Read Masana 2 MULIYANA 10 Bible Online

2 MULIYANA 10 - Masana bible

2 MULIYANA 10

¹Hay Samariya gurona vi Akab ay dok-siɗiya. Yehu ɗo ɗerwelda, nam ga' tam sa ŋulona vi Yisreel, tam sa maariyana, tam sa guvernera vi gurona vi Akab. Dit ɗoy hay ala:

²Wulin kayni hay li ma ɗerwelda kayni coowa tigiya, kay gurona vi mulla vigi ka katgiya, keke-ma-duura ka kigiya hiɗi kulumayna, hoyok-ziyn ma donona hiɗi sle-ma-duura kaw.

³Duwgi jar gurona vi mulla, ma kirgi nagayna ma kirgi asayna, nigi ma tunum kulo kay zlamda-mulda vi bulumu, nigi ma dur kay ziyna vi mulgina.

⁴Nisi tun caw li nar ŋolo, nisi ka di ala: Wulin kayni muliyan ma' noŋ kaw may lak digamɗi, nay as lak digam ɗawn ir nanige?

⁵Nala sa ŋulona vi ziyna, sa ŋulona vi hoyok-ziyna, hiɗi sa ŋom gurona cuk sunda kay di tam Yehu ala: Numa si sa sunda vaŋu, numa ma li sle ma naŋ duma kalam kafna, numa as tun sa mulɗi, laŋ va ma kiraŋ ŋaana.

⁶Yehu ɗosi ɗerwelda ta sem ma'ta lo ala: La nigi ir vanu, la nigi human delanu, sum nisina sa gurona vi mulla nigi ma kaasi yisi goyo, nigi ma co katan girawta hay Yisreel hay li ma liyn ki kayn nala. Hay na'ta kayni gurona vi mulla sa dok-siɗiyana ka vo hay ziyna vi sum sa ŋulona vi hoyok-ziyna, nisi ka wulsiya.

⁷Hay li ma ɗerwelda co tisiya, nisi yaw gurona vi mulla, sum sa jufayn dok-siɗiya kaf, nisi ŋatsiya; bugolda nisi kosi yisi hay tikisina, jokom mi Yehu hay Yisreel.

⁸Sa sunda co talamu, ka dum ala: Nisi mar yam gurona vi mullawa. Nam hotsi dit ala: Nigi ma tunum iram goy ma' hay vun-ziyna, ta-ta liyn fo goyo.

⁹Hay graw culumta nam kali goyo, vul tuwam goy kir sumun kafe, nam ka disi ala nigi kayn ɗigere. Humgiya, nan fok lawt kay mulanna, nan cum goyo, may nisi kaf lakŋi cisi goy kayn mi gige?

¹⁰Wigi ala yoboy ma Ma-Vatɗin dumna mara as nig goy gaa kay nagat kepɗi, yoboy ma Ma-Vatɗin dum kat ziyna vi Akab hiɗi vun sa ma sunda valamu Eliyasna nam ma hobom vunamu.

¹¹Dir sum sa hin hay Yisreel hay ziyna vi Akab kafna, sa ŋulon kafe, sa hay jafam kafna, sa ŋulona valam kafe, Yehu cisi goy kafe, nam hin mara kep kaw.

¹²Bugolda nam fok kulo'o, kali hay Samariya, hay li ma nam co hay ziy ma sum sa ŋom farayn tok tuwsi hayna, hay hagata,

¹³Yehu ŋaf hiɗi ɓosiyom Ahaziyana, mulla vi Yuda, nam di'e: Nigi kayn si sum sarige? Nisi hot dita: Numa kayni si ɓosiyom Akasiyana, numa tuɗis kayni kay gi deɓ mi gurona vi mulla hiɗi gurona vi ca-mulda.

¹⁴Yehu di'e: Nigi ma yawsi iriya, nala nisi yawsi iriya, nisi dok-fiɗi yam ma' kaf nisi ŋatsi goy kafe, cuksi hay kaata vi liyn ma sum sa ŋom farayn tok tuwsi hayna, Yehu hin sa kuɗsi kep kaw pir goy noŋɗi.

¹⁵Hay li ma nam fokis ɗawn pa, nam ŋaf hiɗi Yonadab goora vi Rekab, ma ka co ŋafam iramu. Nam gum deɓe, ka dum ala: Dikaŋ ka tan haɓ tal-tal' ki dikan nan ka taŋ nala su? Yonadab hot dit ala: Awa dikan ka haɓi taŋu. Yehu ka dum ala la dikaŋ ka haɓ tanu, naŋ ma van ɓanu. Yonadab vum ɓalamu. Yehu musum kulo talam hay keke-ma-duura valamu.

¹⁶Yehu dum ala tapaŋay kuɗanu, naŋ ma wi ciwerta van ta kay Ma-Vatɗina. Nam ɓem kuɗumu hay kekena valamu.

