Read Masana 2 MULIYANA 17 Bible Online

2 MULIYANA 17 - Masana bible

2 MULIYANA 17

¹Co hay busata doogo yam ma'ta vi Ahaz mulla vi Yuda kayni, Hoseya goora vi Ela ti mulda kay sa Israyella hay Samariya. Nam ti mulda ir busat zleeŋe.

²Nam li slen ma joo'o Kir Ma-Vatɗina, ŋray hiɗi muliyana vi Israyel sa ay jewenna noŋɗi may.

³Salmanasar mulla vi Asiriya co kay durumu, Hoseya mus gaa kuɗ gaŋeraŋa vi Salmanasar, nam vulum taara may.

⁴May mulla vi Asiriya wi ala Hoseya ka fok lawta, kay Hoseya cuk sumun kat So mulla vi Egipte. Nam min wurak taara hay busata busata mi mulla vi Asiriya loɗi. Mul ma Asiriyan junum hiɗi jaɓna, nam gum kalaf hay ziy ma daŋgayna.

⁵Mul ma Asiriyan ŋuy nagat kaf, nam kali dur Samariya, nam ŋuya'a ta-ta co busat ɦidi.

⁶Hay busata zleeŋeta vi Hoseya kayni, mulla vi Asiriya sli Samariya. Nam kal sum sa Israyella goy gorvo'o hay Asiriya. Nam tunsi hay Kalak, vun Sabor, niy-lumna vi Gozan, segena hay hoyok-ziyna vi sa Medena kaw.

⁷Van kayni co'o kay mige gurona vi Israyel li suluk kat Ma-Vatɗina Lawna visiya, nam ma yawsi ay goy hay nagata Egipte pa, ay gaa kuɗ gaŋeraŋa vi Farawn mulla vi Egipte pa, kay mige nisi li nar kuɗ lawayn mara'a.

⁸Nisi tap kuɗ data vi sum sa Lawn digiɗsi voksina, hiɗi gatta ta muliyana visi sa Israyella tuna' kisita.

⁹Gurona vi Israyel li slen ma may ŋaaɗina goy ŋayaya kat Lawna visiya, nisi in liyn ma kulo ɗiŋiriŋŋa hay hoyok-ziyna visi kafe, tun caw tam simdir ma ŋom hoyok-ziyna ta-ta hay hoyok-ziy ma donona.

¹⁰Nisi kot sle ma sli tuw sana hiɗi lawayn waana, lakam kulo kay liyn ma jiŋiliŋŋa, gaa kuɗ gu ma goɗayna kaw.

¹¹Ɗawni nisi ŋal urdina kulo kay liyn ma ɗiŋiriŋŋa kafe, ki jaf-sum sa Ma-Vatɗin digiɗsi voksin nala, nisi li sle ma joon kaw, hiɗi kayni nisi ɓulak dik Ma-Vatɗina.

¹²Lawayn ma waana ma Ma-Vatɗin disi ala nigi ma sunumɗina, nisi sunumu.

¹³Ma-Vatɗina di goy jewe tam sa Israyella hiɗi sa fi Yudana hay vun sa jobta hiɗi sa wi voksina kaf ala: Hotgiyay bugolgiya tam hagata vigi ta joota pa, ligi kuɗ gatta hiɗi dita vanu, tapgi hiɗi dikgi kaf kuɗ gatta ta nan joka'ay hay ɓam sa jobta kay vula' tam sumaygiya.

¹⁴May nisi min hum noŋɗi, nisi so dekdelsi goy ɗeŋe, ki sumaysiya sa min vi kuɗ Lawn Ma-Vatɗina visiɗin nala.

¹⁵May gatta valamu, bonota ta nam juna' hiɗi sumaysiya, hiɗi ɗekka-vokka valam kaf nisi min hum kuɗ kaynɗi, nisi tuɗi kuɗ sle ma waana, muɗ tuwsi goy waa'a kaw, nisi tap kuɗ jaf-sumuna sa ŋuyi galsina, sa Ma-Vatɗina telsiya kay nisi ma sli kuɗsiɗina.

¹⁶Vun-ma-gatna vi Ma-Vatɗina Lawna visi kaf nisi noyom goyo, nisi yor guro-luway kawayn ma', nisi kot lawayn ma waana vi Astarte*, nisi girif sle ma dukalawn kuɗ jafam kafe, nisi sun Baal.

¹⁷Nisi ŋal gurona visi sa jufayna hiɗi sa boyna hay kuta, nisi kal tuwsi hay gireyta hiɗi gul-yalda, nisi gus tuwsi goyo kay li sle ma joona kir Ma-Vatɗina, kay ɓulakam dikamu.

¹⁸Ki kayn nala Ma-Vatɗina dikam ɓulak ŋolo kat sa Israyella, nam gisi irsi goy gine'e vok iramu. Hin kayni mi jafna vi Yuda kep tuta.

¹⁹Jafna vi Yuda kaw min ŋom vun-ma-gatna vi Ma-Vatɗina Lawna visiɗi, nisi tap kayni kuɗ data vi sum sa Israyella ta nisi cola'ta.

²⁰Ma-Vatɗina noy jafna vi sa Israyel goy kafe, nam hotsi yisi gaa'a, nam hinsi goy hay ɓam sum sa vurumsina, hay dabta kayni nam digiɗsi goy gine'e vok iramu.

