Read Masana 2 MULIYANA 18 Bible Online

2 MULIYANA 18 - Masana bible

2 MULIYANA 18

¹Co hay busata ɦidita vi Hoseya goora vi Ela, mulla vi Israyel kayni, Ezekiyas goora vi Ahaz mulla vi Yuda tun mulu.

²Hay li ma nam muɗ mul kayni busata valam asay dok-ma' yam vasl. Nam ti mulda ir busat dok-ma' yam zleeŋe hay Yerusalem. Sulum ya' Abi, goota vi Zakariya.

³Nam li sle ma ŋaana vok ir Ma-Vatɗina, ŋray noŋ ca ki sle ma bulum David lumna nala.

⁴Liyn ma kulo ɗiŋiriŋŋa nam ɦom goyo, sle ma sli tuw sana ma inina nam ɦom gaa'a, to lawayn ma waan gaa'a, guy-kawayna ma Musus kotomna nam tom goy pek-pek', kay ta-ta vaydi gurona vi Israyel ŋal urdin kayn vok iramu, nisi ka yum ala Nehustan.

⁵Nam tun vida valamu hay Ma-Vatɗina, Lawna vi Israyel, jar muliyana vi Yuda kaf, sa co jewemna hiɗi sa co bugolomna kaw, mara ma ŋray ki nam nala mayɗi.

⁶Nam jun tuwam tam Ma-Vatɗina, min ja jaram goy hiɗi Ma-Vatɗin noŋɗi, nam li kuɗ vun-ma-gatna ma Ma-Vatɗin dum mi Mususna.

⁷Ma-Vatɗina li hiɗi Ezekiyas, slen ma nam min lumna kaf li hay liyamu. Nam fok kulo'o kat Mulla vi Asiriya, min mus gaa kuɗ gaŋeraŋa valam loɗi.

⁸Nam ci sa Filistina ta-ta hay Gaza, nam ti nagata visi ɓuraŋi, tun caw ay hay simdir ma ŋomda pa ta-ta hay hoyok-ziyn ma donona.

⁹Hay busata fiɗita vi mulla Ezekiyas, ti busata siɗiyata vi Hoseya goora vi Ela mulla vi Israyel kaw. Hay na'ta kayni, Salmanasar mulla vi Asiriya fokay kulo'o kay dur Samariya, nam ŋuya'a.

¹⁰Nam sla' jar busat ɦidi. Nam sla' kayni hay busata karkiyata vi Ezekiyas, ti busata zleeŋeta vi Hoseya mulla vi Israyel kaw.

¹¹Mul ma Asiriyana kal sum sa Israyel gorvo'o hay Asiriya, nam tunsi hay Kalak, kel Sabor, niy-lumna vi Gozan, segena hay hoyok-ziyna vi sa Medena kaf kaw,

¹²kay nisi min hum vun Ma-Vatɗina Lawna visi noŋɗi, kay nisi raw bonota ta jarsi hiɗi namta goyo, kay sle ma Musus sa ma sunda vi Ma-vatɗina dumna nisi min humumɗi, min li kuɗumɗi kaw.

¹³Co hay busata doogo yam fiɗita vi mulla Ezekiyas kayni, Sankerib mulla vi Asiriya co'o kay dur hoyok-ziy ma donona vi Yuda kaf, nam yawamu.

¹⁴Ezekiyas mulla vi Yuda gi sunda kay di tam mulla vi Asiriya hay Lakis ala: Nan lum kayn mi law ma joo'o, vaŋ tuwaŋ goy gine hiɗi nanu, la naŋ tunum kan mige kaw, nan ma ziyimu. Ki kayn nala mul ma Asiriyana tun taara kay Ezekiyas, mulla vi Yuda: Doorota ir talente* kis-ɦidi, or ir talente dok-ɦidi.

¹⁵Doorota kaf ta ka kalaf hay Tempella hiɗi ta hay timgilla vi ziyna vi mulla kaw Ezekiyas vulumti kafe.

¹⁶Ki kayn nala Ezekiyas mulla vi Yuda pat or ma beɗayna ma nam duk vun-ziyn hiɗi namna kulo kaf, hiɗi ma duk vun Tempella vi Ma-Vatɗin hiɗi namna kaw, nam vulum mi mul ma Asiriyana.

¹⁷Hay Lakis pa, mul ma Asiriyan cuk Tartan, Rab-Saris hiɗi Rabsake kat mulla Ezekiyas, hiɗi sojen kuɗsi dono ŋolo. Nisi kaliya, nisi co hay Yerusalem. Hay li ma nisi co ɗawni, nisi lak kat ɦoora vi goloŋga ŋolda, hay hagata ta tuɗ hay fulda vi sum sa muz sligara.

¹⁸Nisi yi mulla aya; nala Eliyakim, goora vi Hilkiya, ma ŋolla hay ziyna vi mulla, nam kali katsiya, hiɗi Sebna ma ɗo slena, hiɗi Yowah goora vi Asaf, ma ŋom sle ma ɗoyna.

¹⁹Rabsake di tisiya: Humgi dita vi mul ma ŋolla, mulla vi Asiriya: Vida vaŋ na'ta naŋ tuna' kayn kay gige?

