla hotom dita: Nam as tuɗis kuɗaŋ ɗawn tuɗ tige?

²⁷Hay li ma Absalom so tuwam talamu, mulla hin hagata tam Absalom hiɗi gurona valam kaf kay tuɗ kuɗumu.

²⁸Absalom ka di tam sa sunda valam ala: Ligi ŋali, hay li ma dolayn tun cawawa li Amnon, la nan digiyawa ala: Calgi Amnon; nigi ma cum goyo, ligi narɗi, kay vulgi hagat kayn mi nanu, ligi dono'o, ligi tuwgi kursuliya.

²⁹Sa sunda vi Absalom li Amnon ki Absalom vulsi hagat nala, nala gurona vi mulla kaf yaway kulo'o, gigekaw ɓe kay kulumna valamu valamu, nisi muni jaŋi may.

³⁰Hay li ma nisi ay hay hagat tuwa, labara co tam David ala Absalom ci gurona valamawa goy kafe, mara kep kaw may hiniɗi.

³¹Nala mulla fokay kulo'o, nam jet sligara valam goyo, nam bur gaa kay nagata, sa sunda valam sa talamna kaf jet sligara visi goyo.

³²Yonadab goora vi Simeya ɓasum Davidna sli ditiya di'e: Mulla vanu, naŋ ma var ala gurona vaŋ sa joriyon kayni miti goy kafeɗi. Miti kayn mi Amnon kepe, kayni mi va ma Absalom varam hay dikam jewe, kayni hay buur ma Amnon ɓulak basulumta Tamar pa.

³³Mulla, naŋ ma ɓulak varta vaŋu hiɗi ta ala gurona vaŋ kaf mitiyatɗi, kay miti kayn mi Amnon kepe.

³⁴Absalom pir jaŋi. Goor-joriyo ma coli li ŋomda poŋ iram kulo na kayni, sumun ŋolo ka tuɗay hay hagat ta bugolomta, hay galla vi hiɗiyn pa.

³⁵Yonadab di tam mulla: Gurona vaŋ ka tuɗay zaw, dita ta nan daŋgita laawa hay liya'a.

³⁶Hay li ma vunam ma din vat kayni, gurona vi mulla co may. Nisi mun tiyn bijir'. Mulla hiɗi sa sunda valam kaw cuk zimiy goy ŋol lay.

³⁷Nala kayni Absalom piriya, nam kali hay ziyna vi Talmay goora vi Ammihur, mulla vi Gesur. David ka tiy hay buurta kaf kay goora valamu.

³⁸Absalom mus hay Gesur ir busat hiɗi bugol nam pir ɗawn pirna.

³⁹Mulla David hin gar ma nam ka gar Absalomna, kay iram teŋi teŋe kay mitta vi goora valam Amnon.