Read Masana 1 MULIYANA 13 Bible Online

1 MULIYANA 13 - Masana bible

1 MULIYANA 13

¹Sana vi Lawn kepe fokay hay Yuda, nam ma hay Betel, nam ka hiɗi yoboyna vi Lawna hay vunamu. Hay na'ta Yerobowam ka coli kulo kay giwin-ma-ɗifinna zaw kay ŋal urdina.

²Nam ka di dita vi Ma-Vatɗina kat giwin-ma-ɗifinna ala: Giwin-ma-ɗifinna, giwin-ma-ɗifinna, humaŋ dita vi Ma-Vatɗina: Goor kep ma vuɗ hay jafna vi David; ma yum semda valam ala Yosiyas, muliyan-sa-ɗifinna sa ka ŋal urdin kulo kaŋŋa, nam ma lisi ɗifin kulo kaŋu. Ma ŋalam kulo kaŋ ɗawni mi zok sumuna.

³Hay buur na'ta nam di ala ɗekka kep ma li'e: Hiɗi ɗek na'ta nisi ma wi ala di kayn mi Ma-Vatɗina. Ɗek na'ta kayn ala giwin-ma-ɗifinna ma mun goy wilik', butuw-ku ma kalamna ma yak goy gaa'a.

⁴Hay li ma mulla hum yoboyna ma sana vi Lawn dum kat giwin-ma-ɗifinna hay Betel humna, nam meɗ ɓalam kulo kay giwin-ma-ɗifinna, ka di ala: nigi ma vumu. Nala ɓam Yerobowam ta nam meɗa' goyta muɗ keŋkeleŋe, nam as a hota'ay talam loɗi.

⁵Giwin-ma-ɗifinna mun goy wilik', butuw ma kalamna yak goy gaa'a, kuɗ ɗekka ta sana vi Lawn di'e hiɗi yoboyna vi Ma-Vatɗina.

⁶Ki kayn nala mulla sli ditiya di tam sana vi Lawna: Jobaŋ Ma-Vatɗina Lawna vaŋu, siɗawaŋ kanu, kay nan ma hot ɓan tanu. Sana vi Lawn siɗaw Ma-Vatɗina, mulla hot ɓalam talamu, ɓalam hoti ki jew nala may.

⁷Mulla di tam sana vi Lawna: Kalaŋay hiɗi nan vo hay ziyna, taŋ fu neɗe, nan ma vulaŋ va'a.

⁸Sana vi Lawna di tam mulla: La naŋ vulan galla vi ziyna vaŋ kaw, nan as kalis kalaf hiɗi naŋɗi, nan as ti fu noŋɗi, nan as ci niy hay liyn tan noŋɗi kaw;

⁹kay dita kayni ay hini tan ala: Kuɗ yoboyna vi Ma-Vatɗina, naŋ ma ti fu noŋɗi, ci niy noŋɗi kaw, hagata ta naŋ sla'ayta, hay hotta vaŋu naŋ as jik haya' noŋɗi kaw.

¹⁰Hay hotta nam sla' ti hagat tara'a, hagat ta nam sla'ay jewe kay co hay Betel nam min jik haya' loɗi.

¹¹Sa ma jobta mara kep, ma muɗi maari, nam ka li ziy hay Betel. Gurona valamu co talamu, nisi vum labara kay slen ma sana vi Lawna lum hay Betel hay buur namna, yoboyn ma nam dum mi mulla kaw. Hay li ma nisi vi labara mi busi vina,

¹²busi di tisiya: Nam jik hay hagata tarige? Gurona valamu wi hagata ta nam jik haya'ta.

¹³Nala nam di tam gurona valamu: Ganangi kurona, nala nisi ganam kurona, nam ɓe kulo kalamu.

¹⁴Nam kal kuɗ sana vi Lawna, nam fum musi gaa kuɗ gu-terebintena*. Nam ka jobomu: Naŋ damni mi sana vi Lawna ma may hay Yuda pan su? Nam hot dit ala nan mi namu.

¹⁵Nam ka dum ala tapaŋay kuɗan vo'o, kay naŋ ma ti fu neeɗa.

