Read Masana 1 MULIYANA 20 Bible Online

1 MULIYANA 20 - Masana bible

1 MULIYANA 20

¹Ben-Hadad mul ma Siriyan tok sojena valam kafe; muliyan ka kuɗum dok-ɦidi yam ma', kulumayna hiɗi keke-ma-duura kaw. Nam kaliya, ŋuy Samariya, tun caw dura'a.

²Nam cuk sa sunda kulo hoyok-ziyna tam Akab mulla vi Israyel,

³kay dum ala Ben-Hadad ka di ala: Gurjuta hiɗi ora vaŋ kaf nam vanu, boyna vaŋu hiɗi gurona vaŋ sa jifiyna nisi van kaw.

⁴Mulla vi Israyel hot dita: Mulla, mulanna, ki naŋ di nala, nanu hiɗi slena van kaf ir vaŋu.

⁵Sa cuki sunna hoti lo, nisi di'e: Ben-Hadad ka di ala: Nan gi sundis taŋ kayn ala: Naŋ ma vulan gurjuta vaŋu hiɗi ora, boyna vaŋu hiɗi gurona vaŋu kaw.

⁶Grawta hay li ma fatta coowa ki kayn nala, nan ma cuk sa sunda vanis taŋu, nisi ma bigiɗ hay ziyna vaŋu hiɗi ziyna vi sa sunda, slena vaŋ ma ŋaana kaf nisi ma yawamu, kay maranta.

⁷Mulla vi Israyel yi sum sa maariyana vi nagat kafe, nam ka disi ala: Kisgi kigiya, vargi kaw ala san kayni min lay joo'o, kay nam cuk sunday tan kayn kay job boyna vanu hiɗi gurona vanu, gurjuta vanu hiɗi ora vanu, nan may telem kay kaynɗi.

⁸Sum sa maariyana hiɗi sumun kaf ka di tam Akab ala: Humumɗi, vi dita valamɗi.

⁹Nam hot di tam sum sa Ben-Hadad cuksiyayn ala: Nigi ma di tam mulla ma mulanna ala: Slen ma naŋ cuk sa sunda vaŋay sem ma jewna kay joban kalamna nan ma lumu, may va ma naŋ joban kalam wulin kayni nan as lumɗi. Sa cuki sunna kaliya, nisi tuɗum hot-dita.

¹⁰Ben-Hadad cuk sumun kay di tam Akab ala: Lawayn ma ka kitat kan hiɗi diksi kaf, la butuw ma hay Samariyan as hob way-ɓam sum sa kuɗan kafena!

¹¹Mulla vi Israyel hotom dit ala: Sa ma gan tuwam kay tuɗ vun duura as subur tuwam ki sa ma bur marayta valam gaan naɗi[12]

¹²hay na'ta Ben-Hadad ka musi gaa kuɗ guɗukŋa hiɗi muliyan dam' kay ti'e. Hay li ma nam hum labar namna, nam di tam sa sunda valamu: Kotgi tuwgiya. Nala nisi kot tuwsiya kay tuɗ mok hoyok-ziyna.

¹³May ɗuw na kayni, sa ma jobta mara kep co tam Akab mulla vi Israyel, ka dum ala: Ma-Vatɗin ka di ala: Naŋ ka wi vok ma ŋolla namna kayn su? Vaydi nan min vulum hay ɓaŋu, naŋ ma wi ala nanu mi Ma-Vatɗina.

¹⁴Akab di'e: Naŋ vulsi hay ɓan ɗawn hiɗi gaŋeraŋa vi gige? Nam hot dit ala: Ma-Vatɗina ka di ala: Hiɗi gaŋeraŋa vi sa ŋulona sa naŋ laksi goy gef nagata vaŋ kafna. Akab di'e: Fok duur jew ɗawn mi gige? Nam hot dit ala: Mi naŋu.

