Read Masana 2 MULIYANA 4 Bible Online

2 MULIYANA 4 - Masana bible

2 MULIYANA 4

¹Cat kep jar boyna vi gurona vi sa jobta, na' ka siwel tam Elise ala: Jufan sa ma sunda vaŋ mitiya, naŋ vi ala jufan kayni nam li nar kuɗ Ma-Vatɗina; may sa mara ka'a, balla valam ka kay jufanu, nam yaw gurona van sa ma'na gorvo'o.

²Elise di ta'a: Nan as lum tag ɗawn mi mige? Nak dan tige, va vag ma ka vo hay ziyna mi mige? Na' hot dit ala: Nan gorvota vaŋu ka kan vo kayn ti doŋolay ta ɦok mula tuta.

³Nala nam di'e: Tuɗag goy vi nuriyokŋa kaf, siɗawag doŋolay ma hayam goy ɦawana, nak ma siɗawam ir kiɗayɗi.

⁴Hay li ma nak hotiyawa vo'o, nak ma duk vun-ziyn kagu hiɗi gurona vagu; nak ma ɦok mula hay doŋolay namna kaf, ma hobawana nak ma lakam goy galamu may.

⁵Bugol kayni na' kaliya. Na' duk vun ziyn kulo ka'a hiɗi gurona va'a; nisi mara' doŋolayna, na' ɦok mul haya may.

⁶Hay li ma doŋolayna hobawa, na' di tam goora va' ala: Maran doŋolay tara lo. May nam hota' dit ala doŋolayna may loɗi, ki kayn nala mula min jaŋ loɗi.

⁷Na' tuɗ labar namna tam sana vi Lawna, nala nam di'e: Tuɗag gusag mula goyo, wurakag bal ma kagŋa, nala diram ma hinina ma suɗag nak hiɗi gurona vagu.

⁸Fat tara kep Elise co hay Sunem. Cat ta dono ka hay liy namna kep, na' som dono'o kay nam ti'e. Hay buur kaf ma nam ka co hay Sunem, nam ka kal vo va'a kay ti'e.

⁹Na' di tam jufa'a: Humaŋu, san namna ma ka co hay ziyna vay dok-dok klani, mi sa ma peldetna vi Lawna.

¹⁰Kotay ziy ta gooro ta kulo'o, hiɗi gulmun ta'a, nay ma tun va ma buur haya'a, tun table haya' kepe, jaŋgal ma mus kepe, va ma tun lampan kepe kaw, kay hay li ma nam coyawa hay ziyna vaya, nam ɗawn ma kal mus haya'a.

¹¹Hay li ma Elise hotay hay Sunem, nam kal mus hay ziy na'ta, cap bura.

¹²Nam di tam Gehazi ma sunda valamna ala: Yaŋ cat ta Sunamitta aya. Gehazi ya' aya, na' co vokomu.

¹³Elise di tam Gehazi ala: Daŋgis tige, wulin kayni na' li ŋaatawa kafe taya; nay ma lum ta' mi mige? Nay ma law ka'a tam mulla lebo ma ŋolla vi sojen su? Na' hot dita: Nan musi kayn jar sumuna vanu.

¹⁴Nam di lo: Nay ma lum ta' mi mige? Gehazi hot dita: May na' kaw goor may noŋɗi, jufa' kaw muɗi maari.

¹⁵Nam di lo: Ya' aya. Gehazi ya' aya, na' co hay vun-ziyna.

¹⁶Elise di ta'a: Cakata hay li ma liyn hotiyawa ki tan nala, nak ma vi goor kagu. Na' dumu: A'a, sam-ŋolla vanu, sana vi Lawna, naŋ ɗutanɗi.

¹⁷Cat kayni vi haya, co cakat kayni na' vuɗ gooro, ki Elise di ta' nala.

¹⁸Goor kayni muɗi ŋolo. Bulum ka goy kuɗ sum sa feɗna, fat tara kep nam kal kuɗumu.

¹⁹Nam ka di tam bulum ala: Yan ɓasanu! Yan ɓasanu! Bulum di tam sa ma sunda valam ala naraŋgi mi sulumu.

²⁰Sa ma sunda slumu kalam mi sulumu. Goor bur dik sulum waŋ' ta-ta falay calakka, bugol kayni nam mita.

²¹Na' jik kulo'o, burum kay va ma buura vi sana vi Lawna, duk vun-ziyn kulo kalamu, kali goyo may.

²²Na' yi jufa'a ka dum ala: Nan siɗawaŋu kay naŋ ma gan sa ma sunda ma joriyona ay kepe hiɗi kurota ta cata; nan min nan min kal gosoy wit' tam sana vi Lawna, nan ma hotiya.

²³Nam di ta'a: Vaydi kayn may mi til ma wulinɗi lay sabatnɗi lay, may nak min tuɗ talam kay mige? Na' hot dit ala ɦawa'a.

²⁴Bugol kayni na' gan kurona, di tam sa ma sunda va' ala tunaŋis vokomu, tuɗaŋisa; la nan bay vulaŋ hagata, naŋ as colɗi.

