Read Masana 2 MULIYANA 14 Bible Online

2 MULIYANA 14 - Masana bible

2 MULIYANA 14

¹Co hay busata ma'ta vi Yowas, goora vi Yowahaz mulla vi Israyel kayni, Amatsiya goora vi Yowas tun mulu hay Yuda.

²Nam muɗ mul kayni busata valam coy dok-ma' yam vasl. Nam ti mulda ir busat dok-ma' yam zleeŋe hay Yerusalem. Sulum ya' ala Yowadan, ti goota Yerusalemta.

³Nam li sle ma ɗigera kir Ma-Vatɗina, ŋray hiɗi bulum David noŋɗi may; nam li kayni ŋray ca ki bulum Yowas li nala.

⁴Liyn ma ini kulo ɗiŋiriŋ hayɗin may vat goy noŋɗi; sumun ay li ɗifini, ŋal urdin kaw kayni kulo kay liyn ma ɗiŋiriŋŋa.

⁵Hay li ma mulda hinawa goy hay ɓalamu, sa sunda valamu sa ci bulumna nam cisi goy kafe.

⁶May gurona vi sa ci matna nam min cisi goyɗi, kuɗ va ma ɗoy hay ɗerwelda vi gatta vi Musus, ta Ma-Vatɗina vul vun-ma-gatna ala: As ci bumna kuɗ sulukŋa vi gurona valamɗi, as ci gurona kuɗ sulukŋa vi busiɗi lay; may gigekaw cum ɗawni kuɗ sulukŋa valamu valamu.[8]

⁷Nam ci sum sa Edomna birim doogo hay liy ma beɗna vi mandana; hay duur namna nam sli Sela, nam tuna' se' ala Yokteel, sem na'ta ka ta'a ta-ta vaydi.

⁸Bugol kayni Amatsiya cuk sa sunda kat Yowas goora vi Yowahaz, goora vi Yehu, mulla vi Israyel, kay dum ala: Naŋaya, duray tuwaya.

⁹Yowas mulla vi Israyel gi sunda tam Amatsiya, mulla vi Yuda kay dum ala: Gu-cocona vi Libaŋ gi sunda tam gu-gamna vi Libaŋ: Kay dum ala: Naŋ ma vul goota vaŋ ca'a mi goora vanu. Muuriya ma fulla ma hay Libaŋ jika, nam tay gu-cocon gaa kuɗ selemu.

¹⁰Naŋ kolawa kay sum sa Edomna, kuɗ na'ta dikaŋ fokawa hiɗi suburta. May musaŋ hiɗi suburta na'ta vo hay ziyna vaŋu. Wulin lo naŋ min li duura ma laŋ joo'o, ma as bulakaŋ naŋ goyo, ma as ɓulak jafna vi Yuda goyo kaw kay mige?

¹¹May Amatsiya min humumɗi. Nala Yowas mulla vi Israyel kali vun duura; namu hiɗi Amatsiya mulla vi Yuda tupa dig tuwsiya hay Bet-Semes ta ka hay Yuda.

¹²Sum sa Israyella kol kay sum sa Yudana, gigekaw pir vo hay guɗukŋa valamu valamu.

¹³Hay Bet-Semes, Yowas vi Amatsiya mulla vi Yuda, goora vi Yowas, goora vi Akasiya. Nam co hay Yerusalem, nam co baŋana ir goldoŋ kis-fiɗi hay gulmunna vi Yerusalem, tun caw hay vun-galana vi Efrayim pa ta-ta tam vun-galan ma hay gefna.

¹⁴Nam yaw ora hiɗi doorota kaf, hiɗi doway ma ka hay ziyna vi Ma-Vatɗina, hiɗi ma hay timgil ma hay ziyna vi mulla; nam yaw sumun gorvo'o kaw, nam hotay hay Samariya may.

¹⁵Caw lopna vi Yowas ma hinina, sle ma nam lum kafna, lop ŋulo ma nam lumna, duur ma nam lum hiɗi Amatsiya mulla vi Yudana, kayni ka ɗoy hay ɗerwelda vi Labar-Ma-Liyna vi muliyana vi Israyel.

¹⁶Yowas miti kuɗ sumiyamu, nisi pum hay Samariya kat muliyana vi Israyel. Goora valamu Yerobowam ti mulda hay baŋalamu may.

¹⁷Amatsiya goora vi Yowas, mulla vi Yuda, li busat doogo yam vasl bugol mitta vi Yowas goora vi Yowahaz mulla vi Israyel.

¹⁸Caw lopna vi Amatsiya ma hinina, kayni ka ɗoy hay ɗerwelda vi Labar-Ma-Liyna vi muliyana vi Yuda.

¹⁹Nisi fok kulo kalamu hay Yerusalem, nam pir goy hay Lakis, ɗawni nisi cum goyo.

²⁰Nisi ziyim kulo kay kulumna, hotomay hay Yerusalem, nisi pum kat sumiyamu hay hoyok-ziyna vi David.

²¹Sum sa Israyel kaf vi Azariya, busata valam asay doogo yam karkiya, nisi tunum mulu hay baŋal bulum Amatsiya.

²²Azariya hot in Elat, nam hota' gaa kuɗ gaŋeraŋa vi Yuda, bugol mitta vi mulla.

²³Hay busata doogo yam vaslta vi Amatsiya goora vi Yowas, mulla vi Yuda kayni, Yerobowam goora vi Yowas mulla vi Israyel, ti mulda hay Samariya. Nam ti mulda ir busat dok-fiɗi yam kep.

²⁴Nam li sle ma joona kir Ma-Vatɗina. Suluk ma Yerobowam goora vi Nebat lumisna, ma nam kal sum sa Israyel hayamna, nam min ja jaram goy hiɗi kaynɗi.

²⁵Nam hot tun jaara vi Israyel fokay hay vun Hamat pa, ta-ta hay niy-lumna ma hay liy ma fulla, kuɗ yoboy ma Ma-Vatɗin Lawna vi Israyel dumu vun sa ma jobta valamu Yonas goora vi Amittay, hay Gat-Hefer.[9]

²⁶Kay Ma-Vatɗina wi sa Israyella kali hay lasta ŋolda hiɗi curoɗta ta suw yamda ta sum sa gorvona hiɗi sa buti goyna kaw ka kali hayta, sa ma co gut kuɗ sa Israyella kep kaw mayɗi.

²⁷May Ma-Vatɗina dikam may varay kay vatsi sesi goyo hay nagatɗi, nam butsi goyo hiɗi ɓam Yerobowam goora vi Yowas.

²⁸Caw lopna vi Yerobowam ma hinina, slen ma nam lum kafna, sle ŋulo ma nam lum vun duura, nanige Damas hiɗi Hamat ay jew vi Yuda may nam hotsi hay gaŋeraŋa vi Israyel, kayni kaf ka ɗoy hay ɗerwelda vi Labar-Ma-Liyna vi muliyana vi Israyel.

²⁹Yerobowam miti kuɗ sumiyamu, sa muliyana vi Israyel. Zakariya goora valamu ti mulda hay baŋalamu may.