Read Masana 1 MULIYANA 8 Bible Online

1 MULIYANA 8 - Masana bible

1 MULIYANA 8

¹Ki kayn nala mulla Salomon tok sa maariyana vi Israyel, hiɗi sa ŋulona kuɗ jafna jafna, sa ŋulona kuɗ vun-ziyn kafe kaw, nam toksi talamu hay Yerusalem, kay sli timgilla vi Ma-Vatɗina goy hay hoyok-ziyna vi David ma yum Siyon pa.

²Sum sa Israyel kaf tok tuwsiya kat mulla Salomon hay tilla vi Etanim, hay liyna vi yuldeta, kayni mi til ma siɗiyana.

³Hay li ma gurona vi Israyel kaf co cona, muliyan-sa-ɗifinna ziy timgilla aya.

⁴Nisi ziy timgilla vi Ma-Vatɗina, guɗuk ma fi-tuwna, jakŋa ma peldetna kaf ma ka hay guɗukŋa: Ziyim kayni si muliyan-sa-ɗifinna hiɗi sa Levitna.

⁵Mulla Salomon hiɗi vokŋa vi Israyel kaf sa nam yisi ayna zlar goy vok timgilla, nisi ŋat luwayna hiɗi fok-dimina, sa as wi ŋaɓta valam noŋɗi, kay nam suwi zututu.

⁶muliyan-sa-ɗifinna tuɗ timgilla vi bonota vi Ma-Vatɗina hay liyna valamu, hay liyn ma peldetna vi ziyda, gaa kuɗ gilaŋat kerubena*.

⁷Kay gilaŋat keruben ka meɗay goyo hay liyna vi timgilla, kay nisi ka kusuɓ yam arkena hiɗi gu-malla ma cuki kalamna.

⁸Gu-malla ma nisi cukum talamna fiyokka valam koti kayni, vunam ma kalaf hay liyn ma peldetna kali goy ta-ta hay ziyda, may san as wum goy jiyɗi. Nam ka lak' ta-ta vaydi.

⁹Kalaf hay timgilla kayni ka mi hiɗiy beɗayna ma ma'na tuta, ma Musus lakam hay Horeb hay li ma Ma-Vatɗin li bonota hiɗi gurona vi Israyel, hay li ma nisi kali goyo hay nagat Egipte pa.

¹⁰Hay li ma muliyan-sa-ɗifinna kali goy hay liyn ma peldetna kalla, ɗugulla hob ziyna vi Ma-Vatɗina.

¹¹Muliyan-sa-ɗifinna may fi liyn kay li lopnɗi, kuɗ ɗugulla, kay gajijita vi Ma-Vatɗina hob ziyna valamu.

¹²Ki kayn nala Salomon di'e: Ma-Vatɗin min mus hay jufunda.

¹³Nan kot ziy ma naŋ ma mus hayamnawa, liyn ma naŋ ma mus hayam dok-doko.

¹⁴Mulla muɗ iramu, nam gi bol kay sum sa Israyella sa ka tokayna kafe; sum sa Israyella kaf ka lakay kulo kay sesiya.

¹⁵Nam di'e: Suburta tam Ma-Vatɗina Lawna vi Israyel, ma law hiɗi vunamu kat David bunu, Ma-Vatɗina ma hiɗi gaŋeraŋa valamu, ka hob vun va ma nam dum ala:

¹⁶Hay buur ma nan kal sum sa Israyella ay goy hay Egipte pa, nan bay vilek hoyok-ziy kep tuwa jar jaf sa Israyella, kay in ziya kay semda van ma tun talamu, may nan vilek David kay nam ma ti mulda kay sumuna vanu sa Israyella.

¹⁷Bunu David varay kay in ziy kep hay semda vi Ma-Vatɗina Lawna vi Israyel.

¹⁸Ma-Vatɗina di tam bunu David ala: Kay naŋ varay kay in ziyda hay semda vanu, varta kayni naŋ vara' ŋaa'a.

¹⁹May ziyd kayni ina' ɗawn may mi naŋɗi; may in ziyda hay semda van ɗawni mi goora vaŋ ma naŋ vuɗum kay tuwaŋŋa.

²⁰Ma-Vatɗin hob vun dita valamawa. Nan tunawa kulo hay baŋal bunu David, nan musawa kay mulda vi Israyel, ki Ma-Vatɗin di nala kaw, nan in ziydawa hay sem Ma-Vatɗina Lawna vi Israyel.