²⁵Na' kaliya, na' co kat sana vi Lawna kulo kay hiɗiyta vi Karmel. Hay li ma sana vi Lawn wa' ay goy gine'e, nam di tam Gehazi ala: Humaŋu cata Sunamitta kilani.

²⁶Wulin kayni tuɗaŋ kira' jaŋi, naŋ ma joba' ala nak ka ŋaa'a su? Jufagu hiɗi goora vagu ka ŋaa'a kaw su? Na' hot dit ala nisi ka ŋaa'a.

²⁷Hay li ma na' co kat sana vi Lawna kulo kay hiɗiyta, na' bowom gayam ka'a. Gehazi co'o kay zuta' goyo. May sana vi Lawn di'e: Hinaŋga, kay ciwta va' ka hay yorta. May Ma-Vatɗin ŋay kayni kanu, nam min ɗekem kiranɗi.

²⁸Ki kayn nala na' di'e: Mulanna, nan job goor hay ɓaŋ su? Nan may daŋ ala naŋ ɗutanɗi ɗisu?

²⁹Elise di tam Gehazi: Junaŋ furaŋu, slaŋ zugulda van hay ɓaŋu, tuɗaŋu. La naŋ ŋaf hiɗi sa'a, naŋ gum deɓɗi; la sa gaŋ deɓe, naŋ hotom ditɗi. Naŋ ma bur zugulda van hay vok goora.

³⁰Na' di'e: Hay semda vi Ma-Vatɗin ma irina, hay semda vaŋ kaw, nan as hinaŋɗi. Nala nam fokay kulo'o, tapay kuɗa'a.

³¹Gehazi kali voksi jewe, nam bur zugulda hay vok goora, may del mayɗi lay, va ma musuk ɓislek mayɗi lay. Nala nam hotay ŋaf ir Elise ka dum ala: Goor may zliy kuloɗi.

³²Hay li ma Elise co hay ziyna, nam ɗuw kayni goor mitiya, ka buri gaa kay va ma buura valamu.

³³Elise kal kalafi, duk vun-ziyn kulo kisi ma' pete, nam tun caw siɗaw Lawna may.

³⁴Nam jik kulo'o, koɗ gaa kay goora, nam jo vunam hay vun goora, jo iram hay ir goora, jo ɓalam tam ɓam goora, meɗ tuwam goy gaa kay goora. Nala tuw goor tun caw gi kuwa.

³⁵Elise vi tuwam goyo, nam ka tuɗ tani tani kalaf hay ziyda, bugolda nam hot jik kulo'o, koɗ gaa kay goora lo, goor herjehew sem siɗiya, nam mal iram goyo.

³⁶Elise yi Gehazi ka dum ala: Yaŋ cata Sunamitta aya. Gehazi ya' aya, na' co kat Elise, nam ka di ta' ala: Slag goora vagu.

³⁷Na' kaliya, gi tuwa' gaa selemu, girif gaa kay nagata. Bugolda na' sli goora va'a, kali goyo may.

³⁸Elise hotay hay Gilgal, hay na'ta kayni mayta ka li hay nagata. Hay li ma gurona vi sa jobta ka dakay gaa vok Elise ta' kayni, nam ka di tam sa ma sunda valam ala: Jakaŋ doŋolayta ta ŋolda kulo'o, dafaŋ hadafna haya'a kay gurona vi sa jobta.

³⁹Kep jarsiya kal goy hay sinena kay neɗ direkŋa; nam fi gulda-gulda ma fulla, nam ja kurdi-viira, hob sligara valam hiɗi namu. Hay li ma nam hotay vo'o, nam kaam iram goy ne' ne', cukum hay doŋolayta ta hadafn ka haya'ta, kay nisi may wum goy jewɗi.

⁴⁰Nisi vulsit goyo kay ti'e. May hay li ma nisi tunum vunsin kayni, nisi ka siwel ala: Sana vi Lawna, mitta ka hay doŋolayta! Nisi may as a tum loɗi.

⁴¹Elise di'e: Yawgi futuwna. Nam ko futuwn hay doŋolayta, ka di ala: Vul tin mi sumun kayni hinsi ti'e: Bugol kayni va ma joo'o may hay doŋolayt loɗi.

⁴²San kep fokay hay Baal-Salisa pa, nam mar vun fu ma-jewna mi sana vi Lawna, fu-orgen dok-ma', hiɗi yam wa ma wulina hay birimna valamu. Elise di'e: Vulum mi sumun kayni kay nisi ti'e;

⁴³Sa ma gutda valamu hot dita: Nan as vul mi sumun kis ɗawni ir nanige? May Elise di'e: Vulaŋgi mi sum nisina kay nisi ti'e, kay Ma-Vatɗin ka di ala: Nigi ma ti'e diram ma hin goy kaw.

⁴⁴Ki kayn nala nam lak fun gaa voksiya, nisi ti'e diram hin goyo kaw, ki Ma-Vatɗin di nala.