Read Masana 1 MULIYANA 11 Bible Online

1 MULIYANA 11 - Masana bible

1 MULIYANA 11

¹Mulla Salomon dikam min boyn sa pulla ŋolo. Nam sli goota vi mulla Farawn, nam yaw guro-boy sa Mowabna, sa Amonna, sa Edomna, sa Sidonna hiɗi sa Hetna kaw,

²nisi kayni hay jaf ma Ma-Vatɗin di tam gurona vi Israyel ala: Nigi ma tuɗ kuɗsiɗi, nisi kaw ma co kuɗgiɗi lay; kay lalinige kaw nisi ɗawni ma muɗ vaara vigiya kuɗ lawayna visiya. May Salomon tap tuwam hiɗi jaf-sum nisin kayni, zutum ti darta.

³Nam yaw boyn kis-siɗiya, yaw boyn sa gorvona kis-ɦidi kaw; nala boyna valam muɗum varta valamu.

⁴Hay liy ma Salomon muɗawa maari kayni, boyna valam muɗum varta valam kuɗ laway hegena, dikam muɗ minim mi Lawn kep ki bulum David li'ays nala tutaɗi.

⁵Salomon kal kuɗ Astarte*, lawayna vi sa Sidonna, kuɗ Milkom*, liwista vi sa Amonna.

⁶Salomon li sle ma joo'o kir Lawn Ma-Vatɗina, nam min tuɗ kuɗ Lawn Ma-Vatɗina hiɗi dikam kaf ki bulum David nala loɗi.

⁷Nala Salomon kot liyn ma ɗiŋiriŋŋa kulo kay hiɗiyta ta ka ɗiger vok Yerusalem, kay girif Kemos*, liwista vi sa Mowabna, hiɗi Molok, liwista vi gurona vi Amon.

⁸Nam li ki kayni nala kay boyna valam sa pulla kaf, sa ka ŋal urdina hiɗi li ɗifinna tam lawayna visiya.

⁹Ma-Vatɗina muɗ ɦiy ŋolo kat Salomon, kay nam muɗ dikamawa goy kat Ma-Vatɗina Lawna vi Israyel, nam ma vul tuwam kiram sem ma'.

¹⁰Hay li namna Ma-Vatɗin telem ala nam tuɗ kuɗ laway hegenɗi, may Salomon min hum kuɗ dita vi Ma-Vatɗin noŋɗi.

¹¹Nala Ma-Vatɗina di tam Salomon: Kay naŋ li slen ki kayn nala, kay bonota hiɗi gatta vanu ta nan ɗo taŋu naŋ may ŋoma'ɗi, mulda ta hay ɓaŋga nan ma jeta' goyo, vula' goy mi sa ma sunda vaŋu.

¹²May nan as li kayni hay buur ma irita vaŋɗi, kuɗ buŋu David. Nan ma hulot mulda goy ɗawni hay ɓam goora vaŋu.

¹³May nan as sli mulda goy kafɗi; nan ma hin jaf mara kepe mi goora vaŋu, kuɗ sa ma sunda vanu David, kuɗ Yerusalem kaw kay vilek ma nan vileka'na.

¹⁴Ma-Vatɗin fok sa ma gawt kulo kep kay Salomon, sa namna yum ala Hadad, sa ma Edomna, hay jaf mulda vi Edom.

¹⁵Hay li ma David kol kay sum sa Edomna kayni, Yowab ŋolla vi sojena kali ɗawni kay pi sa mitina, nam ci sum sa jufayna sa hay Edom goy kafe;

¹⁶nam mus ɗawni hiɗi Israyel sa kuɗumna ir til karkiya, ta-ta nisi ci sum sa jufayn goy noŋ kafe.

¹⁷Hay na'ta kayni Hadad pir jaŋi hiɗi sum sa Edomna, sa sunda vi bulumu, kay kal hay Egipte. Hadad ay mi goor ma joriyo tuwa.

¹⁸Nisi yawis hay Madiyan pa, kali ɗawni hay Paran, yaw sum sa Paran kuɗsiya, nisi co hay Egipte kat Farawn mul ma Egiptena. Farawn vul ziy mi Hadad kepe, kotom tuwam hiɗi sle ma tina kaw, vulum liy ma zumna kaw.

¹⁹Hadad fi slugot ŋolo vok ir Farawn, ta-ta Farawn vulum ɓasum cata valamta kuɗum ca'a, na'a ti ɓasum ca-mulda Takpenes.

²⁰Ɓasum Takpenesta vuɗum goora yum Genubat. Takpenes wulum vo hay ziyna vi Farawn, nam musi kayni hay ziyna vi Farawn, jar gurona vi Farawn.

²¹Ɗawni hay Egipte, hay li ma Hadad hum ala David mitiya, Yowab ma ŋolla vi sojen kaw mitiya, nam di tam Farawn ala: Hinan hot hay nagata vanu.

