Read Masana 1 MULIYANA 12 Bible Online

1 MULIYANA 12 - Masana bible

1 MULIYANA 12

¹Robowam kali hay Sikem, kay sum sa Israyel kaf coy hay Sikem kay tunum mulu.

²Hay li ma Yerobowam goora vi Nebat hum labara namna, nam ay hay Egipte tuwa, kay nam ka piri goy gine ɗawni vok ir mulla Salomon, nam ka musi ɗawni hay Egipte.

³Nisi gi sunda kay yumiya: Nala Yerobowam hiɗi vokŋa vi sa Israyel kaf co kat Robowam, nisi ka dum ala:

⁴Buŋ tun jak ma nek kuma'a, lop ma zalla hiɗi jak ma nekŋa ma buŋ tunum kuma'na naŋ ma yawam goy kuma'a, nala numa ma sunaŋu.

⁵Nam disiya: Tuɗgiya, hotgiyay tanu hay buur ɦidi. Nala nisi kaliya.

⁶Mulla job tam sa maariyana sa ays mus hiɗi bulum Salomon hay li ma nam ka iri tuwana: Nam disiya, nigi min ɗekan yalla mige kay hot dit tam sumun kayni?

⁷Nisi ka dum ala: Vaydi la naŋ min sun sum nisin kayni, la naŋ min humsiya, la naŋ hotsi dit hiɗi yoboy ma ŋaana, nala nisi ma lak ɗawni si sa sunda vaŋ dok-doko.

⁸May Robowam hin gatta vi sum sa maariyan goyo, nam kali job sum sa joriyon sa wul hiɗi namna, sa ka lakay hiɗi namna.

⁹Nam di tisiya: Sumun kayni joban ala: Jak ma nekŋa ma bun tunum kisina nan ma yawam goyo. Yal ma nigi min ɗek tanu kay nan ma di tisiya mi yal mige?

¹⁰Sumun sa wul hiɗi namna ka dumu: Nisi di taŋ ala buŋ tun jak ma nekŋ kisiya, may naŋ muɗum hefteŋe kuma! May naŋ ma disi ala: Cita-ɓan ta goorta na' ŋolo suw fur bunu.

¹¹Wulin kayni bun tun jak ma nekŋ kigiya, nan hayɗini ma muɗum nek suwa, bun watgi hiɗi libetna, may nan hayɗin ma watgi hiɗi ɦurduwna.

¹²Yerobowam hiɗi sum segen kaf co tam Robowam hay buurta ɦidita, kuɗ va ma mulla di ala hotgiyay tanu hay buur ɦidi.

¹³Mulla ka hotsi dit hiɗi delem ɗeŋe, gatta ta sum sa maariyan dumtita nam hina' goyo,

¹⁴nam lawsi hiɗi gatta ta sum sa joriyon dumtita. Nam ka disi ala: Bun tun jak ma nekŋ kigiya, may nan hayɗin ma muɗum nek suwa, bun watgi hiɗi libetna, may nan hayɗin ma watgi hiɗi ɦurduwna.

¹⁵Ki kayn nala mulla min humsi noŋɗi, kay lawt kayni hina' li'e mi Ma-Vatɗina, kay hob vun yoboyn ma Akiya dumu hay Silo, mi Yerobowam goora vi Nebat.[8]

¹⁶Hay li ma sum sa Israyel kaf wi ala mulla may humsiɗi, nisi di tam mulla: Gal vuma ka jar jafna vi David su? Voco vuma may jar gurona vi Isayɗi, mergi hay guɗukŋa vigiya, nigi sa Israyella, wulin kayni nigi jafna vi David, ŋomgi tuwgi kay tuwgi yo. Ki kayn nala sa Israyella kaf kali hay guɗukŋa visiya visiya.

¹⁷Robowam ti mulda kayni kay gurona vi Israyel sa hini hay hoyok-ziy ma ŋulona vi Yuda tuta.

