Read Masana 2 SAMUEL 18 Bible Online

2 SAMUEL 18 - Masana bible

2 SAMUEL 18

¹Sum sa kuɗ Davidna nam ŋaɓsi goy kafe, nam tun sum sa ŋulona kay vok ma birimna hiɗi vok ma kisna.

²Gal ma ɦidina vi sumuna nam laksi gaa kuɗ gaŋeraŋa vi Yowab, gal hen ma ɦidina kuɗ gaŋeraŋa vi Abiskay goora vi Seruya, ɓasum Yowabna, gal hen ma ɦidina lo gaa kuɗ gaŋeraŋa vi Ittay ma Gatna. Nala mulla di tam sumuna: Nan kaw, nan min kalis goy hiɗi nigiya.

³May sumun di'e: Naŋ as kalis goy noŋɗi, kay hay li ma numa munawa jaŋi ni, nisi as tun ŋalda visi ɗawn kuma numa segenɗi, la nisi vat galla vuma kaf kaw, nisi as tun ŋalda visi kay kaynɗi; may naŋu, naŋ jarma kayni ŋray ca ki sumun birim doogo nala, la nala, marya kayni, gutda vaŋ as coy tuma kayn hay hoyok-ziyn pa.

⁴Mulla hot disiya: Nan ma li va ma kirgi ŋaana. Ki kayn nala mulla col tam vun-ziyna, hay na'ta sumun ka kali goyo kuɗ vokŋa visi ma kisna hiɗi ma birimna.

⁵Mulla hin dita tam Yowab, Abiskay hiɗi Ittay ala: Kuɗ minda vigi ta kanta, ŋali ŋali hiɗi goor ma joriyona Absalom. Sumun kaf hum va ma mulla dum tam sa ŋulona visiya, kay nisi ma li ŋali hiɗi Absalom.[9]

⁶Nisi cukay goy hay fulda kay dur sa Israyella, duura li kayni kuɗ juruta vi Efrayim.

⁷Hay duur namna, sa sunda vi David kol kay sa Israyella, hay buur namna kayni sumuna vi David ci kuɗ sa fi Absalomna birim dok-ma',

⁸duura mer goy hay liyn kafe, fulda ba sumun ŋolo suw kew-gaferaŋa.

⁹Sumuna vi David co kay Absalom. Absalom ka musi kay kulumna, kulumna kal gaa kuɗ gu-terebinte* ma ŋolla, ma ka sleway yam tuwamna, nala ɗuŋus Absalom gaɓ kulo'o tam gu-terebintena; nam hin gaɓay kulo tam gun na waŋ, selem may co gaa vi nagatɗi, kulum ma nam ɓey kalamna kaliya.

¹⁰Sa mara kep, hay li ma nam wi kayni, nam co'o di Yowab ala: Nan wi Absalom ay gaɓay kulo tam gu-terebintena.

¹¹Nala Yowab di tam sa ma maram labara ala: Naŋ wumi su? Naŋ min cum goyɗi kay mige? Lali naŋ cum ciya, nan vulaŋ gurjuta ir sikel* doogo hiɗi kantin kepe kaw.

¹²May san kayni di tam Yowab: Lali naŋ vulan gurjuta ir sikel birim kep kaw, nam as tun ɓan tam goora vi mulla noŋɗi; kay naŋu hiɗi Abiskay hiɗi Ittay, dita ta mulla di tigi ala nigi ma li ŋali hiɗi Absalom kayni, numa hum dita na'ta.

¹³Lali nan cum ciy ɦawa nala, va ma as ŋay goy kay mulla mayɗi, di goy kan ɗawn mi naŋ noŋo.

¹⁴Yowab di'e: Nan may col kataŋ tanɗi, nam yaw yakan hay ɓalam ɦidi, pum hay dik Absalom, nam fi Absalom gaɓay kulo tam gu-terebinten waŋŋi, nam ka iri tuwa.

¹⁵Sum sa joriyon doogo sa ka ziy sle-ma-duura vi Yowabna, nisi ŋuy Absalom, nisi calamu, cum goy mati.

¹⁶Yowab buw togolomna; nala sumun hotiya, nisi min jaŋ kuɗ sa Israyel loɗi, kay Yowab telsiya.

