Read Masana 2 MULIYANA 19 Bible Online

2 MULIYANA 19 - Masana bible

2 MULIYANA 19

¹Hay li ma mulla Ezekiyas hum kayni humna, nam jet sligara valam goyo, ɗut sligar-bolla talamu, kali hay ziyda vi Ma-Vatɗina.

²Eliyakim ma ŋolla hay ziyna vi mulla, Sebna ma ɗo slena hiɗi sa maariyana vi muliyan-sa-ɗifinna kaw, hiɗi bolla ɗuti katsiya, nam cuksi kat Esaya ma jobta, goora vi Amos.

³Nisi ka dum ala: Ezekiyas di ala, buurta vaydit kayni ti buur ta yorta, buurta vi kitata hiɗi zulota; kay guro sa sumaysi goboy puksi goyn kaw donosi ma ersi mayɗi.

⁴Kla, yoboy ma mul ma Asiriyan gi sa ma sunda valam Rabsake aya, kay ŋul Ma-Vatɗin ma irina hiɗi namna, Ma-Vatɗin Lawna vaŋu humi kalam klasige. Ma-Vatɗin ma ka kitat kalamu kuɗ yoboy ma nam humumna klasige. Wulin kayni siɗawaŋ kay dir sum sa hinna.

⁵Sa sunda vi mulla Ezekiyas kali kat sa ma jobta Esaya.

⁶Esaya ka disiya: Nigi ma di tam mulgin ala: Ma-Vatɗin ka daŋ ala yoboy ma naŋ humumna, ma sa sunda vi mulla ma Asiriyan ŋul semda van hiɗi namna naŋ ma li nar kalamɗi.

⁷Ŋusta ta nan min kala' hayamta ɗawni, labar mara ka'a, la nam humumawa, nam ma hot hay nagata valamu, nan ma calam hiɗi kew-gaferaŋa kuɗum vo hay nagata valamu.

⁸Rabsake hot goy bugolomu, nam fi kayni mulla vi Asiriya ka dur Libna, kay nam hum ala mulla hin Lakisawa.

⁹Kay mulla vi Asiriya humi labara ala Tirhaka mulla vi Etiopiya ka tuɗay hay hagata kay durumu. Nala mulla ma Asiriyana gi sunda tam Ezekiyas kay dum ala:

¹⁰Nigi ma di tam Ezekiyas mulla vi Yuda ala: Naŋ tun vida vaŋ ŋol kayn kay Lawna vaŋu, hiɗi varta ta ala nan ma sli Yerusalemɗita; may hin tuwaŋ ɗut naɗi.

¹¹Humaŋu, naŋ humi labara kay sle ma muliyana vi Asiriya lum tam naga hen kafna, nanige numa ɓulak nagana vi sum segen goyo, may naŋu, naŋ ma hulot goy may su?

¹²Jaf-sum sa sumiyan ɓulak nagana visi goyna, ki Gozan, Haran, Retsef, hiɗi gurona vi Edena sa hay Telasar kaf, lawayna visi butsi goy hay ɓan su?

¹³Mulla vi Hamat, mulla vi Arpad, hiɗi mulla vi hoyok-ziyna vi Sefarvayim, hiɗi Hena, hiɗi Ivva, nisi wulini ka arige?

¹⁴Ezekiyas sli ɗerwelda hay ɓam sa mar sunda, nam jaŋa' goyo. Bugol kayni nam jik kulo'o hay ziyna vi Ma-Vatɗina, nam bisleɗa' goyo vok ir Ma-Vatɗina,

¹⁵nam ka siɗaw tam Ma-Vatɗin ala: Ma-Vatɗina Lawna vi Israyel, ma musi kulo kay Kerubena*, mulda gaa kay nagat kaf kayni Lawna va' mi naŋ kepe, naŋu mi ma li wuralawna hiɗi nagata.

¹⁶Ma-Vatɗina, jak humaŋ gaa'a humaŋu, Ma-Vatɗina, mal iraŋ goyo, ɗuwaŋu, humaŋ yoboyna vi Sankerib ma nam gi Rabsake aya kay ŋulaŋ naŋ Lawn ma irin tige.

¹⁷Awa, Ma-Vatɗina, nan wi ala muliyana vi Asiriya ɓulak jaf-sumun goy ŋolo, to nagan gaa ŋolo kaw,

¹⁸nisi cuk lawayna vi sum segen hay kuta, may nisi may si laway gasiɗi, mi sle ma sumun ceɗem hiɗi ɓisi ɦawa; mi guna, mi hiɗiyna kaw, kay na'ta nisi vatam goyo.

¹⁹Wulin kayni, Ma-Vatɗina, Lawna vuma'a, butma goy hay ɓam Sankerib butge! A muliyana vi nagat kaf ma wi ala Lawn mi naŋ kepe, Ma-Vatɗina.