¹⁸Nala mulla gi Adoram ma tuni kay yaw taara, may sum sa Israyel kaf gum hiɗi goorhoyona, nala nam mitiya. Mulla Robowam li tuwam koloyo kay jik kulo hay keke-ma-duura kay pir hay Yerusalem.

¹⁹Ki kayn nala, sum sa Israyella ja jarsi goy hiɗi David ta-ta vaydi.

²⁰Sum sa Israyella kaf hum ala Yerobowam hotiyawa, nisi gi sunda kalamu kay yumay jarsi hay tokŋa, nisi tunum mulu kay sa Israyel kafe. Jafna vi Yuda kayni mi ma hin kuɗ sumuna vi Davidna tuta.

²¹Hay li ma Robowam co hay Yerusalem, nam tok jafna vi Yuda hiɗi jafna vi Benyamin kafe, sum sa wi duura birim kis hiɗi diram dok-glafandi, kay nisi ma dur sum sa Israyella a hotsiyay hay gaŋeraŋa valam nam Robowam goora vi Salomon.

²²May Ma-Vatɗina di yoboyn tam Semayeya sana vi Lawna ala:

²³Naŋ ma di tam Robowam goora vi Salomon, mulla vi Yuda, ziyna vi Yuda hiɗi Benyamin kaf, hiɗi sum segen kaf:

²⁴Naŋ ma disi ala: Nigi ma tu'ɗi, guro-biyogina sa gurona vi Israyel nigi ma dursiɗi, hin gige gige jargiya hot hay ziyna valamu valamu, kay van kayni hinim co'o mi nanu. Nisi hum kuɗ yoboyna vi Ma-Vatɗina, nisi hotiya, kuɗ dita vi Ma-Vatɗina may.

²⁵Yerobowam in Sikem kulo kay hiɗiyta vi Efrayim, nam musi haya. Bugolda nam kali goyo, in Penuwel lo.

²⁶Yerobowam di hay dikam kalaf ala: Wulin kayni mulda ɗawni ma hot hay ɓam jafna vi David.

²⁷La sumun kayni tuɗ Yerusalem kay li ɗifin hay ziyna vi Ma-Vatɗina, diksi ɗawn ma muɗ min mulsina Robowam, mulla vi Yuda, nisi ɗawn ma can goyo, kay hot kuɗ Robowam mulla vi Yuda.

²⁸Bugol nam job tuwam jobna, mulla kot guro-luway ma ora ma'; nam di tam sumuna: Nigi ka tuɗ jew dok-dok kayn kulo Yerusalem, nigi sa Israyella. May wulin kayni, Lawna vigi ma kalgiyay goy hay nagat Egipte pan zawni.

²⁹Goor-put ma kepna nam colom hay Betel, hena nam colom hay Dan may.

³⁰Kayni muɗi mi va ma kalsi hay sulukŋa. Sumun ka tuɗ vok goor-put ma kepna ta-ta hay Dan.

³¹Yerobowam kot ziyn kep kulo hay liy ma ɗiŋiriŋŋa, nam tun muliyan-sa-ɗifinna, sa yaway kuɗ jaf-sumun kafe, sa may hay jafna vi Levitɗina.

³²Yerobowam tun yuldeta hay til ma glafandina, hay buurta doogo yam vaslta vi tilla, ki yuldeta ta ka li hay Yuda nala, nam jik kulo hay giwin-ma-ɗifinna ma nam kotom hay Betel kay sumuna ma li ɗifin tam guro-luwayna ma nam kotomna. Nam lak muliyan-sa-ɗifinna hay Betel kat liyn ma ɗiŋiriŋŋa ma nam kotomna.

³³Nam jik kulo kay giwin-ma-ɗifinna ma nam kotom hay Betella, hay buurta doogo yam vaslta vi til ma glafandina, kayni mi til ma nam vilekem kuɗ minda valamu. Nam li yuldeta kay gurona vi Israyel, nam jik kulo kay giwin-ma-ɗifinna kay ŋal urdina.