Read Masana 1 MULIYANA 1 Bible Online

1 MULIYANA 1 - Masana bible

1 MULIYANA 1

¹Mulla David muɗi maari, busata valam kali ŋolo; nisi baram sligar talam kaw, tuwam may gi ku noŋɗi.

²Sa sunda valamu di talamu: Mulla, wulin kayni numa garaŋ goot-cat tara kepe ta bay bur tam sa tuwa; na' ma col vokaŋ tani, na' ma kotaŋ tuwaŋu, na' ma bur gaa dikaŋu; ki kayn nala tuwaŋ ma gi kuwa.

³Nisi gar goot-cat ta jifiyta hay nagata vi Israyel noŋ kafe, nisi fa' kayn ti Abisak ta Sunamitta, nisi mara' kat mulla.

⁴Goot-cat na'ta kayni jifiyta va' suwiya. Na' kot tuw mulla, sunumu kaw; may mulla may bur ta'ɗi.

⁵Adoniya, goora vi Haggit, suburta kal hayamu, nam ka di ala: Muɗ mul ɗawn mi nanu. Nam gar keke-ma-duur kep hiɗi sum sa jaŋ kulumayna kaw, gar sum sa jaŋ vokomna dok-vasl may.

⁶Hay buur ma irita valam kaf kayni, bulum bay gatam sem kep ala naŋ lum na kayn mi mige tuwa. Adoniya namna kayni jifiy ŋolo, nam kayni mi ma vuɗ kay Absalomna.

⁷Nam ŋra vunam hiɗi Yowab goora vi Seruya, hiɗi mul-ma-ɗifinna Abiyatar kaw; nisi tap kuɗ galla valamu may.

⁸May mul-ma-ɗifinna Sadok, Benaya, goora vi Yehoyada, Natan ma jobta, Simey, kep hiɗi sum sa diksi jufayna vi David kaf min tap kuɗumɗi.

⁹Adoniya ŋat fok-dimina, ŋat luwayna, ŋat guro-luway ma jakayna, goboy hiɗi hiɗiyta vi Zohelet, ta ka gal En-Rogel; ɓosiyomna gurona vi mulla kaf nam nam yisi aya, hiɗi sumuna vi Yuda sa ka sun mulla kafe.

¹⁰May Natan ma jobta, Benaya, sum sa donona hiɗi goor-bulumna Salomon kaw nam min vulsi yit noŋɗi.

¹¹Ki kayn nala Natan di tam Bat-Seba sum Salomon: Wulini Adoniya goora vi Haggit tun tuwamawa mulu bay mulla David hum kayni, nak humi lebo humiɗi su?

¹²Wulin kayn nagaya, nan min ɗekag yali: Kay nak ma suɗ irita vagu hiɗi irita vi goora vag Salomon kaw.

¹³Nak ma tuɗ kalaf tam mulla David, nak ma dum ala: He! Mulla vanu, naŋ yi va kaŋ vokan ala goora vaŋ Salomon ma ti mulda bugoloŋu, nam ma mus kay zlamda-mulda vaŋu ɗisu? Wulini Adoniya ka ti mul kayn kay mige?

¹⁴Humagu, hay li ma nak ka law hiɗi mulla kayni, nan kay tuwan ma kalis kalaf bugolagu, nan ma hob vun dita vagu.

¹⁵Bat-Seba kal kalaf hay ziyda vi mulla. Nam muɗi maar ŋolo; Abisak ta Sunamitta ka sunumu may.

¹⁶Bat-Seba dab voka' gaa'a girif mulla. Mulla di ta'a: Nak minim mige?

¹⁷Na' hot dumu: Mulla vanu, naŋ yi va kaŋu vokanu hay sem Ma-Vatɗina Lawna vaŋu, naŋ di ala Salomon goora vaŋu ma ti mulda hay baŋalaŋu, nam ma mus kay zlamda-mulda vaŋu.

¹⁸May wulin kayni saraŋ tige, Adoniya ka ti mulda, may naŋ mulla bay wi kayni.

