Read Masana 2 SAMUEL 19 Bible Online

2 SAMUEL 19 - Masana bible

2 SAMUEL 19

¹Wulini mulla dikam ɓulak yulul', nam jik hay ziyda valamu, kulo kay vun-ziyna, nam tun caw tiya. Hay li ma nam ka tuɗa, nam ka di'e: Absalom goora vanu, goora vanu, Absalom goora vanu! Nan mit hay baŋalaŋɗi kay mige? Absalom goora vanu, goora vanu!

²Nisi mar labar tam Yowab ala: Mulla ka tiy tuwam ŋolo kay mitta vi Absalom.

³Hay buur na'ta kayni, kolda muɗi goy mi tiyna kay sumun kafe. Kay hay buur na'ta, sumun ka hum dit ala: Mulla ka yor tuwamu kay goora valamu.

⁴Hay buur na'ta kayni, sumun cuk kulo hay hoyok-ziyn kayn muɗi tuɗ surgum-surgum', ŋray ca ki sum sa munay vun duura nala.

⁵Mulla kusuɓ iramu, nam ka siwel hiɗi delem kulo'o ala: Absalom goora vanu! Absalom goora vanu! Goora vanu!

⁶Yowab kal kulo hay ziyda ta mulla ka haya'ta, nam di'e: Vaydi naŋ muɗsi zulo kayni si sa sunda vaŋu, sa suɗaŋ irita vaŋ goyo, irita vi gurona vaŋ sa jufayna hiɗi sa boyna, irita vi boyna vaŋu hiɗi boy sa sunda vaŋu kaw.

⁷Naŋ minsi si sa kaŋ gawna, sa minaŋŋa naŋ kaasi gawi may, kay vaydi naŋ ɗekmaawa ala sa mara ma tuni ŋol kaŋ mayɗi, sa ma sunda vaŋ mayɗi kaw; wulini nan wi ala, lali Absalom hin hini iriya, lali numa mit miti may ni, kayn kiraŋ ŋaa'a suwa.

⁸Fokaŋ kulo wulini, kalaŋ goy jiya, lawaŋ tam sa sunda vaŋu! Kay nan yi va kanu hay sem Ma-Vatɗin ala: La naŋ kal goyɗi, hay henjeta vaydita sa mara kep kaw as hin kuɗgiɗi; joot ta faŋgi ɗawni, na' suw joo ma naŋ ŋaf hiɗi namna kaf, tun caway hay joriyota vaŋ pa ta-ta wulini.

⁹Nala mulla fok kulo'o, nam mus goy hay vun-ziyna: Nisi tuɗ di mi sumun kaf ala: Humgiya mulla ka musi goy hay vun-ziyna. Nala sumun kaf co vokomu. Hay na'ta kayni, sum sa Israyella muni jaŋ kafe, gigekaw hay guɗukŋa valamu valamu.

¹⁰Hay jafna vi sa Israyel kaf kayni, sumun kaf ka foki hiɗi lawta, nisi ka di'e: Mulla butay goy hay ɓam sa gawt kayna, namu mi ma butay goy hay ɓam sa Filistina; Wulini nam pir goy hay nagat kayni kuɗ Absalom.

¹¹May Absalom ma nay hok mul kalamu kay nam tun mi mulla vaya kayni, nam miti vun duura: May nigi may var kay hot mulla ayɗi kay mige?

¹²Mulla David cuk sumun kat muliyan-sa-ɗifinna Sadok hiɗi Abiyatar kay nisi ma di tam sa maariyana vi Yuda ala: Nigi ma li si sa cawna kay hotanis vo'o kay mige? Kay slen ma ka law jar sa Israyella coy ta-ta tam mulla.

¹³Nigi si guro-biyonna, nigi si sliwanu hiɗi zokanu, nala nigi hin goy cawi hay hotta vanu kay mige?

¹⁴Nigi ma di tam Amasa kaw ala: Nam kaw may mi sliwan lay zokan lay ɗisu? Lawn ma lan joo'o hiɗi dikam kafe, la naŋ muɗ mi ŋolla vi sojena hay baŋal Yowabɗina.

¹⁵David sleɗ dik sum sa Yudan kafe, ki nisi mi sa ma kep ɦawa nala; nisi gi sunda tam mulla kay dum ala: Hotaŋiya, naŋ hiɗi sa sunda vaŋ kafe.

¹⁶Mulla hotiya, nam co ta-ta vun Yordan; sum sa Yudana kali hay Gilgal kay ŋaf ir mulla, kay ɦawam kulo gal hena vi Yordan.

¹⁷Simey goora vi Gera ma Benyaminna, ma ay hay Bakurimna, nam li tuwam koloyo kay kal hiɗi sum sa Yudana kay ŋaf ir mulla David.

¹⁸Sum sa Benyaminna ka kuɗum birim kepe, Siba ma sunda vi Sawul hiɗi gurona valam sa doogo yam vaslna hiɗi sa sunda valam sa dok-ma'na ka hiɗi Simey kaw. Nisi ɦaw Yordan kulo'o kay tuɗ ŋaf ir mulla.

¹⁹Nisi vul lumda kepe kay gi (mulla hiɗi) jafna valam kulo'o; hay li ma mulla co goboy kay ɦaw kulo'o, Simey goora vi Gera girif gaa vokomu.

²⁰Nam di tam mulla: Mulla, naŋ ma var kay jiw-zlata vanɗi, yaŋ ma jok ŋul ma nan ŋulaŋu hay li ma naŋ kali goy hay Yerusalemna, naŋ ma van hayaŋɗige!

²¹Kay nan sa ma sunda vaŋ wi ala nan li sulukawa, wulin kayni, nan mi ma jewna jar jafna vi Yosef, kay co ŋafaŋ iraŋ vaydi.

