Read Masana 2 MULIYANA 22 Bible Online

2 MULIYANA 22 - Masana bible

2 MULIYANA 22

¹Yosiyas tun mul kayni busata valam asay glafandi, nam ti mulda ir busat dok-ɦidi yam kep hay Yerusalem. Sulum ya' Yedida, goota vi Adaya ma Boskatna.

²Nam li slen ma ɗigera vok ir Ma-Vatɗina, nam poy hay hagata vi bulum David noŋ dem-dem', min cal goy gal jufɗi, gal gulɗi lay.

³Co hay busata doogo yam glafandita vi mulla Yosiyas kayni, Safan ma ɗo slena, goora vi Atsaliya, goor-ŋolona vi Mesullam, mulla gum kalaf hay ziyda vi Ma-Vatɗina, ka dum ala:

⁴Tuɗaŋ kat Hilkiya mul ŋol ma-ɗifinna, dum ala nam ma tok gurjuta ta sumun mara' hay ziyna vi Ma-Vatɗina, gurjuta ta sum sa ŋom vun-galan tara' hay ɓam sumuna.

⁵Gurju na'ta vula' hay ɓam sum sa lop kotna vi ziyda vi Ma-Vatɗina vulsi hay ɓisiya, gurju na'ta nisi ma tuna'a kay vula' mi sum sa kot ziyda vi Ma-Vatɗina.

⁶Kay sum sa har guna, sa yaw slen kuɗsina, sa jak ziyna, kay gusta vi guna hiɗi hiɗiy ma ceɗayna ma asaya kay kot ziyd hiɗi namna.

⁷May sa ma jobsi kay nisi ma vi labara vi gurju na'ta goyɗi, kay nisi li kayni hiɗi dikga ɗigerta.

⁸Bugol kayni Hilkiya mul ŋol ma-ɗifinna di tam Safan ma ɗo slena ala: Ɗerwelda vi gatta nan fa'ayawa kalaf hay ziyda vi Ma-Vatɗina. Hilkiya vul ɗerwel na'ta mi Safan. Safan jaŋa' goyo may.

⁹Bugol kayni Safan ma ɗo slena kali vi labar namna mi mulla, ka di mulla ala, gurjuta ta ka hay ziyna sa sunda vaŋu toka'awa, nisi vula'awa hay ɓam sum sa kotta vi ziyna vi Ma-Vatɗina hini hay ɓisina.

¹⁰Safan ma ɗo slena di tam mulla lo ala: Mul-ma-ɗifinna Hilkiya vulan ɗerwel kep. Safan jaŋam goy vok mulla.

¹¹Hay li ma mulla hum labara ma ka hay ɗerwella vi gatta na'ta, nam jet sligara valam goyo.

¹²Mulla hin dit tam Hilkiya, tam Ahikam goora vi Safan, tam Akbor goora vi Mikka, tam Safan ma ɗo slena, tam Asaya sa ma sunda vi mulla:

¹³Nam ka disi ala: Tuɗgiya jobgi Ma-Vatɗin kanu, kay sumuna, kay jafna vi Yuda kafe, jobomu kay yoboy ma hay ɗerwelda vi gatta ta fa' hay Tempella; kay Ma-Vatɗina muɗi ɦiy ŋolo, dikam muɗi ɦiy kataya, kay sumiyaya may hum kuɗ yoboy ma hay ɗerwel kaynɗi, kay sle ma ɗoy tay kafna nisi min li kuɗumɗi.

¹⁴Muliyan-sa-ɗifinna Hilkiya, Ahikam, Akbor, Safan hiɗi Asaya kali kat cata jobta-Lawna Hulda, cata vi Sallum goora vi Tikva, goora vi Haras, ma ŋom sligara. Na' musi kayn hay Yerusalem, goy hay gal hena vi hoyok-ziyna.

¹⁵Bugol nisi da' dina, na' ka disi ala: Humgi va ma Ma-Vatɗina Lawna vi Israyel di'e: Sa ma cukgi ay katanna nigi ma dum ala:

¹⁶Ma-Vatɗin ka di ala: Humaŋu, nan min hin joota co'o kay liyn tani, kay sum sa ziy hayamna kaw, kuɗ yoboyn ma hay ɗerwelda kaf ma mulla vi Yuda jaŋam goyna.

¹⁷Kay nisi noyanawa goyo, nisi ŋal urdi ma hisna mi laway mara'a kaw, kay ɓulakan dikanu hiɗi lopna vi ɓisi kafe, dikan muɗi ɦiy ŋolo kat liyn tani, ɦiyda vanu as sleɗ gaa noŋɗi.

¹⁸May mulla vi Yuda ma cukgi ay ala nigi ma job Ma-Vatɗina na, nigi ma dum ala: Ma-Vatɗina Lawna vi Israyella ka di kuɗ yoboy ma naŋ humumna ala:

¹⁹Kay mige dikaŋ geɗiya, kay mige naŋ hot yaŋ gaa kuɗ Ma-Vatɗina, naŋ humi kuɗ sle ma nan dumu kay liyn tani, kay sum sa hayamna kaw, kay yorta hiɗi be'da ta nisi min fi'e kaw, kay naŋ jet sligara vaŋ goyo, kay naŋ tiy vok iranu, nan kaw nan humawa, din Ma-Vatɗina.

²⁰Kuɗ kayni humaŋu, nan min hinaŋ mit hay sle'ta kuɗ sumiyaŋu hay zulda vaŋu, lasta ŋolda kaf ta nan min hina' co kay ziyn tani iraŋ ma wa'ɗi. Nisi tuɗ hot dita na'ta tam mulla.