¹⁹Wulin kayni nam ŋat luwayna, guro-luway ma jakayna hiɗi fok-dimin ŋolo; gurona vaŋu nam vulsi yit kafe, nam yi Abiyatar mul-ma-ɗifinna hiɗi Yowab ma ŋolla vi sojena, may Salomon ma sunda vaŋu nam min vulum yitɗi.

²⁰Wulin kayni mulla vanu, sum sa Israyella irsi cuki kaf lakŋi kaŋ naŋu, kay naŋ ma ɗeksi kay sa ma mus baŋalaŋ hay mulda.

²¹Hay li ma naŋ mitawa kuɗ sumiyaŋu ni, nan hiɗi goora vaŋu nisi ɗawn ma lasma ki numa si sum sa li va ma joo nala.

²²Hay li ma na' ka law hiɗi mulla tuwa zaw kayni, Natan ma jobta co'o.

²³Nisi di tam mulla ala: Humaŋu, Natan ma jobta ka'a. Nam kal kalaf tam mulla, dab vokom gaa kay nagat vok mulla.

²⁴Natan di'e: He! mulla vanu, naŋ waŋŋi mi ma di ala Adoniya ma ti mul bugolaŋu, nam ma mus kay zlamda-mulda vaŋuna ɗisu?

²⁵Kay vayɗi nam kali ɗawni, nam ŋat luwayna, ŋat guro-luway ma ɗorayna, ŋat fok-dimin ŋolo kaw; nam vul yit mi gurona vaŋ kafe, sa ŋulona vi sojena, hiɗi mul-ma-ɗifinna Abiyatar kaw. Wulin nisi ka tokay talamu, ka ti'e ci'e kaw, nisi ka di ala: Mulla Adoniya mus iri musge.

²⁶May nan ma sunda vaŋ damni nam min vulan yitɗi, nam min vul yit mi mul-ma-ɗifinna Sadokɗi, Benaya goora vi Yehoyada nam min vulum yitɗi, Salomon ma sunda vaŋɗi kaw.

²⁷Mulla, la van kayni hinim li mi naŋu, sa ma sunda vaŋu ma mus bugolaŋ hay mulda ɗawni naŋ min dumɗi kay mige?

²⁸Mulla David hot dita: Yangi Bat-Seba, na' kali kalafi, col vok mulla.

²⁹Nala mulla yi va kalamu, nam ka di ala: Ma-Vatɗina ma butan goy vun zlat kafna ka iriya.

³⁰Ki nan yi va kanu vok iragu hay sem Ma-Vatɗina Lawna vi Israyel ala: Salomon goora vagu ma ti mulda bugolan ɗawn mi namu, nam ma mus kay zlamda-mulda vanu hay baŋalanu, vayɗi nan ma li slen ki kayn nala.

³¹Bat-Seba dab voka' gaa kay nagata, na' girif mulla. Na' di'e: Mulla vanu David, musaŋ iri ta-ta musge.

³²Mulla David di'e: Nigi ma yan mul-ma-ɗifinna Sadok, Natan ma jobta hiɗi Benaya goora vi Yehoyada. Nisi kali kalaf tam mulla.

³³Mulla di tisiya: Yawgi sa sunda van kuɗgiya, goora van Salomon nigi ma ɓem kulo kay kulumta vanu, nigi ma naram hay Gihon.

³⁴Ɗawni mul-ma-ɗifinna Sadok hiɗi Natan ma jobta ma ɦok mul kalamu kay nam ma ti mulda kay sa Israyella. Nigi ma buw togolomna, nigi ma di ala: Mulla Salomon mus iri musge.

³⁵Nigi ma tuɗgiyay bugolomu, nam ma co' mus kulo kay zlamda-mulda vanu, nala nam ma ti mulda hay baŋalanu. Kuɗ va ma nan dum dina, ma ti mulda kay Israyel hiɗi Yuda ɗawn mi namu.

³⁶Benaya goora vi Yehoyada hot dit tam mulla: Amen! Ma-Vatɗina Lawna vi mulla van di ki kayn nala!