¹⁶May nam hot dita: Nan as hot hiɗi naŋɗi, kal vo vaŋɗi lay, nan as ti fuɗi, nan as ci niy hiɗi naŋu hay liyn ɗawnɗi kaw;

¹⁷kay dit diy tanu hiɗi yoboyna vi Ma-Vatɗin ala: Naŋ as ti fu noŋɗi, ci niy noŋɗi kaw, hagat ta naŋ jikay hayta, hay hotta vaŋu naŋ ma sli haya' noŋɗi kaw.

¹⁸Nam dumu: Nan kaw, nan mi sa ma jobta-Lawna ki naŋ nala, sunda-wuralawna mara kep di tanu hiɗi dita vi Ma-Vatɗina ala: «Hotom kuɗaŋ vo hay ziyna vaŋu, vulum ti'e, vulum niy ma ci'e kaw». Dolay nam kaamti kayn ti sinda.

¹⁹Sana vi Lawn hot kuɗumu, nam ti funa, ci niyna kaw vo hay ziyna vi niramna.

²⁰Hay li ma nam ka ti funa, Ma-Vatɗin di yoboyn talamu hay vun sa ma jobta ma maramna.

²¹Nam ka siwel tam sa ma jobta ma ay hay Yuda pana ala: Humaŋ va ma Ma-Vatɗin di'e: Kay naŋ ŋel vun Ma-Vatɗina, kay gatta ta Ma-Vatɗina Lawna vaŋ vulaŋgita naŋ min hum kuɗa'ɗi,

²²kay naŋ hot bugolaŋu, naŋ ti funa, ci niyn kaw hay liyn ma nam di taŋ ala: Naŋ ti fuɗi, ci niyɗi kaw, tuwna vaŋu ma kal jar tuwna vi sumiyaŋɗi.

²³Hay li ma sa ma jobta namna ti fun ti, ci niyn ci kaw, niramna ganam kurona.

²⁴Sana vi Lawna kaliya. Hay hagata nam tupa dig zlona, zlon cum mati. Tuwna valam ka meɗay goy hay hagat waŋ may; kuron coli talam zaw lay, zlon coli talam zaw lay.

²⁵Hay li ma sumun ka cap hay hagata, nisi wi tuwna valam ka buri gaa hay hagat waŋ, zlon ka coli talam zaw may. Hay li ma nisi co kulo hay hoyok-ziyna ma sa ma jobta ma muɗi maara ka hayna, nisi vi labara namna mi sumuna.

²⁶Hay li ma sa ma jobta ma muɗi maara hum labara namna, nam di'e: Kayni mi sana vi Lawna ma ŋel dita vi Ma-Vatɗina, nala Ma-Vatɗina vulumawa mi zlona, zlon jetemawa goyo, cumawa goyo may, kuɗ dita ta Ma-Vatɗin da'ta.

²⁷Bugol kayni nam di tam gurona valamu: Ganangi kurona. Nisi ganam kurona.

²⁸Nam kaliya, tuwna vi sana vi Lawna nam fum meɗi goy hay hagat waŋi, zlona hiɗi kurona ka lakay talam lak' may. Zlon may mut sanɗi lay, mut kuronɗi lay.

²⁹Sa ma jobta sli tuwna vi sana vi Lawn kulo'o, burum kulo kay kurona, hotom vo'o, sa ma jobta ma muɗi maara kal kulo hay hoyok-ziyna kay tiyimu, kay pumu kaw.

³⁰Nisi bur tuwna valam hay zulla, nisi ka tiy kalam ala: Yaya ɓasunna!

³¹Hay li ma nam pum pina, nam ka di tam gurona valam ala: Hay li ma nan mit ɗawni, nigi ma pan hay zulda ta sana vi Lawna ay piy haya'ta, nigi ma lakan zokan tam zokŋa valamu.

³²Kay yoboyn ma Ma-Vatɗin tunum vunamu, kay nam ma siwelem kat Betel hiɗi ziy ma ini kulo hay liy ma ɗiŋiriŋŋa kaf, ma ka hay hoyok-ziyna vi Samariya kaw, kay yoboy namna vunam ma hob kulo'o.

³³Bugol slen kayni, Yerobowam min hin hagata valam ta joota goyɗi, nam yaw muliyan-sa-ɗifinna sara lo, yawsi jar jaf-sumun kaf. La san gigekaw mina, nam tunum mul-ma-ɗifin de'.

³⁴Kayni muɗi mi va ma mar joota kay ziyna vi Yerobowam, kuɗ kayni ziy namna vatay goyo, hosay goy hay nagat noŋo.