Read Masana 1 MULIYANA 14 Bible Online

1 MULIYANA 14 - Masana bible

1 MULIYANA 14

¹Hay na'ta kayni, Abiya, goora vi Yerobowam li moyo.

²Nala Yerobowam di tam cata valamu: Nan siɗawagu, fokag kulo'o, muɗak jifagu, kay a sa ma wi ala nak ti cata Yerobowamiɗi, tuɗag hay Silo.

³Yawag fu-pown hay ɓag doogo, hambulla hiɗi gasas ta hiɗi yumna kaw, kalag kalaf valamu, nam ma dag kay va ma min li tam goora.

⁴Cata vi Yerobowam li ki kayni nala; na' fokay kulo'o, kali hay Silo, kal hay ziyna vi Akiya, Akiya iram muɗi wi noŋɗi, iram hi'iliya kay nam muɗi maari.

⁵Ma-Vatɗina di goy jew tam Akiya ala: Cata vi Yerobowam ka co jobaŋu kay goora va'a, kay nam ka moyo. Kayni mi law ma naŋ ma da'tina. Hay li ma na' co ɗawni, na' ma muɗ jifa' valamu.

⁶Hay li ma Akiya huma' se' ma ka dabna, hay li ma na' jik kay vun-ziyda, nam di'e: Kalagay kalafi, cata vi Yerobowam; nak min muɗ jifagu kay mige? Liyn hini tanu kay dag law ma nekŋa.

⁷Tuɗagu, dag tam Yerobowam ala: Humaŋ va ma Ma-Vatɗina Lawna vi Israyel di'e: Nan vulaŋ ŋolda jar jaf-sumuna, nan tunaŋ ŋolo kay sumuna vanu sa Israyella,

⁸Nan sli mulda ay hay jafna vi David pa, nan vulaŋga. Naŋ may li ki sa ma sunda vanu David naɗi, nam hum kuɗ vun-ma-gatna vanu, nam poy kuɗanu hiɗi dikam kafe, nam lum kayni mi sle ma kiran ŋaana tuta.

⁹Naŋ li joo suw nisi kaf sa ay jewaŋu, naŋ kali kot lawayn mara'a, hiɗi va ma sli tuw sana ma yoray hiɗi kawayna kay ɓulakan dikanu, naŋ noyanawa goyo.

¹⁰Humaŋu, kuɗ na'ta kayni nan min hin joot co'o kay ziyna vi Yerobowam; sum sa ir vi Yerobowam kaf nan min vatsi goyo, sa ma gorvona hiɗi sa ma vuɗina kaw hay Israyel, nan ma tok ziyna vi Yerobowam goyo ki san tok tugosn goyo nala, ta-ta nam ma vat goy kafe.

¹¹Sa ma hay jafna vi Yerobowam ma mitawa kulo hay hoyok-ziyna ni, ma mutum ɗawn mi durnaya, nam ma mit goy hay fulda ɗawni, ma tum ɗawn mi layayn ma dukalawna. Kay Ma-Vatɗin di nala.

¹²May naku, fokag kulo'o, tuɗag hay ziyna vagu hay li ma nak co kulo hay hoyok-ziyn ɗawni, goor ma mit may.

¹³Sum sa Israyel kaf ma tiyimu, ma pumu may; kay hay ziyna vi Yerobowam kaf kayni, ma pum gaa hay zulda ɗawn mi nam kepe, kay hay ziyna vi Yerobowam kayni, nam kep tuta mi ma va ŋaa'a ka hay dikamu vok Ma-Vatɗina Lawna vi Israyel.

¹⁴Ma-Vatɗina ma tun mul mara kay Israyella, nam ma vat jafna vi Yerobowam goyo hay buur namna. Kayni mi va ma ka li wulini de' ɗisu?

¹⁵Ma-Vatɗina ma ci sa Israyella, nisi ma muɗ ki cerewna ma niyn geɗemna nala; nam ma yaw sa Israyella goy hay nagata ta ŋaata na'ta ta nam vul mi sumaysiya, nam ma mersi goyo hay gal hena vi niy-lumna, kay nisi kot lawayn ma waana kay ɓulak dik Ma-Vatɗina.

¹⁶Nam ma vul sa Israyel goyo kuɗ suluk ma Yerobowam lumna, hiɗi suluk ma nam kal sa Israyel hayamna.

¹⁷Cata vi Yerobowam fok kulo'o, na' kaliya. Na' co hay Sirsa; hay li ma na' co hay vun-galan kayni, goor mit de'.

¹⁸Nisi pumu, sum sa Israyel kaf tiyimu, kuɗ yoboy ma Ma-Vatɗin dum hiɗi vun sa ma jobta valamu Akiya.

¹⁹Caw lopna vi Yerobowam ma hinina, nanige nam li duura, nanige nam ti mulda, kayni ka ɗoy hay ɗerwelda vi Labara vi muliyana vi Israyel.

²⁰Yerobowam ti mulda busat dok-ma' yam ma', bugolda nam mita. Ti mulda bugolom kayni mi Nadab goora valamu.

²¹Robowam goora vi Salomon ti mulda kay Yuda. Hay li ma nam tun mul kayni, busata valam dok-fiɗi yam kep. Nam ti mulda busat doogo yam siɗiya hay Yerusalem, hoyok-ziyn ma Ma-Vatɗin vilekem jar jafna vi Israyel kafe kay tun semda valam haya. Sulum semda va' ala Naama, na' ti ta Amonta.

²²Sum sa Yudana li va ma joo kir Ma-Vatɗina; hiɗi suluk ma nisi lumna, nisi muɗ dik Ma-Vatɗin tisi hunay ŋolo suw sumaysiya.

²³Nisi kaw, nisi kot liyn ma girifna, hiɗi slen ma ceɗayna hiɗi lawayn waana kulo kay yam hiɗiyn kaf, gaa kuɗ gu ma goɗin kaf kaw.

²⁴Muɗ kayni, sum sa li tuwsi viyuwna ka hay nagat noŋo. Nisi tun caw li sle ma liwisna vi jaf-sumuna sa Ma-Vatɗina digiɗsi voksina.

²⁵Hay busata vaslta vi Robowam, Siksak mulla vi Egipte co'o, nam mok Yerusalem.

²⁶Nam yaw slen ma kalaf hay ziyna vi Ma-Vatɗina hiɗi ma kalaf hay ziyna vi mulla. Nam yawam kafe. Maray ma ora ma mulla Salomon kotomisna nam yawam kafe.

²⁷Hay baŋalam kayni mulla Robowam kot maray ma hiɗi wayna, nam vulum hay ɓam sa ŋulona vi sojena sa ka ŋom vun-galana vi mulla.

²⁸Hay buura kaf ma mulla tuɗ hay ziyna vi Ma-Vatɗina, sa ŋomda ziy marayna, bugolda nisi kalam kalaf hay ziyna vi sa ŋomda.

²⁹Caw lopna vi Robowam ma hinina, slen ma nam lum kafna, kayni ka ɗoy hay ɗerwella vi Labar-Ma-Liyna muliyana vi Yuda.

³⁰Duura li dok-dok jar Robowam hiɗi Yerobowam.

³¹Robowam mitiya, nisi pum tam sumiyamu hay hoyok-ziyna vi David. Sulum ya' ala Naama. Na'a ti goot ta Amonta. Abiyam goora valamu ti mulda hay baŋalamu.