Read Masana 2 MULIYANA 20 Bible Online

2 MULIYANA 20 - Masana bible

2 MULIYANA 20

¹Hay na'ta kayni, moyn vi Ezekiyas, goboy cum mati. Sa ma jobta Esaya goora vi Amos co katalamu, ka dum ala: Ma-Vatɗina ka di ala: Gaŋ bolaŋ mi ziyna vaŋu, kay naŋ ka mita, naŋ ma mus iri loɗi.

²Ezekiyas muɗ iram goy kat tuw-ziyda, ka siɗaw tam Ma-Vatɗin ala:

³Hi! Ma-Vatɗina, humaŋ ma gaŋ ala nan poyay vok iraŋu hiɗi ɗigerta, hiɗi dikga ta gasita, nan li sle ma ŋaana vok iraŋu kaw! Ezekiyas tiy hiɗi zimiyn ŋolo.

⁴Esaya kali goyo, hay li ma nam goboy co hay wur-daŋŋa kayni, Ma-Vatɗina ka dum yoboyna ala:

⁵Hotaŋu, daŋ mi Ezekiyas ma ŋolla vi sumuna van ala: Lawna vi buŋ David ka di ala: Nan hum siɗawta vaŋawa, nan wi zimiy ma jaŋ goy kiraŋŋawa. Humaŋu, nan min yeraŋ goyo, co hay buurta ɦidit ɗawni, naŋ ma jik kulo'o hay ziyna vi Ma-Vatɗina.

⁶Nan min cuk busat doogo yam vasl vun buura vaŋu. Nan ma butaŋ goyo, naŋu hiɗi hoyok-ziyn tani, nan min butgi goy hay ɓam mul ma Asiriyana, nan ma ŋom hoyok-ziyn tani, kuɗan nanu, kuɗ David ma sunda vanu kaw.

⁷Esaya di'e: Sligi vuɗna vi gu-gumna ma beɗay hambulla kepe, nisi slumu, lum vun mil-goɗoŋŋa, Ezekiyas muɗi ŋaa'a may.

⁸Ezekiyas di tam Esaya ala, va ma min ɗek tan ala nan ma muɗ ŋaa'a, hay buurta ɦidita kaw nan ma jik kulo hay ziyna vi Ma-Vatɗinan mi mige?

⁹Esaya dumu: Kayni ti ɗekka ta Ma-Vatɗin min li taŋu, kay naŋ ma wi ala nam ma hob vun va ma nam dumna: Ɗuŋus-fatta ma ter voka' kay vun-ziy ma jikŋa doogo lebo hot goy bugola' kay vun-ziy ma jikŋa doogo su?

¹⁰Kay a ɗuŋus-fatta ter voka'a kay vun-ziy ma jikŋa doogo kayni mi va ma goor ɦawa, may ŋaat kayni na' ma hot goy bugola'a kay vun-ziy ma jikŋa doogo.

¹¹Ki kayn nala Esaya ma jobta siɗaw Ma-Vatɗina, nam hot ɗuŋus-fatta goy bugola' kay vun-ziy ma jikŋa vi Ahaz doogo, hay liyn ma ɗuŋus-fatta ka jikay gaa hayamna.

¹²Hay liy namna kayni, Berodak-Baladan, goora vi Baladan mulla vi Babilon gi ɗerwelda mi Ezekiyas, vulum sle kaw, kay nam humi labara kay moyna vi Ezekiyas.

¹³Ezekiyas vi rogoy nisina, liyn ma slena valam ma tek[10] ŋolla ka hayna nam ɗeksita, doorota hiɗi ora, aromatna hiɗi mul ma ŋaana, sle-ma-duura valamu, slen ma ka hay timgilla valam kafna: Va mara ma hin hay ziyna vi Ezekiyas hiɗi sle ma ir valam kafna ma nam ɗeksit kirsiɗi mayɗi.

¹⁴Bugolda Esaya ma jobta co kat mulla Ezekiyas, nam ka dum ala: Sumun kayni daŋ mige? Nisi may arige pa? Ezekiyas hot dita: Nisi may gine'e, hay nagata Babilon pa.

¹⁵Esaya hot di lo: Nisi wum kalaf hay ziyna vaŋ mi mige? Ezekiyel hot dit ala: Nisi wi sle ma kalaf hay ziyna van kafe. Va ma hay timgilla vanu ma nan ɗekem kirsiɗi mayɗi.

¹⁶Nala Esaya di tam Ezekiyas: Humaŋ yoboyna vi Ma-Vatɗina:

¹⁷Humaŋu liyn ka co'o: Hay liy namna ɗawni, slen ma hay ziyna vaŋu, slen ma sumiyaŋ tokomu ta-ta hay buur ma vaydina, nisi ma kalam goy hay Babilon, va mara ne' kaw ma hinɗi, din Ma-Vatɗina.

¹⁸Nisi ma yaw gurona vaŋu, gurona vaŋ sa may goy hay naŋ pana, sa naŋ vuɗsina, nisi ma lisi sa patayna, kay laksi sun hay ziyna vi mulla vi Babilon.

¹⁹Ezekiyas hot dit mi Esaya ala: Yoboyna vi Ma-Vatɗin ma naŋ dumna kayn nam ŋaa'a. Nam hot di lo ala: Sle'ta hiɗi toyta ma li'e hay buura vi irita van kaf naɗi su?

²⁰Caw lopna vi Ezekiyas ma hinina, sle ŋulo ma nam lum kafna, nanige nam jugoɗ goloŋga ŋolda hiɗi ɦoora, nanige nam gi niyn kulo hay hoyok-ziyna, kaf kayni ka ɗoy hay ɗerwelda vi Labar-Ma-Liyna vi muliyana vi Yuda ɗisu?

²¹Ezekiyas miti kuɗ sumiyamu, goora valam Manase ti mulda hay baŋalamu may.