Read Masana 1 MULIYANA 19 Bible Online

1 MULIYANA 19 - Masana bible

1 MULIYANA 19

¹Akab mar labara ma Eliyas lumna tam Yesabel kafe, ir nanige nam ci sa jobta goyo hiɗi kew-gaferaŋa.

²Yesabel gi sunda tam Eliyas ala: Jifini hay fatta ki kayn nala, la nan caŋ goyo ki naŋ ci sa jobta kayn naɗi, lawayn ma lan joo'o hiɗi diksi noŋ kafe.

³Hay li ma Eliyas wi lawt ki kayn nala, nam fokay kulo'o kaliya, kay suɗ irita valamu. Nam co hay Ber-Seba vi Yuda, nam hin sa ma sunda valam haya.

⁴Nam kay tuwam kali goy hay fulda, nam busa tuɗ he', ɗawni nam mus gaa kuɗ gu-malanjana, nam job mitta, nam di'e: Wulin kayn asawa yo, Ma-Vatɗina, slaŋ ciwta vanu, kay nan may ŋaa'a suw sumiyanɗi.

⁵Nam bur gaa kuɗ gu-malanjana cab bur sene. Duw na kayni, sunda-wuralawn jomu, ka dum ala: Fokaŋ kulo'o, taŋu.

⁶Nam ɗuw na kayni hambul ma cufum hay hiɗiy ma giy kuna ka tuni kulo kalam ta', genda niyna ka ta kaw. Nam ti'e ci'e, bugolda hot bur gaa'a may.

⁷Sunda-wuralawna vi Ma-Vatɗina co talamu hay sem ma ma'na, jomu ka dum ala: Fokaŋ kulo'o, taŋu, kay hagat ta vokaŋga ka gine'e.

⁸Nam fokay kulo'o, ti'e ci'e kaw; hiɗi donota ta nam fa' kuɗ tin namna, nam tuɗ ir buur dok-fiɗi ta-ta co tam hiɗiyta vi Lawna, hay Horeb.

⁹Hay ɗawni, nam kal hay zul hiɗiyna, nam cap bur tos'. Bugol kayni Ma-Vatɗina ka di yoboyn talam ala naŋ lum tan kayn mi mige Eliyas?

¹⁰Nam hot dita: Nan ka li ciwerta ŋolo kay Ma-Vatɗina vi vok-ma-duura; kay gurona vi Israyel yisi jok bonota vaŋawa goyo, giwin-ma-ɗifinna vaŋu nisi ɦomawa gaa'a, sa jobta vaŋu nisi cisiyawa goyo hiɗi kew-gaferaŋa, hini wulin kayn mi nan kepe, nisi ka gar a can goyo kaw.

¹¹Ma-Vatɗin di'e: Kalaŋay goyo, colaŋ goy kay hiɗiyna vok ir Ma-Vatɗina. Duw na kayni, Ma-Vatɗin jika. Vok Ma-Vatɗin kayni, simeɗn ma ŋolo ma dono'o biwa, nam jet hiɗiyn goyo, munum goyo kaw, bugol simeɗn kayni, wiira vi nagat li'e: Ma-Vatɗin may jar nagat ma wiiraɗi.

¹²Bugol wiira vi nagat kayni, kuta, Ma-Vatɗin may hay kutɗi, bugol kut kayni, mi suwana ma lim-limna, ma ir hefteŋe kaw.

¹³Hay li ma Eliyas hum kayni, nam kusuɓ iram hiɗi sligara, nam kali goyo, col goy vun zul hiɗiyna. Duw na kayni, del mara ka di talam ala: Naŋ lum tan kayn mi mige Eliyas?

¹⁴Nam hot dita: Nan ka li ciwerta ŋolo kay Ma-Vatɗina Lawna vi vok-ma-duura, kay gurona vi Israyel, noy bonota vaŋawa goyo, giwin-ma-ɗifinna vaŋu nisi ɦomawa gaa'a, sa jobta vaŋu nisi cisiyawa goyo hiɗi kew-gaferaŋa; hini iri mi nan kepe, nisi gar a yaw irita van goyo lo.

¹⁵Ma-Vatɗin dumu: Tuɗaŋu, slaŋ hagata vaŋu hay fulda ta-ta hay Damas, hay li ma naŋ coowa ɗawni, naŋ ma ɦok mul kay Hasayel kay tunum mul kay siriya.

¹⁶Naŋ ma hok mul kay Yehu goora vi Nimsi kay tunum mul kay sa Israyella kaw, naŋ ma ɦok mul kay Elise, goora vi Safat, ma hay Abel-Meholana, kay nam ma vurna mi ma jobta hay baŋalaŋu.

¹⁷Ki kayn nala, la sa hulotawa goy vun kew-gaferaŋa vi Hasayele ni, Yehu ma calam goyo, la sa hulotawa goy vun kew-gaferaŋa vi Yehu ni, Elise ma calam goyo may.

¹⁸May nan ma hin sumun birim siɗiya hay Israyel, nisi kaf sa bay girif gaa vok Baal, sa bay coɗ vun Baal tuwa.

¹⁹Eliyas fokis ɗawn pa, nam fi Elise goora vi Safat, fum zum zaw. Luway ma zumna ka vokom jub-jub' doogo yam ma', nam kay tuwam ka kuɗ luway ma doogo yam ma'na. Eliyas co talamu, nam wat sligara valam kelemu.

²⁰Elise hin luwayna valamu, jaŋ kuɗ Eliyas, ka dum ala: Hinan tuɗ gi deɓ mi bunu hiɗi sunu, bugolda nan ma tapis kuɗaŋu. Eliyas hotom dita: Tuɗaŋu, bugolda hotaŋiya: Kay naŋ ma var kay va ma nan lum taŋu.

²¹Hay li ma nam kal goy gine hiɗi Eliyas kalla, nam yaw luway ma' lum ɗifini, nam zalam sliwam hiɗi gu ma juni kuɗumna, nam vul tin mi sumuna. Bugol kayni nam fok kulo'o tap kuɗ Eliyas, tun caw sunumu.