Read Masana 2 SAMUEL 6 Bible Online

2 SAMUEL 6 - Masana bible

2 SAMUEL 6

¹David hot tok sa ŋulona vi Israyel kafe, nisi noŋ pet sumun birim dok-ɦidi.

²David hiɗi sum ka kuɗumna sli hagata, fokis hay Baale-Yuda pa, kay tuɗ ɗawni, sli timgilla vi Lawni goyo. Kay Ma-Vatɗina Lawna vi vok-ma-duura ma ka musi jar kerubena* kulo kay arkena, girifim kayni vok timgil namna.

³Timgilla vi Lawna nisi tunum kay saret ma wuliya, nisi slumay hay ziyna vi Abinadab kulo kay hiɗiyn pa, Uzza hiɗi Ayyo gurona vi Abinadab ka tuɗ kuɗ saretna ma wulina.

⁴Nisi slumay hay ziyna vi Abinadab kulo kay hiɗiyn pa, Uzza ka tuɗ goy gal timgilla vi Lawna; Ahyo ka tuɗ vok timgilla may.

⁵David hiɗi sum sa Israyel kaf ka liw vok Ma-Vatɗina hiɗi gun kuɗ jafam kaf, hiɗi gu-siprena, hiɗi dil mara'a mara'a, hiɗi dilla, hiɗi darayna, hiɗi tokojayna, hiɗi kaway beɗayna kaw.

⁶hay li ma nisi co hay ɗiŋiriŋŋa vi Nakon, Uzza meɗ ɓalam goy kat timgilla vi Lawna, mokom kalamu, kay luwayn ka zor gal timgil gaa'a.

⁷Ma-Vatɗina muɗ ɦiya kat Uzza, Lawn cum gaa hay liy namna kuɗ joota valamu. Uzza mit gaa hay liy namna, goboy hiɗi timgilla vi Lawna.

⁸David dikam ɓulaka kuɗ kitata ta ki kayn nala ta Ma-Vatɗin ka' kay Uzzata. Liy namna ta-ta vaydi ka yum ala Peres-Uza.

⁹Hay buur namna David muɗ nari kay Ma-Vatɗina, nam di'e: La nala timgilla vi Ma-Vatɗin kal vo van ɗawn kaltige.

¹⁰Nam min kal timgilla vo valamu hay hoyok-ziyna vi David loɗi, nam kal timgilla hay ziyna vi Obed-Edom hay Gat.

¹¹Timgilla vi Ma-Vatɗina li til ɦidi hay ziyna vi Obed-Edom ma hay Gatna, nala Ma-Vatɗin gi bol kay Obed-Edom hiɗi ziyna valam kafe.

¹²Nisi mar labara mi mulla David ala: Ma-Vatɗin gi bolawa kay Obed-Edom hiɗi slena valam kafe, kayn kuɗ timgilla valamu. Nala David kaliya, nam sli timgilla ay hay ziyna vi Obed-Edom pa, maram hay hoyok-ziyna vi David, nisi tuɗumi kayn hiɗi firit ŋolo hay hagata.

¹³Hay li ma nisi sa tuɗ kuɗ timgilla ŋa sesi goy kep kep karkiya kayni, nisi ŋat put goy ɗifin kepe, hiɗi goor-put jakay kep lay.

¹⁴David ka pir nul hiɗi ŋiriyam noŋ vat', vok Ma-Vatɗina, cuki talam mi sligar-ŋoŋŋa ma ciliy hiɗi barawna.

¹⁵David hiɗi sum sa vo vi Israyel kaf sli timgilla vi Ma-Vatɗin ay goyo hiɗi ciriyn digi-digi', hiɗi buwna vi togolomna kaw.

¹⁶Hay li ma timgilla vi Ma-Vatɗina ka kal kulo hay hoyok-ziyna vi David kayni, Mikal goota vi Sawul ka ɗuw hay ir-ziyda, hay li ma na' wi mulla David ka pir kulo'o, ka gi nulla kaw vok ir Ma-Vatɗina, na' tun caw panam hay dika' kalafi.

¹⁷Hay li ma nisi mar timgilla vi Ma-Vatɗin marna, nisi tunum goy way guɗukŋa ma David kotom kalamna; David li ɗifin ma ŋal-goyna hiɗi ɗifinna vi lop ma slugona vok ir Ma-Vatɗina.

¹⁸Hay li ma David vat ɗifinna ma ŋal-goyna hiɗi ɗifinna vi lop ma slugona vatna, nam gi bol kay sumuna hay semda vi Ma-Vatɗina vi vok-ma-duura.

¹⁹Bugol kayni, sumun noŋ kaf, sum sa Israyella hiɗi ŋolda visi kaf, jufayna hiɗi boyna kaw, David ɓurawsi fun kisi kep kep kaf, vulsi sliwn kisi zutoŋ kep kep, hambulla vi gulda-guldan kisi kep kep kaw; bugol kayni sumun kaf kaliya, gigekaw hay ziyna valamu valamu.

²⁰David muɗ iram kay gi bol kay ziyna valamu yo, ki kayn nala Mikal goota vi Sawul kali goyo ŋafam iramu, na' di'e: Mulla, vaydi naŋ fok hoyokaŋ goy kir sa sunda vaŋ sa jufayna hiɗi sa boyn kaw, ki naŋ mi sa ma waa'a nala kayni, suburta mige ka hay kayni?

²¹David hot dit tam Mikal, nan pir nul kayni vok Ma-Vatɗina, nam ma vilekanu, kay nan kiram ŋaa'a suw bugu hiɗi jafna valam kafe, kay tunan mulu kay sumuna vi Ma-Vatɗina, sa Israyella, nan pir nul zawni vokom nam Ma-Vatɗina.

²²Nan min muɗ tuwan bis suw kayni lo, muɗ tuwan goy goor noŋo: May hiɗi kayn kaf sa sunda van sa nak di kisin lakŋi nisi as suburan dok-doko.

²³Dolay kayni, Mikal goota vi Sawul may fi goorɗi ta-ta hay mitta va'a.