²¹Nan kot liyn maraawa kay timgilla vi bonota vi Ma-Vatɗina kaw, bonota ta nam la' hiɗi sumayma'a hay li ma nam kalma'ay goy hay nagat Egipte pa.

²²Salomon col goy vok giwin-ma-ɗifinna vi Ma-Vatɗina, ɗiger vok gurona vi Israyel kafe. Nam yaw ɓalam kulo hay wuralawna nam di'e:

²³Awa Ma-Vatɗina, Lawna vi Israyel, Lawn mara'a ma ŋray hiɗi naŋ mayɗi, kulo hay wuralawnɗi, gaa kay nagatɗi kaw, naŋ ŋom bonota hiɗi slugota ta naŋ la' kat sa sunda vaŋu sa tuɗ vok iraŋu hiɗi diksi kafe.

²⁴Wulini va ma naŋ dum mi bunu laawa; va ma naŋ dum hiɗi vunaŋ dina naŋ hobom vunamawa hay fatta vaydita kuɗ donota vaŋu.

²⁵Wulin kayni, Ma-Vatɗina, Lawna vi Israyel, laŋ kuɗ va ma naŋ dum hiɗi vunaŋu tam bunu David ala: Sa ma vurna baŋalaŋu hay mulda vi Israyel dok-doko, la gurona vaŋu ŋom tuwsi ŋaa'a, la nisi poy vok iranu ki naŋ poy vok iran nala kaw.

²⁶Yawwa! Lawna vi Israyel, dita-ŋaɓayta ta naŋ da' mi bunu ma sunda vaŋu David naŋ ma hoba' vuna' hobge.

²⁷May mige? Lawn as kay mus ziy gaa hay nagat gasi su? Humaŋu, dukalawn ma suw dukalawna may asaŋ noŋɗi, may ziy ma goor tuwam noŋ zawni asaŋ ɗawn astige?

²⁸May hiɗi kayni kaf kaw, Ma-Vatɗina vanu, humaŋ siɗawta hiɗi giɗel-delta vi sa ma sunda vaŋu, humaŋ tiyta hiɗi siɗawta van taŋ vaydi.

²⁹Hay henjeta hiɗi falayta kaf naŋ ma cuk iraŋ kay ziyd zawni, kay liyn ma naŋ di ala: Semda vaŋu ma yi hayamu. Humaŋ siɗawta ta sa ma sunda vaŋu vul taŋu hay liyn tani.

³⁰Humaŋ giɗel-delta vi sa ma sunda vaŋu hiɗi sumuna vaŋu sa Israyella hay li ma nisi ma siɗaw taŋu hay liyn tani, kulo hay liyn ma musta vaŋu hay wuralawn pa, humaŋ siɗawta, vulaŋ gida kaw.

³¹Hay li ma sa li sulukawa kat sugolomna, la nisi lumawa hiɗi dono'o kay nam yi va kalamu, la nam coowa yi va kalamu vok giwin-ma-ɗifinna vaŋu hay ziyd zawni,

³²hay wuralawn pa humaŋ siɗawta valamu, laŋ va'a, kaaŋ kitata vi sa sunda vaŋu; kaaŋ kitat kay sa ma li joota, hotaŋ joota valam kalamu, gaŋ diraŋ kuɗ sa ma ɗigera, gutaŋ kuɗumu kay bay-joota valamu.

³³Hay li ma sum sa gaw kaŋŋa kolawa kay sumuna vaŋu, kay suluk ma nisi lum kataŋŋa; la nisi hotay kataŋu, vul suburta tam semda vaŋu, la nisi siɗawaŋu giɗelaŋ delaŋ kaw hay ziyd zawni,

³⁴hay wuralawni pa humaŋ siɗawta visi humge, naŋ ma vul gida kay sulukŋa vi sumuna vaŋu sa Israyella, naŋ ma hotsiyaya hay nagata ta naŋ vula'a mi sumaysiya.

³⁵Hay li ma dukalawn dukawa, niy ma sin may loɗi kuɗ sulukŋa visi ma nisi lum kataŋŋa, la nisi siɗaw hay liyn tani vul suburta kaw mi semda vaŋu, la nisi hin sulukŋa visi goyo kay wat ma naŋ watsina

³⁶humaŋ siɗawta visiyay kulo hay wuralawna pa, vulaŋ gida kay sulukŋa vi sa sunda vaŋu hiɗi sumuna vaŋu sa Israyella, sa naŋ min hatsi hagata ŋaata kay nisi ma sli haya'a, hinaŋ niyn si gaa kay nagata ta naŋ vula' voco'o mi sumuna vaŋu.

