Read Masana 2 MULIYANA 24 Bible Online

2 MULIYANA 24 - Masana bible

2 MULIYANA 24

¹Hay liyna valam kayni, Nebukadnesar mul ma Babilonna kal goy ti ɓuraŋi. Yoyakim musi gaa kuɗ gaŋeraŋa valamu ir busat ɦidi; may nam fok kulo kat Nebukadnesar.

²Ki kayn nala Ma-Vatɗina cuk sojena vi Kaldeena, sojena vi Siriyana, sojena vi sa Mowabna hiɗi sojena vi sa Amonna kay durumu. Ma-Vatɗin cuk sojen kat jafna vi Yuda kayni kay vatsi goyo, kuɗ yoboy ma nam dum hiɗi vun sa sunda valamu sa jobta.

³Van ki kayn nala co kayn kuɗ minda vi Lawna tuta, kay nam mini kay yaw jafna vi Yuda goy vok iramu, kuɗ suluk ma Manase lum kafna.

⁴Kuɗ busuw ma bay-joota ma Manase ɦokom goyo ma nam hob Yerusalem hiɗi namna. Kuɗ kayni Ma-Vatɗina min vul gida kay sulukŋa visi noŋɗi.

⁵Caw lopna vi Yoyakim ma hinina, slen ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Yuda.

⁶Yoyakim miti kuɗ sumiyamu, goora valamu Yoyakin ti mulda hay baŋalamu.

⁷Mul ma Egiptena may kali goy hay nagata valam pa loɗi, kay mul ma Babilonna yaw ir nagana valam kafe, tun caway hay niy-ma-riŋŋa vi Egipte pa, ta-ta hay vun niy-lumna Eufrata goŋ'.

⁸Yoyakin ka hiɗi busat doogo yam glafandi hay li ma nisi tunum mulu. Nam ti mulda ir til ɦidi hay Yerusalem. Sulum ya' Nehusta, goota vi Elnatan, ma Yerusalemna.

⁹Nam li slen ma joona kir Ma-Vatɗina, ŋray ca ki bulum nala.

¹⁰Hay na'ta kayni, sa sunda vi Nebukadnesar mul ma Babilonna co'o, kay dur Yerusalem, nisi ŋuy Yerusalem cusl'.

¹¹Nebukadnesar mul ma Babilonna co vun hoyok-ziyna, kayni hay li ma sa sunda valamu ka ŋuy hoyok-ziyna.

¹²Ki kayn nala Yoyakin mulla vi Yuda kali kat Nebukadnesar, namu hiɗi sulumu, sa sunda valamu, sa ŋulona valamu hiɗi sa patayna valam kafe. Mul ma Babilonna gum daŋgaya, kayni hay busata glafandita vi mulda valamu.

¹³Timgil ma ka hay ziyna vi Ma-Vatɗina hiɗi timgil ma ka hay ziyna vi mulla nam yawam kafe; tasa ma ora ma Salomon mulla vi Israyel kotom kalaf hay Tempella nam yawam kafe, tasa ma kawayna ma mulla Salomon kotom kalaf hay Tempella ki Ma-Vatɗin dum nalana, nam tom goy kafe.

¹⁴Sum sa ŋulona hay Yerusalemna nam kalsi gorvo kaf, tapay hiɗi sum sa jufayna pet nisi ir birim doogo, sa har guna hiɗi sa kot vun-ziyna, hin kayni si sum sa hawna tuta.

¹⁵Nam kal Yoyakin hay Babilon, sum-mulla nam va'ays hay Yerusalem pa kala' gorvo hay Babilon, boyna vi mulla hiɗi sa patayna valam kaw nam yawsiya, hiɗi sa ŋulona vi nagat kafe.

¹⁶Sa wi duur kaf ir birim siɗiya, sa har guna hiɗi sa kot vun-ziyna ir birim ɗaw, sum sa jufayna hiɗi sum sa wi duur kafe. Mul ma Babilonna kalsi goy gorvo'o hay Babilon.

¹⁷Mul ma Babilonna vi Mataniya nasum Yoyakinna, nam tunum mulu hay baŋal Yoyakin, nam muɗum selem ala Sedekiyas.

¹⁸Sedekiyas tun hay mulda kayn busata valam asay dok-ma' yam kepe. Nam ti mulda ir busat doogo yam kepe hay Yerusalem. Sulum ya' ala Hamutal, goota vi Yeremiyas ma Libnana.

¹⁹Nam li slen ma joo'o kir Ma-Vatɗina, ŋray ca ki Yoyakim li ays nala.

²⁰Van kayni co'o kuɗ ɦiyda vi Ma-Vatɗina kat Yerusalem hiɗi Yuda, kay nam min noysi goyo vok iramu. May Sedekiyas fok kulo'o kat mulla vi Babilon.