Read Masana 2 SAMUEL 8 Bible Online

2 SAMUEL 8 - Masana bible

2 SAMUEL 8

¹Bugol kayni David ci sum sa Filistina, nam hotsi yisi gaa'a, nam yaw naga ŋulona visi hay ɓisiya.

²Nam kol kay sum sa Mowabna. Nam ŋaɓsi hiɗi zigewna; nam bursi gaa kay nagata; nam ŋaɓ zigewn ma' tam sa nam min cisi goyna, nam ŋaɓ zigewn kep tam sa nam min hinsi irina may. Sum sa Mowabna muɗ kayni, disi lawsi mi David, nisi muɗ vulum taara.

³David kol kay Hadadezer, goora vi Rehob, mulla vi Soba, kayni hay li ma Hadadezer min tuɗ sli liyna hay gal niy-lumna Eufrata.

⁴Sum sa ɓey kay kulumayn birimi hiɗi kis-siɗiya, David yawsi hay ɓalamu, nam yaw sum sa hiɗi sesi ɦawana birim dok-ma' kaw; kulumay ma sab kekena David kaam tiŋtiŋam goy kafe, ma nam ŋomomna kis ɦawa.

⁵Sum sa Siriyana hay Damas co kay gut kuɗ Hadadezer mulla vi Soba, may David ci sum sa Siriyana birim dok-ma' yam ma'.

⁶David tun guvernera hay Siriya vi Damas, sum sa Siriyana muɗ kayni, gaa kuɗ gaŋeraŋa vi David, nisi muɗ vulum taara kaw. Ma-Vatɗin ka ŋom David hay liyn ma nam ka jik hayamna kafe.

⁷Maray ma ora ma ka hay ɓam sa sunda vi Hadadezer David yawamu, nam maram hay Yerusalem.

⁸Mulla David yaw wayn ŋolo hay Betak hiɗi Berotay, hoyok-ziyna vi Hadadezer.

⁹Toy, mulla vi Hamat, hay li ma nam hum ala David kolawa kay sojena vi Hadadezer,

¹⁰nam gi goora valam Yoram kat mulla David, kay gum deɓe, kay fetem yalam goyo, kuɗ kolda valamu, ta nam kol kay Hadadezer. Kay Toy hiɗi Hadadezer duur ka jarsiya. Yoram mar doway-doorona, doway-ora hiɗi doway ma koti hiɗi wayna kaf hay ɓalamu.

¹¹Mulla David vulum goy tam Ma-Vatɗina, ki doorota hiɗi ora hegena ma nam yawam hay ɓam sum sa nam kol kisina, nala, nam vulum goy tam Ma-Vatɗina,

¹²ma nam yawam hay ɓam sum sa Siriyana, hay ɓam sa Mowabna, hay ɓam gurona vi Amon, hay ɓam sa Filistina, hay ɓam sa Amalekŋa, kuɗ sle ma nam tum ɓuraŋ kuɗ Hadadezer, goora vi Rehob, mulla vi Soba.

¹³Hay hotta valamu bugol kolda valam kay sa Siriyana, David tiy selem mara lo, nam ci sum sa Edomna birim doogo yam glafandi hay lok ma mandana.

¹⁴Nam tun sojen hay Edom, nam tun sojen hay Edom kafe. Sum sa Edomna kaf muɗ disi lawsi mi David. Ma-Vatɗin ka ŋom David hay liyn ma nam jik hayamna kafe.

¹⁵David ti mulda kay Israyel, nam ka li sle ma ɗigera hiɗi ma hay liyamna kay sumuna valam kafe.

¹⁶Yowab goora vi Seruya, ŋolla vi sojen kayn mi namu; Yosafat goora vi Ahilud mi ma ŋom labara;

¹⁷Sadok goora vi Akitub, hiɗi Akimelek goora vi Abiyatar nisi si sa li ɗifinna;

¹⁸Seraya mi ma ɗota, Benaya goora vi Yehoyada, nam mi ma ŋolla vi sa Keretiyena hiɗi sa Peletiyena, gurona vi David si sa li ɗifinna may.[3]