Read Masana 1 MULIYANA 16 Bible Online

1 MULIYANA 16 - Masana bible

1 MULIYANA 16

¹Ma-Vatɗina di yoboyn tam Yehu goora vi Hananiya, kay nam ma di tam Bayeska ala:

²Nan yawaŋay goy hay butuwn pa, nan tunaŋ ma ŋolla kay sumuna vanu sa Israyella; may kay naŋ tuɗ hay baŋal Yerobowam, naŋ kal sumuna van sa Israyella hay sulukŋa, kay ɓulakan dikanu hiɗi suluk ma nisi lumna,

³wulin kayni nan min ɦasaŋ goy hay ziyna vaŋu, nan min muɗ ziyna vaŋ ŋray ca ki ziyna vi Yerobowam goora vi Nebat nala.

⁴Sa ma hay jafna vi Bayeska ma mit vo hay hoyok-ziyn ɗawni, durnayn ma mutumu, sa ma hay jafna valamu ma mit goy hay fulda ɗawni, layayn ma dukalawna ma tumu may.

⁵Caw lopna vi Bayeska ma hinina, slen ma nam lum kafna, kursulita valamu kaw, kayni ka ɗoy hay ɗerwelda vi labar ma Liyna vi muliyana vi Israyel.

⁶Bayeska mitiya, nisi pum hay Tirsa, goora valamu Ela ti mulda hay baŋalamu.

⁷Ma-Vatɗina ɗek yoboyna valam goy hay vun sa ma jobta Yehu, goora vi Hananiya, kay nam ma law kat Bayeska hiɗi jafna valamu, kuɗ joon kaf ma nisi lum kir Ma-Vatɗina, hay li ma nisi ɓulakam dikamu hiɗi lop ma nisi lumna, hay li ma nisi muɗ tuwsi ŋray ca ki jafna vi Yerobowam nala, kay mige nam ci sum sa hay jafna vi Yerobowam.

⁸Co hay busata dok-ma' yam karkiyata vi Asa mulla vi Yuda kayni, Ela goora vi Bayeska ti mulda kay sa Israyella hay Tirsa. Nam ti mulda ir busat ma'.

⁹Sa ma sunda valam Zimri, ma ŋolla vi galla vi keke-ma-duura, fok kulo kalamu. Ela ay hay Tirsa hay na'ta, nam ka ci'e, ka ɦoy tuwam kaw hay ziyna vi Arsa, ma ŋolla hay ziyna vi mulla hay Tirsa.

¹⁰Zimri kal kalafi, nam calamu, cap cum goy mati, kayn hay busata dok-ma' yam siɗiyata vi Asa mulla vi Yuda, nam ti mulda hay baŋalamu may.

¹¹Hay li ma nam muɗi mulu, musawa kay zlamda-mulda valamu kaw, sum sa vo hay ziyna vi Bayeska nam cisi goy kafe, sumuna vi Bayeska la mi sugolomu lebo la mi banamu kaw nam may hin mara goy kep noŋɗi.

¹²Zimri ɓulak ziyna vi Bayeska goy kafe, kuɗ yoboy ma Ma-Vatɗina dum kat Bayeska hiɗi del Yehu ma jobta-Lawna,

¹³kuɗ sulukŋa kaf ma Bayeska hiɗi goora valam Ela lumu, ma nisi kal sum sa Israyella hayamna, kay nisi bulak dik Ma-Vatɗina Lawna vi Israyel hiɗi lawayn ma waana visiya.

¹⁴Caw lopna vi Ela ma hinina, sle ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Israyel.

¹⁵Co hay busata dok-ma' yam siɗiyata vi Asa mulla vi Yuda kayni, Zimri ti mulda ir buur siɗiya hay Tirsa. Gibbeton nagata vi sum sa Filistin ay ŋuyi kisiya.

¹⁶Sum sa ŋuy nagatna hum labara ala: Zimri fok lawtawa, nam ci mullawa noŋo. Hay buur na'ta kayni nisi tun Omri kisi mulu hay kaŋŋa. Namu mi ma ŋolla vi sojena visiya.