³⁷Ma-Vatɗina ma li hiɗi Salomon ki nam li hiɗi mulla van nala kaw, hinim muɗ mulda vi Salomon ŋol suw faŋga lo muɗge.

³⁸Ki kayn nala mul-ma-ɗifinna Sadok kaliya hiɗi Natan ma jobta, hiɗi Benaya goora vi Yehoyada, sa Keretiyena hiɗi sa Peletiyena; nisi ɓe Salomon kulo kay kulumta vi David, nisi kalam hay Gihon.

³⁹Mul-ma-ɗifinna Sadok kal hay guɗukŋa, nam sli miyok ma mul hayamna, ɦokom kay Salomon. Nisi buw togolomna, sumun kaf ka di ala: Mulla Salomon mus iri musge.

⁴⁰Sumun kaf tuɗay bugolomu, nisi ka buw zlekemna, ka firi ŋolo; nagat ka wira kay ciriyna visiya.

⁴¹Hay li ma Adoniya hiɗi sum sa nam vulsi yitna ɓisi vat hiɗi fu ma tin kayni, labar winekŋ co tisiya may. Yowab hum buwna vi togolomna, nam di'e: Winekŋa ka patay kulo ŋolo hay hoyok-ziyna kayn kay mige?

⁴²Hay li ma nam ka law tuwa dam kayni, Yonatan goora vi Abiyatar mul-ma-ɗifinna cooya. Adoniya dumu: Naŋay goboyo, kay naŋ mi sa ma gaŋaya, naŋ vi labar ma ŋaa'a.

⁴³Yonatan hot dit mi Adoniya ala: Awa, mulla vay David tun Salomonawa mulu.

⁴⁴Mul-ma-ɗifinna Sadok hiɗi Natan ma jobta, Benaya goora vi Yehoyada, sa Keretiyena hiɗi sa Peletiyena kaw nam cuksi kuɗumu, nisi ɓem kulo kay kulumta vi mulla.

⁴⁵Mul-ma-ɗifinna Sadok hiɗi Natan ma jobta ɦok mul kalamu, nisi tunum mulu hay Gihon. Hay ɗawn pa nisi hotay vo hiɗi firita ŋolda, hoyok-ziyn ka firi ŋolo: Kayn mi winek ma nigi ka humumna,

⁴⁶Salomon kaw musi kay zlamda-mulda vatiya.

⁴⁷Sa sunda vi mulla kaw cooya kay gi bol kay mulla vay David, nisi ka di ala: Lawn muɗ semda vi Salomon tiy ŋolo suw semda vaŋ muɗge, hinim muɗ mulda valam ŋol suw faŋga muɗge. Kulo kay va ma buura valam waŋ' kaw, mulla David dab vokom gaa'a.

⁴⁸Mulla kay tuwam lo hot di ala: Suburta tam Ma-Vatɗina Lawna vi Israyel, nam ma vulan sa mara vaydi kay vurna hay baŋalanu, nam vulan liyna kaw nan ma wi sa namna hiɗi iranu.

⁴⁹Nala sum sa Adoniya vulsi yitna narta kal hay diksiya; nisi yaway kulo'o, gigekaw tun iram hay liyna valamu valamu.

⁵⁰Adoniya tun caw li nari kay Salomon, nam mok miyokŋa vi giwin-ma-ɗifinna kalamu.

⁵¹Nisi co'o di tam Salomon ala: Humaŋu, Adoniya tuwam nar kaŋu, nam mok miyokŋa vi giwin-ma-ɗifinnawa kalamu, nam ka di ala: Hin mulla Salomon yi va kalam vaydi ala nam as can goy hiɗi kew-gaferaŋaɗi.

⁵²Salomon di'e: La nam ɗek tuwam goy ki sa ma ɗiger nala, ɗuŋus ma kalam kep kaw as nig gaaɗi, may la joot ka hay dikamu, nam ma mita.

⁵³Nala mulla Salomon cuk sumuna, nisi jikimay gaa kay giwin-ma-ɗifinna pa. Nam co'o girif gaa vok Salomon. Salomon dumu: Tuɗaŋ vo hay ziyna vaŋ maŋ yo.