Read Masana 2 SAMUEL 20 Bible Online

2 SAMUEL 20 - Masana bible

2 SAMUEL 20

¹Hay liy namna sa ma joo ka kepe, yum Seba, goora vi Bikri ma Benyaminna. Nam buw togolomna di'e: Galla vay may hiɗi Davidɗi, vocota vay tay hiɗi goora vi Isayɗi, nigi sa Israyella, gigekaw kalaŋ hay ziyna vaŋu vaŋu.

²Ki kayn nala sum sa Israyel kaf vi tuwsi goy hiɗi David, nisi tap kuɗ Seba goora vi Bikri. May sumuna vi Yuda hin juni tam mulla visiya, nisi tapay kuɗumu hay Yordan pa ta-ta hay Yerusalem.

³David kal hay ziyna valamu hay Yerusalem. Boy sa sunda sa doogona, sa nam hinsiyays ŋom ziyna nam yawsiya. Nam ŋomsi yam-tuwsi hay liy mara kep, nam ka vulsi tina, may nam may co buur tisiɗi. Nisi hin hiɗi vinsi duki kalaf na lak', ki boy sa duhulla nala, ta-ta hay buur ma mitta visiya.

⁴Mulla di tam Amasa: Naŋ ma yan sumuna vi Yuda, tun caw vaydi pa ta-ta buur ɦidi naŋ kay tuwaŋ kaw ma col tan tani.

⁵Amasa kali goyo kay yi sumuna vi Yuda, may buur ma mulla vulumtina nam jik goy kalamu.

⁶David di tam Abiskay: Wulin kayni, Seba goora vi Bikri ma lay joo suw Absalom. Naŋ kay tuwaŋu yawaŋ sa sunda vanu, jaŋaŋ kuɗumu, kay la nam fi hoyok-ziy ma dono'owa, nam ɗawn as fi kay loɗi.

⁷Abiskay kaliya, hiɗi sumuna vi Yowab kuɗumu, sa Keretiyena hiɗi sa Peletiyena kaw ka kuɗumu, hiɗi sum sa jufayna kaf kuɗumu, nisi kali goyo hay Yerusalem, kay digiɗ Seba, goora vi Bikri.

⁸Hay li ma nisi co goboy tam hiɗiy ŋolda ta ka buri hay Gabawon, Amasa co goy voksiya. Yowab ka hiɗi kewt juni furamu, ka juni kulo kay sligar ma cuki talamna; na' ka kali hay faara va'a, hay li ma Yowab ɦur vokomu, na' peŋ goyo.

⁹Yowab di tam Amasa: Basunna, naŋ ka ŋaa'a su? Nam bow Amasa hiɗi ɓalam ta jufta ki nam ka gum deɓe nala.

¹⁰Amasa min tun ŋalam kay kewta ta hay ɓam Yowabtaɗi. Nala Yowab jikim hayam tip', ruwatam zuk goy gaa vi nagata, nam jikim mara loɗi. Nala Amasa mitiya. Yowab hiɗi ɓasulumna Abiskay kaliya kay sli giɗer Seba, goora vi Bikri.

¹¹San kep kuɗ sumuna vi Yowab, nam mus kat Amasa: Nam ka di'e: Boniyom Yowabna hiɗi sumuna vi David, tapgi kuɗ Yowab.

¹²Amasa ka luguti gaa hay busuwna hay hagata: Sa ma musi talamna, hay li ma nam wi ala sumun kaf ka laka, nam sab Amasa goy hay fulda goy paŋay hagata, nam bar sligar kalamu may.

¹³Hay li ma nisi slum goy hay hagat slina, gigekaw tap kuɗ Yowab, kay digiɗ Seba goora vi Bikri.

¹⁴Yowab jik hay nagata vi sum sa Israyel kaf, tun iram hay galla Abel-Bet-Maaka, sum sa donon kaf tok tuwsiya, tap kuɗumu.

¹⁵Seba kali kulo hay Abel-Bet-Maaka, nisi co'o ŋuy hoyok-ziyna, nisi in nagan kulo tam ziyna, com ta-ta kulo tam yam-gulmunna. Sumun kaf sa ay hiɗi Yowab ka duw gulmunna kay tom gaa'a.

¹⁶Ki kayn nala cat tara ta yali ta kulo hay hoyok-ziyn kep, na' tun caw ciriy ala: Humgiya! Nan siɗawgiya kay nigi ma di tam Yowab ala nam co tani kay nan min dum va'a!

¹⁷Nam co tam cat goboyo, na' ka dum ala naŋ zawni mi Yowab su? Nam ala awa mi nanu. Na' di'e: Humaŋ dita vi gorvota vaŋu. Nam hot dit ala: Nan ka huma.

¹⁸Na' di'e: Jew kayni sumun ka di ala: Tuɗay kuɗ Abel jobaya, slen kaf ka vat ki kayn nala.

¹⁹Hay Israyel kayni, nan mi hoyok-ziy ma sleɗe, ɗigere kaw, hoyok-ziy ma ŋolla hay Israyel naŋ min ɓulakam goy kayn kay mige? Naŋ min to vocota vi Ma-Vatɗin goyo kay mige?

²⁰Yowab hot dita: Varta kay ɦo hoyok-ziyn gaa'a kay ɓulakam goyo kaw kayni gine hiɗi nanu.

²¹Varta van may ki kayn naɗi, may san kep hay jafna vi Efrayim, yum Seba, goora vi Bikri, nam fok kulo kat mulla David, nigi vulanti ay goy kay tuwam kepe, nala nan ma vi tuwan goy hiɗi hoyok-ziyna. Cata di tam Yowab: Humaŋu, numa ka gaŋgi yalamis goy bugol gulmunna.

²²Cat kayni hiɗi yalda va' kaf, na' kali kat sumun kaf; nisi ka yam Seba goora vi Bikri goyo, gum goy mi Yowab, Yowab buw togolomna; sumun mer goy gine hiɗi hoyok-ziyna, gigekaw kali hay guɗukŋa valamu valamu. Yowab hot malam hay Yerusalem kat mulla may.

²³Yowab muɗi mi ma ŋolla vi sojena vi Israyel kafe. Benaya goora vi Yehoyada, nam tuni kay sa Keretiyena hiɗi sa Peletiyena;

²⁴Adoram tuni kay lopna vi taara, Yosafat goora vi Akilud mi ma ŋom slena;

²⁵Seva mi ma ɗo slena, Sadok hiɗi Abiyatar si sa li ɗifinna,

²⁶Ira ma Yayira mi ministrena vi David.