Read Masana 2 MULIYANA 2 Bible Online

2 MULIYANA 2 - Masana bible

2 MULIYANA 2

¹Hay li ma Ma-Vatɗin sli Eliyas kulo hay dukalawn hay ɦiwliŋŋa kayni, nisi ka kuɗ tuwsi hiɗi Elise kay tuɗ hay Gilgal.

²Eliyas di tam Elise ala: Nan siɗawaŋu kay naŋ ma mus tani, kay Ma-Vatɗin min gan sunu ta-ta hay Betel. Elise hot dita: Hay sem Ma-Vatɗin ma Irina, hay semda vaŋ kaw, nan as hinaŋ noŋɗi. Nala nisi kali kuɗ tuwsiya hay Betel.

³Gurona vi sa jobta sa hay Betel kali goyo kir Elise, nisi ka dum ala: Vaydi kayni Ma-Vatɗin ka sli mulaŋŋa kulo talamu, naŋ wi nala su? Nam hotsi dit ala: Bagi vungiya, nan kaw ka wi'e.

⁴Eliyas di tam Elise: Nan siɗawaŋu kay naŋ ma mus tani, kay Ma-Vatɗin min gan sunu hay Yeriko. Nam hot dita: Hay semda vi Ma-Vatɗin ma irina hay semda vaŋ kaw, nan as hinaŋ noŋɗi. Nala nisi ma' kaf tapay kuɗ tuwsiya, nisi co hay Yeriko.

⁵Gurona vi sa jobta sa ay hay Yeriko co kat Elise, nisi di talamu: Naŋ wi ala Ma-Vatɗina min sli mulaŋŋa vaydi kulo kaŋu su? Nam hot dit ala: Nan kaw ka wi kayni, bagi vungiya.

⁶Eliyas di talamu: Nan siɗawaŋu, musaŋ tani, kay Ma-Vatɗina min gan goy kel Yordan. Nam hot dita: Hay semda vi Ma-Vatɗina, hay semda vaŋ kaw, nan as hinaŋ noŋɗi. Nisi ma' pete kali kuɗ tuwsiya hay hagata.

⁷Sum sa jufayn dok-vasl jar gurona vi sa jobta co'o, nisi lak goy gine'e, voksi ɗiger, Eliyas hiɗi Elise lak kel niy-lumna Yordan may.

⁸Bugol kayni Eliyas yaw sligara valamu, ɗutumu, nam ci niyna, niyn iram ɓuraw goyo. Liyn so goyo, nisi jik hayamu kay kal kulo gal hena.

⁹Hay li ma nisi ɦaw kulo ɦawna, Eliyas di tam Elise: Naŋ ma joban kay va ma naŋ min ala nan ma lum taŋu, jew a nan ma sliys kulo gine hiɗi naŋu. Elise hot dita: Nan siɗawaŋ kayn ala ŋusta vaŋ ta hayaŋga ma li hayan sem ma'!

¹⁰Eliyas di'e: Naŋ jobom kayn mi va ma lop ŋolo. May hay li ma slan kulon ɗawn la naŋ wanawa hiɗi iraŋu, van kayni ma li taŋu ki kayn nala; la may naɗi, van kayni as li taŋɗi may.

¹¹Hay li ma nisi ka tuɗ voksi hiɗi kaslan vunsiya, keke-ma-duura ma tuwam doy kuwa, hiɗi kulumay ma tuwam doy kuwa kaw munsi jarsi goyo, ki kayn nala Eliyas kali kulo hay wuralawna jar ɦiwliŋŋa.

¹²Elise ka ɗuwa, ka siwel ala: Bunu, bunu! Keke-ma-duura vi Israyel hiɗi sum sa ɓey kalamna! Nam viy goy kiramu. Nala Elise yaw sligara valamu, nam jetem iram goy ma',

¹³sligar ma Eliyas hinim cukay gaana nam yawamu. Nam hot bugolomu, kal col kel niy-lumna Yordan;

¹⁴sligar ma Eliyas hinim cukay gaana nam yawamu, nam ci niyna ka di ala: Ma-Vatɗina Lawna vi Eliyas ka arige? Nam kaw, nam ci niyna, niyn ɓuraw goyo, nam jik hayamu, kal kulo gal hena may.

¹⁵Gurona vi sa jobta sa ay lakay vokom ɗiger hay Yerikona, hay li ma irsi wumu, nisi di'e: Ŋusta vi Eliyas cukawa kay Elise. Nisi kali ŋafam iramu, nisi girif gaa vokomu kaw.

¹⁶Nisi di talamu: Humaŋu, jar sa sunda vaŋ tani, sum sa kursulina ka dok-vasl; naŋ min ala nisi ma tuɗ gar mulaŋŋa su? La li ŋalɗi, ŋusta vi Ma-Vatɗin kal hiɗi nam kayni, gum kulo kay hiɗiya lebo hay liy ma beɗ klasige. Elise hot dit ala: Nigi may cuksiɗi.

¹⁷May nisi so tuwsi talam ta-ta, nala nam ala nigi cuksiya. Nisi cuk sum sa dok-vaslna, nisi gar Eliyas ta-ta ir buur ɦidi, nisi may fumɗi.

¹⁸Hay li ma nisi hotay kat Elise hay Yeriko, nam ka disi ala: Nan digi ala nigi may tu'ɗi ɗisu?

¹⁹Sum sa hay hoyok-ziyna di tam Elise ala: Sam-ŋolla, hoyok-ziyn tan kayni ŋaa'a kay li ziy haya ki naŋ ka wum nala, may niy ma hayamna joo'o, nagat getiya kaw.[1]

²⁰Elise di'e: Marangi tasa-beɗayna ma wulina, cukgi mandan haya. Nala nisi maramta may.

²¹Nam tuɗ hay liyn ma niyn laway goy hayam pana, cuk mandan haya, ka di ala: Ma-Vatɗin di'e: Nan muɗ niyn kayni goy ŋaa'a, mitta ma co kuɗum loɗi lay, getda ma co kuɗum pa loɗi lay.

²²Ki kayn nala niyn muɗi goy ŋaa'a, ta-ta hay buur ma wulinna, kuɗ yoboy ma Elise dumna.

²³Nam fokis ɗawni kal Betel, hay li ma nam ka tuɗ hay haga ma jik kulona, gurosguray sa gurayna cukay goy hay hoyok-ziyn pa, tun caw cen kuɗumu. Nisi ka dum ala: Jikaŋ kulo'o, yaŋ kuloti'! Jikaŋ kulo'o, yaŋ kuloti'!

²⁴Nam muɗ iram bugolomu kay sarsiya. Nam beɗsi hay semda vi Ma-Vatɗina. Ki kayn nala ursena[2] ma' cukay goy kuɗ jurut pa, jet gurosgurayn goy kuɗsi dok-fiɗi yam ma'.

²⁵Hay ɗawnis pa nam kali kulo kay hiɗiyta vi Karmel, ɗawni pa lo nam hot hay Samariya.