²⁰Bugolda Esaya goora vi Amos gi sunda tam Ezekiyas kay dum ala: Ma-Vatɗina Lawna vi Israyel ka di ala: Siɗawta vaŋ tanu kuɗ Sankerib mulla vi Asiriya nan huma'awa.

²¹Kayni mi yoboyn ma Ma-Vatɗin dum kalamna: Na' ka burahaŋu, na' ka panaŋu, Wayata ta peldetta, goota vi Siyon; na' ka gla' ya' bugoloŋu, goota vi Yerusalem.

²²Sa ma naŋ ŋulumu, cen kuɗum kaw kayn mi gige? Naŋ pat delaŋ kulo ŋol kayn kat gige? Naŋ tun yaŋ kulo tiriŋ' kat ma peldetna vi Israyel.

²³Hiɗi del sa sunda vaŋu naŋ ŋul Bum-Sumunawa. Naŋ di ala: Hiɗi keke-ma-duura van ŋolo, nan jik kulo kay sin-hiɗiyna, sin Libaŋ ma vatayna; sin gu-gamna vi Libaŋ nan ma kaam gaa'a, nan ma ka gu-siprena valam ma ŋaana, nan ma co ta-ta kulo sinamu, juruta valam ŋray ca ki gu ma vuɗna nala,

²⁴nan jugoɗa, nan ci niy ma pullawa, niy-lumna vi Egipte kaf nan ma tosom hiɗi cita-senu.

²⁵Naŋ may humi ala sle namna nan kotom kay goy jew pa ɗisu? Nan kotomi kayni hay liyn ma jewn pa ɗisu? Wulin kayni nan vul hagatawa kay sle namna vunam hoba, kay naŋ to hoyok-ziy ma ŋulon gaa'a.

²⁶Sum sa hay nagat na'tina donosi mayɗi, muɗi nari, viy goyo kaw; Nisi ki us ma hay sinen nala, ki hat ma ŋulomna nala, ki us ma day kulo hay yam ziyn nala, ki alkamarena ma so goyo jew a so'olom tun caw cuk gaan nala.

²⁷May nan wi'e citige naŋ mus gaa'a, citige naŋ kal goyo, citige naŋ kal kalafi, citige naŋ muɗi ɦiy ŋolo katanu kaw,

²⁸Kay naŋ muɗi ɦiy katanu, Kay ɦiyda vaŋu co ta-ta hay humanu, Nan min cuk jaɓna van hay cinaŋu, cuk jamata van hay vunaŋ kaw, nan min hotaŋ hay hagata ta naŋ may haya' pata.

²⁹Kayni ti ɗekka ta hini taŋ naŋu: Cukudayni nigi ma tum mi jaf ma yaki gaana. Hay busata ma'ta nigi ma tum mi jaf ma day kay tuwamna; may hay busata ɦidita nigi ma cuk jafna, nigi ma feɗemu, nigi ma pi gulda-guldana, may nigi ma tum vuɗamu.

³⁰Caw sle ma suɗ goy kuɗ jafna vi Yudana, caw sle ma hinna so'olom ma cuk gaa'a, yalam ma cuk goyo may.

³¹Kay caw ma hinina ma kali goy hay Yerusalem pa, dirsi ma hulot goyna ma may goy hay hiɗiyta vi Siyon pa. Kayni mi va ma ciwerta vi Ma-Vatɗina vi vok-ma-duura ma lumu.

³²Kay mige Ma-Vatɗina ka di ki kayn nala kay Asiriya: Nam as kali kulo hay hoyok-ziyn tan noŋɗi, nam as gi goorhoyo goy noŋɗi, nam as co hiɗi maray noŋɗi, nam as ŋuy Yerusalem noŋɗi.

³³Nam ma hot hay hagata ta nam may haya' pata, nam ma kal kulo hay hoyok-ziyn tan noŋɗi, din mi Ma-Vatɗina.

³⁴Nan ma ŋom hoyok-ziyn tani kay suɗum goyo, kuɗan nanu, kuɗ David ma sunda vanu.

³⁵Hay henjet na'ta kayni, sunda-wuralawna vi Ma-Vatɗin kali goyo, sum sa hay kaŋŋa vi sa Asiriyana na' ci sumun kuɗsi birim kis-ɦidi diram dok-glafandi yam vasl. Hay li ma sumun fok kulo graw culumta kayni, sumun ka gaa kay nagat miti folol'

³⁶Nala Sankerib mulla vi Asiriya but kaŋŋa valam kulo'o, kaliya, hotay hay Ninive.

³⁷Fattiɗeŋ kep nam ka kalaf hay ziyna vi Lawna valam Nisrok kay li girifta, hay na'ta kayni gurona valam Adramelek hiɗi Saretser calam goy hiɗi kew-gaferaŋa, nisi pir hay nagat Ararat may. Goora valam Esar-Haddon ti mulda hay baŋalamu may.