²²Farawn di talamu: Va ma kiɗaŋ katan tani mi mige a naŋ min hot hay nagata vaŋu? Nam hot dit ala ɦawa'a, may hinan tuɗa.

²³Lawn fok sa ma gawta mara'a kulo kay Salomon lo, Reson goora vi Eliyada, nam piris hay nagata vi mulamna Hadadezer mul ma Sobana pa.

²⁴Nam tok sumun talamu, nam mi ma tuni voksina; kayni hay li ma David vat sumuna vi mulamna. Nisi kal hay Damas, ɗawni nisi lakay ziya. Nisi ti mulda hay Damas.

²⁵Hay buur ma irita vi Salomon kaf kayni, nam ka gaw hiɗi sa Israyella, Hadad kaw nam nala, nam min sa Israyel noŋɗi. Nam ti mulda kay Siriya.

²⁶Yerobowam kaw, nam mi sa ma sunda vi Salomon, may nam fok kulo'o kat Salomon. Yerobowam kayni mi goora vi Nebat sa ma Efratana hay Sereda, sulum ti cata duhulta, semda va' ala Seruwa.

²⁷Nam fok kulo kat Salomon kayni hay li ma Salomon ka in Millo, ir gulmunna vi hoyok-ziyna vi David ma ka muni goyna nam ka zlaɓam iram kulo'o.

²⁸Yerobowam kayni nam dono'o, dikam manjufu kaw; hay li ma Salomon wi goor ma joriyon kayni li lopna, nam tunum kay ŋom sum sa li lopna sa hay jafna vi Yosef kafe.

²⁹Hay na'ta kayni, Yerobowam kal goy hay Yerusalem pa, hay hagata nam ŋaf hiɗi sa ma jobta-Lawna Akiya ma Silona, nam ka cuki hiɗi sligar ma wuliya, nisi fi tuwsi goy hay fulda visi ma'.

³⁰Akiya yaw sligar wulina ma ka cuki tam Yerobowamna, nam jetem goy ne' ne' ir doogo yam ma',

³¹nam di tam Yerobowam: Yawaŋ ma doogona! Kay Ma-Vatɗina Lawna vi Israyel ka di ala: Wulini nan min sli mulda goy hay ɓam sa Salomon, nan min vula' mi jaf ma doogona.

³²Nan ma hin jaf mara kepe, kuɗ sa ma sunda vanu David, kuɗ Yerusalem kaw, hoyok-ziyna ma nan vilekemu jar jafna vi Israyel kafe.

³³Kayni kay mige nisi noyan goyo, nisi girif gaa vok Astarte*, lawayna vi sa Sidonna, vok Kemos*, lawayna vi Mowab, vok Milkom*, lawayna vi gurona vi Amon, kay nisi min tuɗ hay hagata vanɗi, min li sle ma ɗigera vok iranɗi, li kuɗ gatta hiɗi dita vanu ki David bum Salomon nalaɗi kaw.

³⁴May nan as kay yaw mulda goy hay ɓalam kafɗi, kay nan min ŋomom mulu hay buura vi irita valam kafe, kuɗ David ma sunda vanu ma nan vilekemna, kay nam ma li kuɗ gatta hiɗi vun-ma-gatna van kafe.

³⁵May nan min sli mulda goy hay ɓam goora valamu, nan min vulaŋ jafn doogo.

³⁶Nan ma hin jaf kep mi goora valamu, kay fitilla vi David ma sunda vanu ma li doy dok-dok vok iranu hay Yerusalem, hoyok-ziyn ma nan vilekemu kay yi semda van hayamu.

³⁷Nan min vaŋu, tunaŋ mulu kay liyn ma dikaŋ minimna kafe, naŋ ma li mi mulla vi sa Israyella.

³⁸La naŋ hum kuɗ sle ma nan daŋ kalam kafna, la naŋ tuɗ hay hagata vanu, la naŋ li sle ma ɗigere vok iranu, la naŋ hum kuɗ gatta hiɗi dita vanu, ki David ma sunda vanu li nala, nan ɗawn ma li hiɗi naŋu, nan ma cukaŋ ziy ma ge'ɗina, ki nan in ziy kepe mi David nala, nan ma vulaŋ sa Israyella (hay ɓaŋu)

³⁹Jafna vi David nan ma hotsi yisi gaa'a, may kayni kay dok-dokɗi.

⁴⁰Salomon gar hagata kay ci Yerobowam goyo, nala Yerobowam fok kulo'o, nam piri hay Egipte kat Siksak, mul ma Egiptena; nam musi ɗawni hay Egipte ta-ta Salomon mit tuwa.

⁴¹Caw lopna vi Salomon ma hinina, sle ma nam lum kafna, yalla valamu, kayni ka ɗoy hay ɗerwelda vi lopna vi Salomon.

⁴²Salomon ti mulda ir busat dok-fiɗi hay Yerusalem hiɗi Israyel kafe.

⁴³Bugol kayni Salomon mitiya, nisi pum hay hoyok-ziyna vi Bulum David. Robowam goora valamu ti mulda hay baŋalamu.