¹⁵Nala sa sunda vi sa ŋulona sa lakay goy gef nagat kafna Akab ŋaɓsi goyo, nisi co pet kis-ma' hiɗi diram dok-ɦidi yam ma', bugolsi nisiya, nam ŋaɓ sumun kaf goyo, gurona vi Israyel kafe, nisi noŋ pet birim siɗiya.

¹⁶Nisi cuk goyo hay falay-calakka, Ben-Hadad ka ci dolayn gaa kuɗ guɗukŋa, namu hiɗi muliyan sa dok-ɦidi yam ma' sa co gut kuɗumna.

¹⁷Sa sunda vi sa ŋulona valam sa goy gef nagat kafna cukay goy jewe. Ben-Hadad jobsi labarsiya, nisi ka dum ala: Sumun cukay goy hay Samariya pa.

¹⁸Nam di'e: La nisi cukay goy kayn kay gar sle'ta, nigi ma yawsi iriya, la nisi cukay goy kayn kay gar duura, nigi ma yawsiyay iri lay.

¹⁹Hay li ma sa sunda vi sa ŋulo sa kay gef-nagata hiɗi soje sa kuɗsina cukay goy hay hoyok-ziyn pa,

²⁰gige kaw cal sa ma nam tupa digamna, sum sa Siriyan mun jaŋi may. Sum sa Israyella digiɗsiya. Ben-Hadad mulla vi Siriya ɓe kay kulumna pir jaŋi, hiɗi sum segen sa jaŋ kulumayna kaw.

²¹Mul ma Israyella kali goyo, nam cal kulumayna vi sa Siriyana, to keke-ma-duur goyo, nam ci sum sa Siriyan ŋolo.

²²Ki kayn nala sa ma jobta co tam mulla vi Israyel, nam dum ala: Tuɗaŋu laŋ tuwaŋ ɗeŋe, naŋ ma waka, ɗuw va ma naŋ ma li'e kaw, kay hay busat ta tuɗayt ɗawni, mulla vi Siriya ma hotay duraŋu.

²³Sa sunda vi mulla vi Siriya di talamu: Lawna visiya mi law ma kulo kay hiɗiya, kuɗ na'ta nisi li dono suway naya. May nay ma dursi gaa hay liyn ma beɗna, nay ma wi'e la donota vay ma suwsi klasige.

²⁴Kayni mi va ma naŋ ma li'e lo: Pataŋ muliya sa kuɗaŋŋa goy kafe, cukaŋ sum sa ŋulona vaŋ hay baŋalsiya.

²⁵Naŋ ma vilek sojen sara'a ŋray ca ki sa naŋ basi goy jewn nala, hiɗi kulumayn ŋolo hiɗi keke-ma-duur ŋolo lay, bugol kayni nay ma dursi gaa hay liy ma beɗna, nala nay ma wi'e la nay ma muɗ dono ŋol suwsi kla. Nam hum kuɗsiya, nam li ki kayn nala.

²⁶Hay busata ka'ta, Ben-Hadad ŋaɓ sa Siriyan goyo, nam kali hay gal Afek kay dur sa Israyella.

²⁷Sumun li ŋaɓta vi gurona vi Israyel goyo kaw; nisi fi sle ma tina, nisi kaliya kay ŋaf ir sa Siriyana. Nisi lak goy ɗiger voksiya, ŋray ca ki fara ma gurayna vi fok-meena iram kaay goy ma' nala. May sum sa Siriyana yam nagat ka ɗubi kisiya.

²⁸Sana vi Lawn co'o, nam di tam mulla vi Israyel ala: Humaŋ va ma Ma-Vatɗin di'e: Sum sa Siriyan di ala: Ma-Vatɗin mi Lawna vi hiɗiya may mi lawna vi liyn ma be'ɗi, sum nisin sa ŋol hini-hinin kayni nan ma vulsi hay ɓaŋu, nala nigi ma wi ala nanu mi Ma-Vatɗina.