²¹Kay sum sa Israyella ja jarsi goy hiɗi jafna vi David, Yerobowam goora vi Nebat nisi tunum mulu, nam jasi jarsi goy hiɗi Ma-Vatɗina, nam kal sum sa Israyel hay suluk ma ŋolo.

²²Gurona vi Israyel kal tuwsi hay suluk ma Yerobowam lumna kafe; nisi min ja jarsi goyɗi,

²³ta-ta hay li ma Ma-Vatɗin digiɗsi goy vok iramu, ki nam di tam sa sunda valamu sa jobta nala. Ki kayn nala sum sa Israyella kali goy gorvo'o gine hiɗi nagata visiya hay Asiriya, nisi lakay goy ɗawni ta-ta vaydi.

²⁴Mul ma Asiriyan yaw sumunay goy hay Babilon, hay Kutha, hay Avva, hay Hamat, hiɗi Sefarvayim, nam laksi hay hoyok-ziyn Samariya hay baŋal gurona vi Israyel. Nisi lak hay Samariya, nisi lak hay hoyok-ziy ma kuɗ Samariyana.

²⁵Hay li ma nisi tun caw lak hay hoyok-ziy namna kayni, nisi may li nar kuɗ Ma-Vatɗinɗi, ki kayn nala Ma-Vatɗin cuk zlon ay katsiya kay cisi goyo.

²⁶Sumun tuɗ di mulla vi Asiriya ala: Jaf-sum sa naŋ yawsiya, tuɗ laksi goy hay hoyok-ziyna vi Samariya kayni, hagata ta girif lawn ma hay nagat na'tana nisi may wa'ɗi. Kuɗ na'ta kayni Lawn ka cuk zlon katsiya kay cisi goyo, kay nisi may wi yal ma girif lawn ma hay nagat na'tanaɗi.

²⁷Mulla vi Asiriya ka vul dit ala: Muliyan-sa-ɗifinna sa nigi yawsiyay gorvo ɗawn pana nigi ma vi mara kuɗsi kepe, nigi ma hotom musum ɗawni, kay nam ma hatsi yal ma sun Lawn ma hay nagat na'tana.

²⁸Kep jar muliyan-sa-ɗifinna sa yawsiyay gorvo hay Samariya pan co'o, nam mus hay Betel, nam hatsiya ir nanige nisi as li nar kuɗ Ma-Vatɗina.

²⁹May jaf-sum nisina gigekaw kot lawayna valamu valamu hay hoyok-ziyna ma nam musi hayna, nisi lakam hay ziy ma kulo ɗiŋiriŋŋa ma sum sa Samariyan kotomna.

³⁰Sum sa hay Babilonna kot Sukkot-Benot, sum sa hay Kut kot Nergal, sum sa hay Hamat kot Askima.

³¹Nisi sa hay Avva kot Nibkaz hiɗi Tartak; sa hay Sefarvayim ŋal gurona visi hay kuta kay subur sem Adramelek hiɗi Anamelek, lawayna vi Sefarvayim.

³²Nisi li nar kuɗ Ma-Vatɗina kaw, nisi lak muliyan-sa-ɗifinna vi liyn ma ɗiŋiriŋŋa, sa nisi yawsi jar sumun kaf, muliyan-sa-ɗifinna nisina li ɗifin kisi kayni hay ziy ma kulo hay liy ma ɗiŋiriŋŋa.

³³Ki kayn nala nisi li nar kuɗ Ma-Vatɗina, nisi sun lawayna visi ŋray ca kuɗ data vi sum sa marsi ay goy hay nagata visi pana kaw.

³⁴Ta-ta vaydi kaw nisi ka li kuɗ sle ma nisi ay lum jewna: Nisi li nar kuɗ Ma-Vatɗin noŋɗi, nisi may li kuɗ vun-ma-gatna visiɗi kaw, gatta hiɗi vun-ma-gatna ma Ma-Vatɗin vulum mi gurona vi Yakub ma nam yum ala Israyella nisi min hum kuɗum noŋɗi kaw.

³⁵Ma-Vatɗin jun bonot hiɗi nisiya, nam ka disi ala: Nigi ma li nar kuɗ lawayn mara'a noŋɗi, nigi ma dab vokgi gaa voksi noŋɗi, nigi ma sunsi noŋɗi, nigi ma lisi ɗifin noŋɗi kaw.

³⁶May nigi ma li nar kuɗ Ma-Vatɗina, nam ma kalgiyay goy hay nagata Egipte pa, hiɗi donota ŋolda, hiɗi ɓalam goy meɗiya kaw, nigi ma girifimti mi namu, nigi ma li ɗifin malam nam kepe.

³⁷Dita valamu nigi ma ŋoma'a li kuɗa'a kaw dok-doko, sle ma colina, gatta hiɗi vun-ma-gatna valamu ma nam ɗom kigina nigi ma li kuɗumu, may nigi ma li nar kuɗ lawayn maraɗi.

³⁸Yigi ma jok bonota ta nan juna' hiɗi nigitɗi, nigi ma li nar kay lawayn maraɗi kaw.

³⁹May nigi ma li nar kuɗ Ma-Vatɗina, Lawna vigiya; nala nam ma butgi goy hay ɓam sa gawt kigi kafna.

⁴⁰Nisi min hum noŋɗi, nisi tap kayn kuɗ sle ma nisi ka lum jewna.

⁴¹Jaf-sum nisin li nar kuɗ Lawn lay, sun sle ma ceɗayn lay; gurona visiya hiɗi guro-ŋolona visiya lum ta-ta vaydi kayni mi sle ma sumaysi lumisna.