¹⁷Hay li ma Yehu co hay Samariya, dir sumuna vi Akab sa hin hay Samariyan nam cisi goy kafe, nam vatsi goy noŋ kirap', kuɗ yoboyn ma Ma-Vatɗina dum tam Eliyasna.

¹⁸Bugolda nam tok sumun kaf, ka disi ala: Akab sun Baal kayn kiɗaya, Yehu hayɗin ma sun Baal ŋolo.

¹⁹Wulin kayni, yigi sa jobta vi Baal ay katan kafe, sa sunda valamu hiɗi muliyan-sa-ɗifinna valam kafe, mara kep kaw ma hinay goyɗi, kay nan min li ɗifin ma ŋolo tam Baal, la sa hiniyawa goyo, nam ma mus iri loɗi. Yehu la' kayn ti yalda, kay nam min ci sa sunda vi Baal goy kafe.

²⁰Nam di'e: Colgi buur kep kay li yuldeta kay subur sem Baal. Nisi col buur kepe.

²¹Nam cuk sum sa sunda hay Israyel kafe, sa sunda vi Baal kaf co'o, mara hinay goy bay coɗi, nisi cuk kalaf hay ziyna vi Baal, ziyda vi Baal hob goy cep-cep',

²²Yehu di tam sa ma ŋom sligara ala: Yawaŋ sligar ay goyo kay sa sunda vi Baal. Sa namna yawsi sligaray goyo.

²³Ki kayn nala Yehu co hay ziyna vi Baal hiɗi Yonadab, goora vi Rekab, nam di tam sa sunda vi Baal ala, gargiya, ɗuwgiya, kay sa ma sunda vi Ma-Vatɗin kep kaw ma hin tanɗi, may sa sunda vi Baal tuta.

²⁴Nisi cuki kalafi kay li ɗifini hiɗi ɗifin ma ŋal-goyna. Yehu lak sumun goy jiy dok-glafandi, nam ka disi ala: Sum sa nan vulsi hay ɓigin ɗawni, la nigi hin maraawa pir goyo, irita vigi vurnay hay baŋalamu.

²⁵Hay li ma nisi vat ɓina vi ɗifinna vatna, Yehu di tam sa jaŋŋa hiɗi sa ŋulona vi sojen ala, cukgi kalafi, calsiya, hin kep kaw pir goyɗi. Nisi calsi hiɗi kew-gaferaŋa. Sa jaŋŋa hiɗi sa ŋulona vi sojena cuksi gaa hay liy namna, nisi kali ta-ta kulo hay liy ma ziyna vi Baal ka hayna.

²⁶Va ma ceɗayna ma ka hay ziyna vi Baal nisi sabamay goy jiya, nisi ŋalam goyo.

²⁷Hiɗiy ma ceɗay mi Baalla nisi ɦom gaa'a, ziyna vi Baal kaw nisi ɦom gaa'a, nisi muɗum mi liy ma muz-tuwna. Nam ka zaw ta-ta vayɗi.

²⁸Yehu vat Baal goy kafe jar sum sa Israyella;

²⁹may nam min ja jaram goy hiɗi sulukŋa vi Yerobowam goora vi Nebatɗi, kay Yerobowam kal sum sa Israyel hay sulukŋa, goor-put ma ora ma ka hay Betel hiɗi Dan nam min hinim goyɗi.

³⁰Ma-Vatɗina di tam Yehu: Kay mige naŋ li sle ma ɗigerawa vok iranu, naŋ li tam ziyna vi Akab slen ma cuk kuɗ varta vanu, nala gurona vaŋu ta-ta tam jaf ma fiɗina ma lak kay mulda vi Israyel.

³¹Hiɗi kayn kaf, Yehu min li yali kay tuɗ hay vun-ma-gatna vi Ma-Vatɗina Lawna vi Israyel hiɗi dikam kafɗi, suluk ma Yerobowam kal gurona vi Israyel hayamna nam min ja jaram goy hiɗi namɗi.

³²Hay liy namna kayni, Ma-Vatɗina tun caw yaw goy kuɗ nagata vi Israyel; mulla Hazayel cisiya hay jar nagata vi Israyel.

³³Tun caw hay Yordan pa, ta-ta hay liy ma fatta day kulona, nam ci sum sa hay nagat Galaad kafe, sa Gadna sa fi Rubenna, hiɗi sa fi Manasena, fokay hay Arower, kulo kay niy ma riŋŋa vi Arnon ta-ta hay Galaad hiɗi Basan.

³⁴Caw lopna vi Yehu ma hinina, slen ma nam lum kafna, kursulita valamu, kayni ka ɗoy hay ɗerwelda vi Labar-Ma-Liyna vi muliyana vi Israyel.

³⁵Yehu miti kuɗ sumiyamu, nisi pum hay Samariya may. Goora valamu Yowahaz ti mulda hay baŋalamu may.

³⁶Yehu ti mulda kay sum sa Israyella ir busat dok-ma' yam glafandi hay Samariya.