²²Ki kayn nala Abiskay goora vi Seruya sli ditiya nam di'e: Simey as fi mitta ɗisu? kay nam ŋul sana vi Lawn ma mul ɦoki kalamna?

²³May David di'e: Nigi gurona vi Seruya, va ma ka jaran nan hiɗi nigin mi mige? Vaydi nigi min ɗek tuwgi goy ki sum sa gaw kanna nala kay mige? Vaydi kayn asay a ci sa goy kuɗ sum sa Israyella lo su? Nan may wi ala nan ti mulda damni kay sa Israyella ɗisu?

²⁴Mulla di tam Simey: Naŋ hayɗin as mit noŋɗi, mulla yi va kalamu.

²⁵Mefiboset goora vi Sawul kali kaw kay ŋaf ir mulla. Hay buur ma pirta vi mulla pa ta-ta hay hotta valamu, Mefiboset bay muz selem goy sem kep tuwa, bay kot jiweremu, bay muz sligara valam goy tuwa kaw.

²⁶Hay li ma nam co vok ir mulla hay Yerusalem, mulla dumu: Mefiboset, naŋ min tapis kuɗanɗi kay mige?

²⁷Nam hot dita: Mulla vanu, ɗutan mi sa ma sunda vanu, kay nan mi sa ma hurɓuliya ni, nan di ala nan min gan kurona vanu kay tuɗ kuɗ mulla.

²⁸May nam di law ma joon kanu vok iraŋu. May naŋ mulla ki sunda-wuralawn nala, laŋ va ma kiraŋ ŋaana.

²⁹Kay nisi kaf sa hay jafna vi bunu, nisi si sum sa nagay kay mitta vok iraŋ naŋ mulla; may hiɗi kayni kaf, naŋ ŋaɓan nan jar sum sa ti fun hiɗi naŋ kepna. Nan as garam taŋ wulin ɗawni mi meloge? Nan jobom taŋ wulin ɗawn mi mige?

³⁰Mulla dumu: Law ma dak-dakŋa ŋaana valam mi mige? Dita van coli ala: Naŋ hiɗi Siba, nigi ma ɓuraw nagat jargiya.

³¹Mefiboset di tam mulla: Hinim yawamis malam kaf, kay naŋ mulla van kali vo hay sle'ta kal' kayn tuta.

³²Barzilay ma Galaadna fokay hay Rogelim pa, ɦaw Yordan kulo'o hiɗi mulla, kay gum diram ta-ta goy hay gal hena vi Yordan.

³³Barzilay nam muɗi maar ŋolo, busata valam liy dok-glafandi. Hay li ma mulla ay hay Mahanayim kayni, nam gutum ŋolo, kay nam kayni mi sa ma faray ŋolo.

³⁴Mulla di tam Barzilay: Tapaŋay kuɗanu, hay li ma nay coowa hay hoyok-ziyna van Yerusalem ni, nan ma vulaŋ tin mi nanu.

³⁵May Barzilay hot dit tam mulla: Mulla, wulin nan tuɗis hiɗi naŋ ɗawni, busata van hini hay nagat gaage?

³⁶Wulin kayni busata van asay dok-glafandi, nan as kay poŋ ir va ma ŋaana hiɗi ma joona lo su? Nan as wi jibetna vi va ma nan tumna hiɗi ma nan cumna lo su? Nan as kay jak human tam sum sa gi nulla lo su? Nan as tapis kuɗaŋu kay vulaŋ nekka mara lo kay mige?

³⁷Nan min gaŋ diraŋ goy bugol niy-lumna Yordan neeɗa tuta. La naɗi kaw, ŋaata na'ta naŋ as lanta noŋ ɗawn kay mige?

³⁸Nan min hota, kay nan min mit hay hoyok-ziyna vanu, goboy hiɗi yam-usta vi bunu hiɗi sunu. May gorvona vaŋ Kimham zaw kaŋŋi, nam ma ɦaw kulo hiɗi naŋ mulla; naŋ as li talamu slen ma kiraŋ ŋaana.

³⁹Mulla di'e, hin Kimham kal hiɗi nanu, nan ma li talamu slen ma kiraŋ ŋaana, slen kaf ma naŋ min jobom tanna, nan ma vulaŋga may.

⁴⁰Hay li ma sumun kaf ɦaw Yordan kulo ɦawna, hay li ma mulla kaw kulo ɦawna, mulla bow Barzilay, nam gum bolo. Barzilay hot vo hay ziyna valamu may.

⁴¹Mulla tun iram hay hagata vi Gilgal, Kimham ka kuɗumu. Sumuna vi Yuda kaf hiɗi gal sumuna vi Israyel ɦaw mulla kulo bugol Yordan kayn si nisiya.

⁴²May ɗuw na kayni, sumuna vi Israyel kaf co tam mulla, nisi dumu: guro-biyoma'na sa Yudana slaŋay goyo, nisi ɦaw Yordan kulo hiɗi naŋu, hiɗi jafna vaŋ kaf hiɗi sumuna vaŋ kafe kay mige?

⁴³Sumuna vi Yuda, kaf hot dit tam sum sa Israyella: Kay mige mulla nam goboy hiɗi numa'a, va ma tigi dikgi kay kayni mi mige? Numa lakay lakŋ vulma tin mi mulla su? Lebo nam vulma va goy ɦawa kaw su?

⁴⁴Nala sum sa Israyella hot dit tam sumuna vi Yuda: Mulla nam vuma numa suw sem doogo, David nam vuma numa suwgi nigiya. Nala nigi ɗuwma birek-ceke kay mige? Job jew ala hot mulla aya kayn si numa ɗisu? Sumuna vi Yuda law ɗeŋ ŋolo suw sum sa Israyella.