³⁷La mayta, tuw ma cukŋa, fotna, fiyumna lebo baara kuɗ jafam pet kaw coowa hay nagata, hay li ma sum sa gawta ŋuy nagata vi sumuna vaŋawa, coowa kulo hay vun-galana visiya, hay li ma bakmarana vi moy marige kaw coowa;

³⁸la san kepe lebo, la sum sa Israyel kaf siɗaw siɗawta ta hiɗi giɗel-delta, la gigekaw wi milla vi dikamu, la nam meɗ balamiyawa kat ziyd zawni,

³⁹hay wuralawn pa humaŋ siɗawta valamu, hay liyn ma musta vaŋ pa, vulum gida, naŋ mus kiliŋɗi, vulaŋ mi gigekaw kuɗ lopna valamu valamu, naŋu ma wi dik gigekaw, kay naŋ kep wi dikga vi gurona vi sumun kafe.

⁴⁰Nala nisi ma li nar kaŋu hay buur kaf ma nisi ka iri tuwa hay nagata ta naŋ vula, mi sumayma'a.

⁴¹La sa ma pulu ma may jar jafna vaŋ sa Israyelɗi coyawa goy hay nagat ta gine pa, kay gar semda vaŋu,

⁴²kay nisi ma wi ala semda vaŋ ŋolo, naŋ dono'o, gilaŋaŋ goy meɗiya kaw, hay li ma nisi ma co siɗaw hay ziyd zawni.

⁴³Humaŋ siɗawta visi ay hay wuralawn pa, hay liyn ma musta vaŋu, sa ma pul namna naŋ ma vulum sle ma nam jobaŋ kalamna kaf, kay sum sa hay nagat kaf ma wi semda vaŋu, li nar kaŋu kaw, ki sumuna vaŋ sa Israyella nala, kay nisi ma wi ala semda vaŋu ka yiya hay ziyd na'ta ta nan ina'ta zawni.

⁴⁴Hay li ma sumuna vaŋ cukawa goyo kay dur sa ma gaw kisina, la nisi tap kuɗ hagata ta naŋ ɗeksi ka'ta, la nisi siɗaw tam Ma-Vatɗina hiɗi irsi muɗi kat hoyok-ziyna ma naŋ vilekemna tani, hiɗi ziyda ta nan ina' hay semda vaŋ zawni,

⁴⁵hay wuralawn pa humaŋ siɗawta hiɗi giɗel-delta visiya, gutaŋ kuɗsiya.

⁴⁶Hay li ma nisi li sulukawa kataŋu, kay sa ma li sulukɗi mayɗi, hay li ma naŋ muɗawa ɦiy katsiya, hay li ma naŋ vulsiyawa goy ɓam sa gawt kisina, la sa gawta tuɗsiyawa goy hay nagata visiya, la gine'e lebo goboyo kaw,

⁴⁷hay li ma nisi hotawa vara hay nagata ta narsi haya'ta ɗawni, la nisi hotiyawa taŋu giɗelaŋ delaŋawa hay nagata vi sum sa yawsi gorvona, la nisi daawa ala numa li sulukawa, numa li jiw-zlatawa, numa li jootawa!

⁴⁸La nisi hotiyawa kataŋu hiɗi diksi kaf, hiɗi ciwta visi kaf, la goy hay nagata vi sa gawt kisina sa tuɗsi goy gorvon pa, la nisi siɗaw taŋu, irsi muɗi hay nagata ta naŋ vula' mi sumaysita, kat hoyok-ziyna ma naŋ vilekemu, kat ziyna ma nan inim hay semda vaŋu,

⁴⁹kulo hay wuralawna hay liyn ma musta vaŋ pa, naŋ ma hum siɗawta hiɗi giɗel-delta visiya, gutaŋ kuɗsiya;

⁵⁰vulaŋ gida mi sumuna vaŋu kay sulukŋa visiya hiɗi raw-goyta visi kafe ma nisi li kataŋu, kalaŋ kir-hawta hay dik sum sa yawsi gorvona, kay nisi ma lisi slugota,

⁵¹kay nisi kayni si sumuna vaŋu hiɗi vocota vaŋu, kay naŋ kalsiyay goy hay Egipte pa, jar kuta ta yor kawayn pa.