¹⁷Nisi sli Absalom, gum gaa hay zulla ma ŋolla hay juruta, nisi ko hiɗiyn ŋolo kalamu. Sum sa Israyel kaf mun jaŋi, gigekaw hay ziyna valamu valamu.

¹⁸Hay buura irita valam kayni, Absalom mol hiɗiy mara kulo kay tuwamu hay liy ma beɗna vi mulla; kay nam di'e: Goor ma nan vuɗumu kay semda van ma hin hiɗi namu mayɗi. Hiɗiy ma nam molomna nam yum hiɗi semda valamu, ta-ta vaydi kaw nisi ka yum ala hiɗiy ma molayna vi Absalom.

¹⁹Akimaas goora vi Sadok di'e: Nan min na jaŋi kay nar labar ma ŋaana tam mulla, kay Ma-Vatɗin lum ɗigertawa hay li ma nam butum goy hay ɓam sa gawt kalamna.

²⁰Yowab dumu: Labar namna tuɗum vayd ɗawn mi naŋɗi; naŋ ma tuɗum hay buur mara'a, kay miti kayn mi goora vi mulla.

²¹Yowab di tam Kusi, tuɗaŋu, labar ma naŋ wumna tuɗaŋ vaŋgi mi mulla. Kusi girif gaa vok Yowab, bugol kayni nam kali jaŋi.

²²Akimaas goora vi Sadok di tam Yowab sem mara lo ala: La nanigekaw, hinan jaŋ bugol Kusi. Yowab di'e: Naŋ min na jaŋi kay mige goor-manna? Kay va ma gutaŋ naŋ hay labar namna mi mige?

²³Akimaas ala: Lali nanige kaw, nan min na jaŋi. Yowab ala tuɗaŋ jaŋi. Akimaas fok jaŋi hay hagata vi fulda, nam kal vok Kusi.

²⁴David ka musi gaa jar vun-ziyn ma ma'na. Sa ma ŋomda fokays hay vun-ziyn pa, nam co kulo kay yam gulmunna; nam poŋ iram kulo'o ɗuwa, nam wi san ka jaŋay valam kep.

²⁵Sa ma ŋomda ciriya, nam kali di mulla. Mulla di'e: La nam ka valam kepe, nam ka maram kayn mi labari. San kayni ka co goboy suwa suwa.

²⁶Sa ma ŋomda wi sa mara kep ka jaŋay lo, nam siwel tam sa ma ŋom vun-galana ala: Sa mara kep ka jaŋay valam kep lo. Mulla di'e: Nam ka maram kayn mi labar kaw.

²⁷Sa ma ŋomda di'e: Sa ma jewna jaŋ kiran ki Akimaas goora vi Sadok nala. Mulla di'e: Nam mi sa ma ŋaa'a, nam maram kayn mi labar ma ŋaa'a.

²⁸Akimaas ciriya, nam di tam mulla: Slen kaf tuɗi ŋaa'a. Nam dab vokom gaa kay nagat vok mulla di'e: Bolda ka kay Ma-Vatɗina Lawna vaŋu, sum sa yaw kulo kataŋŋa nam vulsiyawa hay ɓaŋu.

²⁹Mulla di'e: Absalom ma joriyona ka goy gaŋay su? Akimaas hot di'e: Nan hiɗi sa ma sunda vaŋu hay li ma Yowab cukma ay kayni, nan hum suwan ŋolo; may va ma lin mi mige kla nan wiɗi.

³⁰Mulla di'e: Colaŋ goy gal tuɗoŋ tani, Akimaas col goy gal tuɗoŋo.

³¹Mus neeɗa kayni, Kusi co de'. Nam di'e: Mulla vanu, humaŋ labara ma ŋaana kayni, vaydi Ma-Vatɗina laŋ ɗigertawa hay li ma nam butaŋ goy hay ɓam nisi kaf sa yaw kulo kataŋu.

³²Mulla di tam Kusi: Absalom ma joriyona ka goy gaŋay su? Kusi hot dita: Sa gaw kay mulla hiɗi nisi kaf sa yaw kulo kat mulla, kay laŋ joona, goor ma joriyon namna ma liys ŋray ca ki nisi nala kaw.