Read Masana 2 SAMUEL 24 Bible Online

2 SAMUEL 24 - Masana bible

2 SAMUEL 24

¹Ma-Vatɗina muɗ ɦiy mara lo kat sa Israyella, nam gi ir David tisiya, ka dum ala: Tuɗaŋu, laŋ ŋaɓta vi sum sa Israyella hiɗi sumuna vi Yuda.

²Mulla di tam Yowab ŋolla vi sojena, ma ka goboy hiɗi namna ala: Ŋuyaŋ nagata vi sa Israyel kafe, tun caw ay hay Dan pa ta-ta hay Bar-Seba, ligi ŋaɓta vi sumun goyo, kay nan ma wi ala nisi ka gaage.

³Yowab di tam mulla: Hin Ma-Vatɗina Lawna vaŋu muɗ sumun ŋol suw sem kis, a naŋ mulla kaw ma wisi hiɗi iraŋu! May mulla, naŋ min li ŋaɓta vi sumun goyo kay mige?

⁴Mulla so tuwam tam dita ta nam vula' tam Yowab hiɗi sa ŋulona vi sojena, Yowab hiɗi sa ŋulona vi sojena yawis tam mulla pa kay tuɗ li ŋaɓta vi sum sa Israyella.

⁵Nisi ɦaw Yordan kulo'o, nisi mol hay Arower, hay gal ma jufna vi hoyok-ziyna ma ka jar lokŋa vi Gad, ma goboy hiɗi Yayezer.

⁶Nisi kali hay Galaad, kali hay nagata vi Taktim-Hodki. Nisi kali hay Dan-Yaan, hiɗi liyn ma gal Sidon kaw.

⁷Nisi kali hay hoyok-ziy ma gulmun talamna vi Tirus, hay hoyok-ziyna vi sum sa Heviyena hiɗi sa Kanaanna kaw. Nisi vat goy hiɗi gal ma kayamna vi Yuda, hay Ber-Seba.

⁸Ki kayn nala nisi ŋuy nagat kafe, nisi li ŋaɓta ir til zleeŋe hiɗi buur dok-ma', bugolda nisi hot hay Yerusalem may.

⁹Ŋaɓta vi sumuna Yowab vula' mi mulla: Hay Israyel kaf kayni, sum sa wi duura sa gaɓ kew-gaferaŋa tapay noŋ pet birim kis-glafandi, hay Yuda nisi noŋ pet birim kis-vasl may.

¹⁰Hay li ma David li ŋaɓta vi sumun goy lina, bugol kayni dikam tun caw vun bat-bat'. Nam di tam Ma-Vatɗina: Nan li suluk ma ŋolawa hay li ma nan li kayni. Wulin kayni, Ma-Vatɗina, vulaŋ gida kay jiw-zlata vanu, kay nan li kayni ŋray ca ki sa ma ɦay-ɦayn nala.

¹¹Hay buurta ka'ta, hay li ma David fok kulo'o, Ma-Vatɗin di yoboyn ki kayn nala tam Gad ma jobta, ma wi vokomna vi David ala:

¹²Tuɗaŋ daŋ tam David ala: Humaŋ va ma Ma-Vatɗin ka di'e: Nan min lak bakmaran vokaŋ ɦidi; vilekaŋ mara kuɗum kepe, kay nan min wataŋ hiɗi namu.

¹³Gad kali kat David, nam ka dum law na'ta: Nam dum ala: Slen ɦidi cani naŋ ma vi kuɗum kepe: Mayta ma li hay nagata vaŋ ir busat siɗiya, lebo sum sa gawta ma digiɗgi voksi ir til ɦidi, lebo bakmara ma ci sumuna ma li hay nagata vigi ir buur ɦidi. Nam cani vilekaŋ mara kuɗum kepe, nan min hot labara tam sa ma gani taŋ sunna.

¹⁴David hot dit tam Gad: Nan ka hay yorta ŋolo, Hi! marya kayni nay ma mit hay ɓam Ma-Vatɗina, kay slugota valam kayni na' ŋol suwa; nan may min kay mit hay ɓam saɗi.

¹⁵Ma-Vatɗin gi bakmaran aya hay Israyel, tun caw hay graw culumta pa ta-ta tam buur ma ŋaɓayna, tun cawis hay Dan pa ta-ta tam Bar-Seba, sumun mit kuɗ sa Israyella ir birim dok-siɗiya.

¹⁶Hay li ma sunda meɗ ɓa' goyo kay Yerusalem kay ɓulaka' goyo kayni, Ma-Vatɗin muɗ varta valamu kay joot na'ta, nam di tam sunda-wuralawna ma ka ci sumun ala: Asaya, hotaŋ baŋ goy bugolaŋ yo. Hay na'ta sunda-wuralawna ka goboy hiɗi muɗakŋa vi Aravna ma Yebusna.

¹⁷Hay li ma David wi sunda-wuralawna ka jar sumuna kay cisiya; nam di tam Ma-Vatɗina: Humaŋu nan li sulukawa, joot kayn kan nanu. May sum sa nan ŋomsin tani, nisi lum mi mige? marya kayni meɗaŋ ɓaŋ goy kan nanu hiɗi jafna vi bunu.

¹⁸Hay buur na'ta kayni, Gad co kat David, nam dum ala: Tuɗaŋu, inaŋ giwin-ma-ɗifin kulo mi Ma-Vatɗin hay muɗakŋa vi Aravna ma Yebusna.

¹⁹David kaliya, ki Gad dum nala, ki Ma-Vatɗin vulum hagat nala.

²⁰Aravna ɗuw kayni, nam wi mulla hiɗi sa sunda valamu ka co talamu; Aravna kali goyo kirsiya, nam girif gaa vok mulla, dab vokom gaa kay nagata.

²¹Aravna di'e: Mulla vanu, naŋ co katan nan gorvona vaŋ kayn litige? David hot dita: Kay gus muɗakŋa hay ɓaŋu, kay in giwin-ma-ɗifinna mi Ma-Vatɗin hayamu, kay bakmaran ma vi tuwam goy tam sumuna.

²²Aravna di tam David: Mulla vanu, slaŋ muɗakŋa, laŋ hayamu ɗifin ma naŋ mina; ɗuwaŋu, luwayn kayni kay ɗifin ma ŋal-goyna, kekena hiɗi gu ma talamna ma li mi gu ma ŋalla may.

²³Aravna vulum mi mulla noŋ kafe. Aravna di tam mulla: Ma-Vatɗina Lawna vaŋu humaŋ humge.

²⁴May mulla di tam Aravna: A'a, nan min gusum hay ɓaŋ hiɗi gurju'u, nan as li ɗifin ma ŋal-goyna ma ti gurjuɗina tam Ma-Vatɗina Lawna vanɗi. Nala David gus muɗakŋa hiɗi luwayn kaw ir gurjuta sikel* dok-vasl.

²⁵David in giwin-ma-ɗifinna mi Ma-Vatɗina hay liy namna, nam li ɗifin ma ŋal-goyna, hiɗi ɗifinna vi lop ma slugona. Ki kayn nala Ma-Vatɗin dikam sleɗ tam sum sa hay nagatna, bakmaran vi tuwam goy tam sa Israyella may.