¹⁷Omri hiɗi sum sa kuɗumna kaf yawis hay Gibbeton pa, nisi ŋuy Tirsa.

¹⁸Hay li ma Zimri wi ala hoyok-ziyn sliya, nam kal mus goy hay ziyna vi mulla, nam ŋal ziyna vi mulla gaa kalamu.

¹⁹Ki kayn nala nam mita, kuɗ joo ma nam lumna hay li ma nam li slen ma kir Lawn joo'o, kay nam tuɗ hay baŋal Yerobowam, kal tuwam hay suluk ma Yerobowam lumna hay li ma nam kal sum sa Israyel hay sulukŋa.

²⁰Caw lopna vi Zimri ma hinina, law ma nam fokomna, kayni ka ɗoy hay ɗerwelda vi labara ma Liyna vi muliyana vi Israyel.

²¹Hay na'ta kayni sumun irsi ɓuraw gaa ma', gal hena min tunum mul mi Tibni goora vi Ginat, gal hena minim mi Omri may.

²²Sa min Omrina donota visi suw kay sa min Tibni goora vi Ginatna. Tibni mita, Omri ti mulda may.

²³Co hay busata dok-ɦidi yam kepta vi Asa mulla vi Yuda kayni, Omri ti mul kay sa Israyella. Nam ti mulda ir busat doogo yam ma'. Bugol nam ti mul ir busat karkiya hay Tirsa tina,

²⁴nam gus hiɗiyta vi Samariya hay ɓam Semer ir gurjuta talente ma'; nam in ziyn kulo kay hiɗiyna, hoyok-ziy ma nam inimna nam tunum selem ala Samariya, ŋray hiɗi sem Semer mul hiɗiyta.

²⁵Omri li sle ma joo'o kir Ma-Vatɗina, nam li joo suw nisi sa ay jewemna kafe.

²⁶Nam tuɗ hay hagata vi Yerobowam goora vi Nebat, kal tuwam hay suluk ma Yerobowam kal gurona vi Israyel hayamna. Nisi ɓulak dik Ma-Vatɗin Lawna hiɗi lawayn ma waana visiya.

²⁷Caw lopna vi Omri ma hinina, slen ma nam lumna, kursulita valamu, kayni ka ɗoy hay ɗerwelda vi Labara ma Liyna vi muliyana vi Israyel.

²⁸Omri mitiya, nisi pum hay Samariya. Akab goora valamu ti mulda hay baŋalamu may.

²⁹Akab goora vi Omri ti mulda hay Israyel, kayni hay busata dok-ɦidi yam galfandita vi Asa, mulla vi Yuda. Akab goora vi Omri ti mulda ir busat dok-ma' yam ma' kay sa Israyella hay Samariya.

³⁰Akab goora vi Omri li slen ma joo kir Ma-Vatɗina, suw nisi sa ay jewemna kafe.

³¹Kay li suluk ki Yerobowam goora vi Nebat nala kayni kiram kiɗay ɦawa, nam kaliya sli Yesabel ca'a, na'a ti goota vi Etbaal mul ma Sidonna, nam kali sun Baal, girif gaa vokomu kaw.

³²Nam kot giwin-ma-ɗifinna mi Baal hay ziyna vi Baal ma nam kotom hay Samariyana,

³³nam ceɗ lawayn ma waana Astarte*. Akab li joo suw muliyana vi Israyel sa ay jewemna lo, nam ɓulak dik Ma-Vatɗina, Lawna vi Israyel.

³⁴Hay liy namna kayni, Hiyel ma Betella in Yeriko; nam va' baga' gaa kayni, hiɗi busuw goora valam ma ŋolla Abiram jak vun-galana hiɗi busuw goora valam ma joriyona Segub. Kuɗ yoboy ma Ma-Vatɗin dum hiɗi vun Yosuwa goora vi Nun.[10]