Read Masana 2 MULIYANA 16 Bible Online

2 MULIYANA 16 - Masana bible

2 MULIYANA 16

¹Co hay busata doogo yam siɗiyata vi Peka goora vi Remaliya kayni, Ahaz goora vi Yotam mulla vi Yuda ti mulda.

²Busata vi Ahaz asay dok-ma' hay li ma nam ti mulda. Nam ti mulda hay Yerusalem ir busat doogo yam karkiya. Nam min li sle ma ɗigera vok ir Ma-Vatɗin Lawna ki bulum David nala noŋɗi.

³Nam poy hay hagata vi muliyana vi Israyel; goora valam noŋ kaw nam ŋalam goy hay kuta, nam tap kuɗ liwista vi jaf sum sa Ma-Vatɗin digiɗsi vok gurona vi Israyel.

⁴Nam li ɗifini, ŋal urdin kaw kayn kulo kay liyn ma ɗiŋiriŋŋa, kulo kay hiɗiyna, gaa kuɗ gu-goɗayna kaf kaw.

⁵Ki kayn nala Retsin mulla vi Siriya, hiɗi Peka goora vi Remaliya mulla vi Israyel yaway kulo'o kay tuɗ dur Yerusalem. Nisi ŋuy Ahaz, may nisi co a kol kalamɗi.

⁶Hay na'ta kayni, Retsin mulla vi Siriya kal Elat gaa kuɗ gaŋeraŋa vi Siriya. Yudiyana sa hay Siriya nam digiɗsi goyo, sum sa Siriyan co lak hay Elat. Nisi ka haya' lak ta-ta vaydi.

⁷Ahaz cuk sumun kat Tiglat-Pileser mulla vi Asiriya kay dum ala: Nan mi sa ma sunda vaŋu, goora vaŋ kaw; naŋaya, butan goyo hay ɓam mulla vi Siriya hiɗi mulla vi Israyel, sa ka yaway kulo'o katanu.

⁸Ahaz yaw doorota hiɗi ora ma ka hay ziyna vi Ma-Vatɗina, hiɗi timgilla vi ziyna vi mulla, nam li vulda-ɦawata tam mulla vi Asiriya hiɗi namu.

⁹Mulla vi Asiriya hum kayni; nam fokay kulo'o kat Damas, nam sla'a, sum sa haya'na nam kalsi hay Kir. Nam ci Retsin goyo may.

¹⁰Mulla Ahaz kali hay Damas, kay ŋaf hiɗi Tiglat-Pileser mulla vi Asiriya. Hay li ma nam wi giwin-ma-ɗifinna ma hay Damas, nam li ŋrata vi giwin-ma-ɗifin namna, ga' tam Uriyas kay nam ma kot giwin-ma-ɗifinna ŋray ca ki hena nala.

¹¹Mul-ma-ɗifinna Uriyas kot giwin-ma-ɗifinna ŋray ca hiɗi ŋaɓta vi giwin-ma-ɗifinna ma mulla gumtay hay Damas nala. Mul-ma-ɗifinna kotom jew hotta vi Ahaz hay Damas.

¹²Hay hotta valamu hay Damas, mulla wi giwin-ma-ɗifinna, nam co talamu, jik kulo kalamu;

¹³nam ŋal ɗifinna hiɗi sle ma vulda, yam mul kalamu, yam busuwna vi ɗifinna vi lop ma slugona kulo kay giwin-ma-ɗifinna.

¹⁴Giwin-ma-ɗifinna ma kawayna ma ka coli ɗiger vun ziyda vi Ma-Vatɗina nam jokom goyo, kay nam ma li coli jar giwin-ma-ɗifinna ma wulina hiɗi ziyna vi Ma-Vatɗinɗi; nam colom goy gal giwin-ma-ɗifinna ma wulina, hay gal ma gaana.

¹⁵Mulla Ahaz vul dit kayni tam mul-ma-ɗifinna Uriyas ala: Naŋ ma ŋal ɗifin ma graw culumta hiɗi ɗifin ma vulatitna kulo kay giwin-ma-ɗifinna ma ŋolla, ɗifin ma ŋal-goyna vi mulla hiɗi sle ma vulda valamu, ɗifin ma ŋal-goyna vi sum sa hay nagat kaf hiɗi sle ma vulda, mul ma nisi maramna ɦokgit kalamu, busuwna vi faray ma ŋalam ɗifinna, hiɗi faray ma ŋatam ɗifinna kaw nigi ma yamam talam kafe; may giwin-ma-ɗifinna ma kawayna, ma li lop kalam mi nanu.

¹⁶Mul-ma-ɗifinna Uriyas tap kuɗ sle ma mulla Ahaz dumna kafe.

¹⁷Mulla Ahaz to kaway ma beɗayna ma gaa kuɗumna goyo, tasa ŋulo ma tuni kalamna nam yawam goyo. Ŋarakŋa ma tuni kay luway ma yori kawayna nam slum goy gaa'a, tunum gaa kay hiɗiyna.

¹⁸Vun-galana vi sabatna ma kalaf hay ziyna vi Ma-Vatɗina, ma nisi inim hay ziyna, hay liyn ma mulla kal goyna, nam muɗumu, kuɗ mulla vi Asiriya.

¹⁹Caw lopna vi Ahaz ma hinina, sle ma nam lum kafna, kayni kay ɗoy hay ɗerwelda vi Labar-Ma-Liyna vi muliyana vi Yuda.

²⁰Ahaz miti kuɗ sumiyamu, nisi pum kat sumiyamu hay hoyok-ziyna vi David. Ezekiyas goora valamu ti mulda hay baŋalamu may.