⁵²Mal iraŋ goy malge kay giɗel-delta vi sa ma sunda vaŋu hiɗi giɗel-delta vi sumuna vaŋu sa Israyella, a humsiya kay sle ma nisi jobaŋ kalam kafna.

⁵³Kay naŋ ɓurawsi irsi goy hiɗi jaf-sum segen sa hay nagat kaf kayni kay nisi ma lin ti vocota vaŋu, ki naŋ di tam Musus ma sunda vaŋu nala, hay li ma naŋ kal gurona vi Israyel ay goy hay Egipte pa, Bum-Sumuna Ma-Vatɗina.

⁵⁴Hay li ma Salomon vat siɗawta hiɗi giɗel-delta tam Ma-Vatɗin vatna, nam fok kulo'o vok giwin-ma-ɗifinna vi Ma-Vatɗina ma nam ay girifi musi gaa vokomna pa, balam meɗay kulo'o hay wuralawna,

⁵⁵Nam col kulo'o, gi bol kay sum sa Israyel kaf hiɗi delem kulo ŋolo, nam di'e:

⁵⁶Suburta tam Ma-Vatɗina, ma vul tun-sukka mi sumuna valamu sa Israyella, kuɗ dita-ŋaɓayta valam kafe, yoboy ma ŋaana kafe ma nam dumu hiɗi del Musus ma sunda valamu, mara kep kaw hin bay liɗi.

⁵⁷Ma-Vatɗina Lawna vuma'a, laŋ hiɗi numa'a ki naŋ li hiɗi sumayma nala kaw, naŋ ma hinma goyɗi, yaŋ ma jokmaɗi,

⁵⁸may naŋ ma muɗma dikma kuɗaŋu, kay numa ma tuɗ hay hagata vaŋ kafe, kay numa, ma li kuɗ vun-ma-gatna vaŋu, gatta hiɗi dita ta naŋ da' tam sumayma'a.

⁵⁹Yoboyn ma nan gidelaŋ delaŋ hiɗi namna lakŋi, hinim lak vok iraŋ naŋ Lawna vuma dok-doko falayta hiɗi henjeta kaw, naŋ ma gut kuɗ sa ma sunda vaŋu hiɗi sumuna vaŋu sa Israyella dok-doko.

⁶⁰Kay sum sa hay nagat kuɗulu ma wi ala Ma-Vatɗin mi Lawna, lawayn mara'a mayɗi.

⁶¹Hingi dikgi kaf tam Ma-Vatɗin Lawna vaya, ki nigi ka vaydi kayn nala, kay tap kuɗ gatta valamu, kay li kuɗ vun-ma-gatna valamu kaw.

⁶²Mulla hiɗi sum sa Israyella kaf li ɗifini vok ir Ma-Vatɗina.

⁶³Salomon ŋat luwayn birim dok-ma' yam ma', ŋat fok-dimin birim kis kalam dok-ma' kaw kay ɗifinna vi lop ma slugona ma nam lum tam Ma-Vatɗina. Ki kayn nala mulla hiɗi sum sa Israyel kaf mal vun-ziyda vi Ma-Vatɗina goyo,

⁶⁴hay buur namna, wur-daŋŋa ma ka vok ziyda vi Ma-Vatɗina mulla vulum goyo ir mi Ma-Vatɗina, kay ɗifin ma ŋal-goyna, vulda, hiɗi mula vi ɗifinna vi lop ma slugona nam lum kayni hay liy namna, kay giwin-ma-ɗifinna ma koti hiɗi kawayna ma ka vok Ma-Vatɗina nam gooro, ɗifin ma ŋal-goyna, vulda, mula vi ɗifinna vi lop ma slugona kaf as lak kulo kalamɗi.

⁶⁵Salomon li yuldeta hay liy namna kayni, sum sa Israyella kaf hiɗi namu. Sumun ŋol zututu fokay hay galla vi Hamat pa ta-ta hay niy-ma-riŋŋa vi Egipte, nisi tok tuwsi vok ir Ma-Vatɗina Lawna vaya ir buur siɗiya, hiɗi buur siɗiya lo, li buur doogo yam fiɗi.

⁶⁶hay buurta glafandita, nam gi ir sumuna. Nisi gi bol kay mulla may, nisi kaliya, gigekaw tun iram hay ziyna valamu valamu, diksi firi ŋolo, haysi sleɗiya kaw kay ŋaata ta Ma-Vatɗin la' mi David sa ma sunda valam kafta, tam sumuna valamu sa Israyel kafe kaw.