Read Masana 1 MULIYANA 3 Bible Online

1 MULIYANA 3 - Masana bible

1 MULIYANA 3

¹Salomon jun bonota vi slita hiɗi Farawn mul ma Egiptena. Nam sli goota vi Farawn kuɗum ca'a, nam kala' kulo hay hoyok-ziyna vi David, ta-ta nam vat inda vi ziyna valam tuwa, ziyna vi Ma-Vatɗina, hiɗi gulmun ma ŋuyi kulo tam Yerusalemna.

²Hay na'ta sumun li ɗifin kayn kulo kay liy ma ɗiŋiriŋŋa, kay ta-ta hay liy namna kayni, ziy bay in hay semda vi Ma-Vatɗin tuwa noŋo.

³Salomon min Ma-Vatɗina, nam ka tap kuɗ data vi bulum David, may nam li ɗifinna hiɗi urdi ma hisn kayn kulo kay liyn ma ɗiŋiriŋŋa.

⁴Mulla kali hay Gabawon kay li ɗifinna, kay ɗiŋiriŋ ma hay liy namna kulo ŋol suw hegen kafe. Salomon ŋat farayn birim kep kulo kay giwin-ma-ɗifinna.

⁵Hay Gabawon, Ma-Vatɗin vul tuwam kir Salomon hay duwayta hay henjeta. Lawn dumu: Jobaŋ va ma naŋ mina, nan ma vulaŋga may.

⁶Salomon hot dita: Sa ma sunda vaŋu bunu David naŋ lum ŋaa'a ŋolo, kay nam poy vok iraŋ hay vida, hay ɗigerta hay gasita vi dikga; naŋ ŋom ŋaata ŋolda na'ta kayni ir malamu, naŋ vulum goor ma vurna baŋalam hay mulda, ki sumun ka wi vaydi nala.

⁷Wulin kayni, Ma-Vatɗina Lawna vanu, naŋ hinanawa ti mulda hay baŋal bunu David, nanu mi goor ma joriyo tuwa, nan wi yal mulda tuwaɗi.

⁸Nan ka jar jaf-sum sa naŋ vileksina, sum sa ŋol hini-hini, sum nisina sa as ŋaɓsi goy noŋɗi, kay nisi ka suwi ŋol ku'u.

⁹Naŋ ma vulan dikga ta yali kay ŋom sumuna vaŋu, kay poŋ ir ŋaata hiɗi joota. Kay sumuna vaŋ nisi sa ŋol hini-hinin kayni sa ma as ŋomsi ɗawni mi gige?

¹⁰Jobta vi Salomon na'ta cuk kuɗ hay Bum-Sumuna.

¹¹Ki kayn nala Lawn dumu: Kay naŋ jobom mi van kayni, kay naŋ may jobom mi mus ma hay nagat ta-tanaɗi, faraynɗi, mitta vi sum sa gaw kaŋŋaɗi kaw, kay naŋ joba' ti yalda kay li lop ma ɗigera,

¹²Humaŋu, nan min li kuɗ va ma naŋ jobomu. Nan ma vulaŋ dikga ta yal ŋolo, a sa jewaŋ naŋ kaw ma as ŋra hiɗi naŋ mayɗi, sa mara ma bugolaŋ kaw ma as ŋra hiɗi naŋ mayɗi.

¹³Lo, nan min vulaŋ va mara'a ma naŋ may joban kalamɗina, kayni mi farayna hiɗi gajijita, a hay buura irita vaŋ kaf mul mara ma as ŋra hiɗi naŋ mayɗi.

¹⁴La naŋ poy hay hagat ta nan ɗekaŋ ka'ta, la naŋ li kuɗ gatta hiɗi vun-ma-gatna vanu, ki buŋ David li nala, nan ma ɦuraŋ buraŋ voko.

¹⁵Salomon zliy kulo'o. Kayni ti duway ta dumta. Salomon hotay hay Yerusalem, nam ɗek tuwam goy vok timgilla vi bonota vi Ma-Vatɗina. Nam li ɗifin ma ŋal-goyna hiɗi ɗifinna vi lop ma slugona, nam li yuldeta mi sa sunda valam kafe.

¹⁶Bugol kayni boy sa gawlaŋŋa ma' co vi mulla, nisi co vokomu.

¹⁷Cata kepta di'e: Nan siɗawaŋu, sa ma ŋolla vanu, nan hiɗi cat zawni, numa ka lakay hay ziy kepe, nan puk kalaf hay ziy ta numa lakay haya'ta.

¹⁸Buur hiɗi bugolda, cat zawni puk lay. Numa lakay kayn daar kepe, sa mara ma ɦeleŋ may jarma hay ziynɗi, say numa ma' tuta.

¹⁹Goora vi cat zawni mit henjeta, kay na' bur kalamu,

²⁰hay henjet daŋalta, hay li ma nan ka buri sene, na' sli goora van gaa dikan yilak' tuɗ burum gaa dika'a, goora va' ma mitina na' slumu, burum gaa dikanu may.

²¹Graw culumta, hay li ma nan fok kulo'o kay vul miira mi goora vanu, nan ɗuw na kayni nam mitiya, nan peɗem ŋali ŋali kayni, nam may mi goora van ma nan vuɗumnaɗi.

²²Cat heta di'e: Iri kayni mi goora vanu, may miti mi goora vagu. May ta jewt hot di'e: May noŋɗi, miti mi goora vagu, hini iri kayn mi goora vanu. Nisi ka law ki kayn nala vok mulla.

²³Mulla di ala: Heta di ala: Hini iri kayn mi goora vanu miti mi fakŋa, Heta lo di ala: May noŋɗi, miti mi goora vagu may fan nanna kayn ma irina.

²⁴Bugol kayni mulla di lo: Marangi kew-gaferaŋ kepe; nisi mar kew-gaferaŋ mi mulla.

²⁵Mulla di'e: Goor ma hini irina nigi ma kaam iram gaa ma', vulum galam mi heta, vulum galam mi heta may.

²⁶Cata ta goora va' hini irita dika' ɓira' jiɗi' kay goora va'a: Nala na' di tam mulla: Hi! Mulla vanu, goor ma hini irina nigi vula'ta, cigit goyɗi. May heta di'e: Nam ma hin van nanɗi lay vag nakɗi lay, calgitis goyo.

²⁷Nala mulla sli ditiya di'e: Goor ma hini irina nigi ma vulum mi cata jewta, cigit goy matɗi, kay na' ti sulumu.

²⁸Sum sa Israyel kaf hum labara kay kita ma mulla kaamna. Nala nisi tun caw li nar kalamu, kay nisi wi ala yalda vi Lawna ka kalamu kay ɗekem kay kitata ta nam ka'ta.