²⁹Nisi zlar goy vun tuwsi ir buur siɗiya. Hay buurta siɗiyat kayni, duur fokawa jarsiya, gurona vi Israyel ci sumun birim kis kuɗ sa Siriyana, si sum sa wi duura. Nisi cisi hay buur kep.

³⁰Dirsi ma hinna pir hay hoyok-ziyna vi Afek, gulmunna nig gaa kay sum sa hinina birim dok-ma' yam siɗiya lo. Ben-Hadad ay ŋayay kulo hay hoyok-ziyna, nam ka jok hay ziy mara'a mara'a kay ŋay tuwamu.

³¹Sa sunda valamu dumu: Humaŋu, numa humi labara ala muliyana vi Israyel kayni nisi slugo ŋolo; numa min jun bolla furma'a, jun zigew kulo kuma'a kaw, numa min kal goy tam mulla vi Israyel: Nala nam ma hinaŋ iri klasige.

³²Nisi jun bolla hay fursiya, jun zigewn kisi kaw, kali kat mulla vi Israyel. Nisi di'e: Sa ma sunda vaŋu Ben-Hadad ka di ala naŋ hinim iri hinge. Akab hot dita: Nam ka iri tuwa lo su? Namu mi ɓasunna.

³³Lawt kayni nisi va' vunsiya, nisi li koloyo kay sli dita valam vunsiya kay dum ala: Ben-Hadad kaw mi ɓasuŋŋa. Nala mulla di'e: Tuɗgiya, maram tani. Ben-Hadad co talamu, nala Akab ɓem kulo kay kekena valamu.

³⁴Ben-Hadad dumu: hoyok-ziy ma bun yawam hay ɓam buŋŋa nan min hot vulaŋga; naŋ ma in ziyna vaŋ hay Damas, ki bun in ziyna valam hay Samariya nala kaw. Akab ka dum ala: Nanu nan min jun bonot hiɗi naŋu, bugolda nan min hinaŋ kal may. Nam jun bonot hiɗi namu, bugolda hinim kal may.

³⁵Kep jar gurona vi sa ma jobta di mi sa ma kuɗumna ala: Nan siɗawaŋu naŋ calanu. Kuɗ dita vi Ma-Vatɗina. May san kayni min calamɗi.

³⁶Nam hot dumu: Kay mige naŋ min hum kuɗ vun Ma-Vatɗinɗi, humaŋu hay li ma naŋ hinan ɗawni, zlon ma caŋu. Hay li ma nam hinim hinna, nam tupa dig zlona, zlon cap cum mati.

³⁷Nam fi sa mara lo, nam dumu: Nan siɗawaŋu kay naŋ ma calanu, san kayni calamu, kaam tuwam goy mili.

³⁸Sa ma jobta kaliya, nam col goy hay hagat ta mulla jik haya'ta, nam kusuɓ sligar kiramu kay viy tuwam kir mulla.

³⁹Hay li ma mulla ka jika, nam siwel talamu di'e: Mulla, nan ay goy hay vun duura, sa mara co'o nam vulan sa mara'a ka di tan ala: ŋomaŋ san kayni, la nam pirawa, nan ma caŋ naŋ hay baŋalamu, lebo naŋ ma wurakan gurjuta ir talente kepe!

⁴⁰Hay li ma nan ka li lop gal tani tani, san kayni siyawa. Mulla vi Israyel dumu: Kayni ti kitata vaŋu, kay naŋ kay tuwaŋ ka kitata vaŋawa.

⁴¹Wulini wulini sa ma jobta yaw sligar ma kalamna goyo, nala mulla vi Israyel wi ala kayni mi sa ma jobta.

⁴²Nala nam di tam mulla: Ma-Vatɗina ka di ala: Kay sa ma nan min cum goyna naŋ hinim hulot goy vun ɓaŋu, irita vaŋu ma vurna hay baŋal ta falamta, sumuna vaŋ ma vurna hay baŋal sa falamna may.

⁴³Mulla vi Israyel kali vo hay ziyna valamu, muɗi yora muɗi ɦiya kaw, nan co hay Samariya.