Read Masana 1 MULIYANA 9 Bible Online

1 MULIYANA 9 - Masana bible

1 MULIYANA 9

¹Hay li ma Salomon vat inda vi ziyna vi Ma-Vatɗina, ziyna vi mulla hiɗi sle ma dikam mini kay kotomna kaf vatna,

²Ma-Vatɗin vul tuwam kir Salomon hay sem ma ma'na lo, ki nam vul tuwam kiramu hay Gabawon nala.

³Ma-Vatɗina dumu: Siɗawta hiɗi giɗel-delta vaŋ tanu nan huma'awa, ziyda na'ta ta naŋ kota'a kay tun semda van haya'ta zawni nan la'awa goy peldete, dok-dok nan ma cuk iran ka'a, var ka'a kaw.

⁴May naŋu, la naŋ poy vok iranu ki buŋ David nala, hiɗi dikga gasita hiɗi ɗigerta kaw, la naŋ li kuɗ sle ma nan daŋ kalamna kafe, la naŋ li kuɗ gatta hiɗi dita vanu,

⁵zlamda vi mulda vaŋu nan ma tuna' dok-dok hay Israyel, ki nan di tam buŋ David nala ala: Dok-dok sa ma as vurna baŋalaŋ hay mulda vi Israyel ma li ka'a.

⁶May la nigi cal goy gine hiɗi nanu, nigi hiɗi gurona vigi kaw, la vun-ma-gatna vanu hiɗi gatta vanu kaf ta nan ɗo tigiya nigi may li kuɗa'ɗi, la nigi tuɗ sun lawayn mara'a, girif gaa vokomu kaw,

⁷nan ma vatgi goyo hay nagata ta nan vulgiya, ziyda ta nan tun semda van ta'ta nan ma noya' goy gine'e, sum sa Israyella muɗ ɗawni, sumun ma gi jun hiɗi nisiya, cen kuɗsiya kaw.

⁸Ziyd na'ta ta jew ay ini kulo ŋolta zawni, la sa jikawa kata'a nam ma li ɦuyum', ma li ala hih! Sumun ma di ala, nagat kayni hiɗi ziyd zawni Ma-Vatɗin lum na kayn kay mige?

⁹Sumun ma hotsi dit ala: Kay nisi noy Ma-Vatɗina Lawna visi goyo, nam ma yawsiyay goy hay nagata Egipte pa, kay nisi jun tuwsi tam lawayn mara'a, nisi girif gaa vokomu, sunumu kaw; kuɗ na'ta kayni Ma-Vatɗina hin joot na'ta zawni kaf co kisiya.

¹⁰Co hay vatta vi busat dok-ma' kayni, Salomon in ziy ma ma'nawa, ziyda vi Ma-Vatɗina hiɗi ziyda vi mulla.

¹¹Hiram mul ma Tirusna vul gu-gamna hiɗi gu-siprena mi Salomon, hiɗi ora suw ma nam minimna, mulla Salomon vul hoyok-ziyn dok-ma' mi Hiram hay nagat Galileya.

¹²Hiram fokay goy hay Tirus pa, kay ɗuw hoyok-ziyna ma Salomon vulumtina. May hoyok-ziy namna may cuk kuɗ hayamɗi.

¹³Nala nam di'e: Basunna, hoyok-ziy namna ma naŋ vulantin lakŋi mi hoyok-ziy mige? Nam tunum selem ala Kabul,[6] sem namna ka talamu ta-ta vaydi.

¹⁴Talente ma ora ma Hiram vulum mi mulla kayni nam kis kalam dok-ma'.

¹⁵Salomon yaw sumuna kay in ziyda vi Ma-Vatɗina, hiɗi ziyda valamu, Millo hiɗi gulmunna ma tam Yerusalemna, Hatsor, Megiddo hiɗi Gezer.

¹⁶Farawn mul ma Egipten co'o, nam ŋuy Gezer, nam ŋala' goyo, sum sa Kanaaniyana sa ka li ziy haya'na nam cisi goy kafe. Bugol kayni nam vulum ɦawa'a mi goota valamu, cata vi Salomon.

¹⁷Salomon in Gezer hiɗi Bet-Horon ta gaata kaw,

¹⁸Baalat, hiɗi Tadmor, goy hay fulda vi nagata

¹⁹hoyok-ziyn kaf ma cuk tin haya ma ir valamna, hoyok-ziyn ma lak keke-ma-duura hayna, hoyok-ziyn ma lak kulumayn hayna, hiɗi slen ma kir Salomon ŋaa'a kay in hay Yerusalem kafe, hay Libaŋ kaw, hiɗi nagata ta nam ka ti mul ka'ta kaf kaw.

²⁰Dir Sumun kaf sa hin kuɗ sa Amoriyana, sa Hetna, sa Feresiyena, sa Heviyena, sa Yebusiyena, nisi may jar gurona vi Israyel noŋɗi,

²¹jafna visi sa hin bugolsi hay nagatna, sa gurona vi Israyel may vatsi goyɗina, Salomon yawsi gorvo'o kay li lopna, ta-ta vaydi nisi ka ki kayn nala.

²²May gurona vi Israyel Salomon may yawsi gorvoɗi; kay nisi kayni si sum sa li duura, sa sunda valamu, sa tuni ŋulona, ŋulona vi sojena, sa ŋulona vi keke-ma-duura hiɗi kulumayna valamu.

²³Sa Salomon tunsiya kay ŋom sa li lopna kayni, nisi kis-vasl hiɗi diram dok-vasl, nisi kayni si sa tuni kay sum sa li lopna.

²⁴Goota vi Farawn hin ziyna vi David, na' kal kalaf hay ziyda va'a ta Salomon ina'ta, kayni hay li ma Salomon in Millona.

²⁵Sem ɦidi hay busat kayni, Salomon li ɗifin ma ŋal goyna hiɗi ɗifinna vi lop ma slugona kulo kay giwin-ma-ɗifinna ma nam inim mi Ma-Vatɗina, nam ŋal urdina kulo kay nam ma ka vok ir Ma-Vatɗina. Nala nam vat inda vi ziyda.

²⁶Mulla Salomon kot lumayna hay Esiyon-Geber, goboy hiɗi Elot, kel niy-lum ma slawna, hay nagata vi Edom.

²⁷Hiram cuk sa sunda valam kuɗ sa sunda vi Salomon hiɗi lumayna, kay nisi kayni si sum sa gi lumna, nisi wi niyn ŋaa'a ŋolo.

²⁸Nisi kali hay Ofir, nisi yaw ora ir talente kis-fiɗi hiɗi diram dok-ma', nisi maram mi mulla Salomon.