Read Masana 2 SAMUEL 9 Bible Online

2 SAMUEL 9 - Masana bible

2 SAMUEL 9

¹David ka joba: Sa mara hay jafna vi Sawul ma hini iriya, ma nan as lum ŋaata kuɗ Yonatan ka su?

²Sa mara kep mi sa ma sunda hay ziyna vi Sawul, yum Siba, nisi maram vok David. Mulla ka jobom ala: Naŋ damni mi Siba su? Nam hot dit ala «awa mi nan sa ma sunda vaŋu».

³Mulla di'e: Sa mara hay ziyna vi Sawul, ma nan as kay li ŋaata vi Lawn talam ka su? Siba hot dit tam mulla: Goora vi Yonatan mara ka kepe, selem hurɓuliya,

⁴mulla dumu: Nam ka arige? Siba hot dit tam mulla, nam ka hay ziyna vi Makir, goora vi Amiyel, hay Lodebar.

⁵Mulla David gi sunu kay garamiya hay ziyna vi Makir goora vi Amiyel, hay Lodebar.

⁶Nala Mefiboset, goora vi Yonatan, goor-ŋolona vi Sawul, nam co kat David, gi tuwam gaa'a, dab vokom gaa'a. David di'e: Mefiboset! Nam hot dit ala sa ma sunda vaŋ zawni.

⁷David dumu: Laŋ nar noŋɗi, kay nan min laŋ ŋaata kuɗ buŋu Yonatan. Nagata vi buŋ Sawul noŋ kaf nan min vulaŋga, naŋ ma ti fun dok-dok hiɗi nanu.

⁸Nam dab vokom gaa'a di'e: Nan gorvona vaŋ damni ŋray ca hiɗi diy ma mitina, nagay a naŋ var kan ki kayn nala su?

⁹Mulla yi Siba sa ma sunda vi Sawul, nam dumu: Slena vi mulaŋŋa Sawul hiɗi slena vi jafna valam noŋ kaf nan min vulum mi Mefiboset.

¹⁰Naŋ ma zumum sinena, naŋu hiɗi gurona vaŋu hiɗi sa sunda vaŋu. Naŋ ma feɗ wana, kay gurona vi mulaŋŋa ma fi va ma ti'e: May Mefiboset ma ti fun dok-dok hiɗi nanu. Siba kayni gurona valam sa jufayn ka doogo yam vasl, sa sunda dok-ma' may.

¹¹Siba di tam mulla: Nan gorvona vaŋu ma li kuɗ sle ma naŋ danti kafna. Mefiboset ka musi ti tin hiɗi mulla ki nam mi goora vi mulla nala.

¹²Mefiboset goora valam ma joriyo ka kepe, yum Mikka, nisi kaf sa ka hay ziyna vi Siba, nisi si sa sunda vi Mefiboset.

¹³Mefiboset musi kayni hay Yerusalem, kay nam ka ti dok-dok kayn hiɗi mulla. Selem ma' kaf hurɓuliya.