²⁰Naŋ ka di ala a san li duur kayni, nam ma li ŋra-vunda, fi dono'o kaw. May yawn mi yoboy ma hay simeɗ ɦawa. Naŋ fok kulo kan kayni, tun vida vaŋ kayn kay gige?

²¹Humaŋu, naŋ tun vida vaŋ kayn kay Egipte, Egipte sa naŋ min ala nisi gut kuɗaŋu kayni nisi ŋray ca ki cerew ma kusin nala, sa ma ret ɓaŋ gaa kalamna nam duɓum kulo ɦuluk'; Farawn mulla vi Egipte kaw nam nala kay sum sa tun vida visi kalam kafna.

²²Kla, nigi ma dan ala nigi tun vida vigi kayni kay Ma-Vatɗina Lawna vigiya, may kayni mi Lawn namna ma Ezekiyas to liyn ma ɗiŋiriŋŋa hiɗi giwin-ma-ɗifinna valam goyna, hay li ma nam di tam jafna vi Yuda kaf hiɗi Yerusalem ala: Nigi ma girif gaa vok giwin-ma-ɗifinna namna zawni hay Yerusalem, naɗi su?

²³Wulin kayni, jobaŋ kulumay tam mulanna, mulla vi Asiriya, nala nan ma vulaŋ kulumay birim ma', la naŋ kay tuwaŋ as fi sum sa ɓe kalamu.

²⁴hiɗi kulumay namna, naŋ fi a digiɗ soje ma gooro jar sa sunda vi mulanna su? Naŋ tun vida vaŋ kay Egipte kayni kuɗ keke-ma-duura hiɗi sa ɓe kulumayna.

²⁵Naŋ var ala nan co kay ɓulak liyn tan kayni bay minda vi Ma-Vatɗin su? Kay Ma-Vatɗin dan ala, tuɗaŋ dur nagat na'ta, naŋ ma to' gaa'a.

²⁶Eliyakim goora vi Hilkiya, hiɗi Sebna hiɗi Yowah di tam Rabsake ala: Naŋ ma law tuma'a hiɗi vun Arameena, numa as humumu, naŋ ma law tuma'a hiɗi vun yudiyanɗi kay sum sa dakay kulo kay gulmunna ma humɗi.

²⁷Rabsake hotsi dit ala: Mulanna ganay kayni kay nan ma law taŋ naŋu hiɗi mulaŋŋa tuta su? May tam sum sa molay kulo kay gulmunna tani, nisi sa (hay buur ma vokŋa) ma ti suɗoysiya ci zumursiya hiɗi nigi kawn lakŋɗi su?

²⁸Ki kayn nala Rabsake ɦur kulo goboyo, nam siwel hiɗi delem kulo ŋolo hiɗi vun Yudiyan ala: Humgi dita vi mul ma ŋolla, mulla vi Asiriya!

²⁹Mulla vi Asiriya ka di ala: Hin Ezekiyas ɗutgiɗi, kay nam as butgi goy hay ɓanɗi.

³⁰Hin Ezekiyas muɗgi a nigi tun varta vigi kay Ma-Vatɗin ala nam ma butgi goyoɗi, hoyok-ziyna vigi tani ma vulis goy hay ɓam mulla vi Asiriya.

³¹Humgi kuɗ Ezekiyas noŋɗi; kay mulla vi Asiriya di ala: Toygi hiɗi nanu, vulgi tuwgi hay ɓanu, nala gigekaw ma ti gulda-guldana hiɗi gu-gumna valamu, gigekaw ma ci niy kaara valamu may,

³²ta-ta hay buur ma nan ma ma'a, nargi hay nagata ta ki nagata vigi nala, hay nagata ta alkamarena hiɗi vinna ka haya, nagata vi funa hiɗi gulda-guldana, nagata ta gu-olive ma mula hiɗi yumda ka haya, nala nigi ma lak iriya, nigi ma mitɗi. Humgi kuɗ Ezekiyas noŋɗi, kay nam as ɗutgi ala Ma-Vatɗin as butgi goyo kla.

³³Lawayna vi jaf-sum segena but nagata visi goy hay ɓam mul ma Asiriyan but su? Lawayna vi Hamat hiɗi Arpad ka arige?

³⁴Lawayna vi Sefarvayim, Hena hiɗi Ivva ka arige? Nisi but Samariya goy hay ɓan but su?

³⁵Jar lawayna vi naga namna kaf lakŋi, la mara ma but nagata valam goy hay ɓan mayɗi ni, Ma-Vatɗin as but Yerusalem goy hay ɓan ɗawn hiɗi yal mige?

³⁶Sumun zan ɦim', min hotom dit kep noŋɗi; kay mulla vul dit ala nisi ma hotom dit noŋɗi.

³⁷Bugol kayni Eliyakim goora vi Hilkiya, ma ŋolla hay ziyna vi mulla, Sebna ma ɗo slena, hiɗi Yowah goora vi Asaf, ma ŋom sle ma ɗoyna kaw, nisi co kat mulla, hiɗi sligara visi goy jetiya, nisi maram dita vi Rabsake.