Read Masana 2 MULIYANA 5 Bible Online

2 MULIYANA 5 - Masana bible

2 MULIYANA 5

¹Naaman mulla vi sojena vi Siriya kayni, nam kir mulamna ŋaa'a ŋolo, mulamna slum yalam kulo ŋolo. Kay Ma-Vatɗin but sum sa Siriyan goy kayn hiɗi ɓalam namu. May sa namna ma dono'o, ma manjuf kawn kayni nam ka hiɗi moy-kuturuna.

²Fat tara kepe, sum sa Siriyan co kuɗ tuwsi ŋolo kay ti ɓuraŋi, goot-cata goota kep nisi va'a kal hiɗi na'a. Na' gi vok cata vi Naaman.

³Na' di tam mula'ta ala: Suy! Mulanna klani la nam ay kat sa ma jobta ma hay Samariyana, sa ma jobta as yerem goy kay moy-kuturuna valamu!

⁴Naaman kali kat mulamna, nam ka dum ala: Goot-cata ta nay va'ay hay nagata vi Israyel di slen nala nala.

⁵Mulla vi Siriya hot di ala: Tuɗaŋ hay Samariya, nan min ɗo ɗerweldis tam mul ma Israyella. Nam kaliya, yaw gurjuta hay ɓalam ir talente* doogo, sikel* ma ora ir birim karkiya, sligar ma cukŋa doogo.

⁶Nam tuɗ ɗerwelda tam mulla. Hay ɗerwelda dit diy ala: «Wulin kayni, hay li ma ɗerwelda kayni coowa taŋu, naŋ ma wi ala gi Naaman ays taŋ mi nanu, nam mi sa ma sunda vanu. Nan min ala naŋ ma yerem goyo kay moy-kuturu ma talamna.»

⁷Hay li ma mulla vi Israyel jaŋ ɗerwelda jaŋŋa, nam jet sligara valam goyo, ka di ala: Nam job tanu kay nan ma yer san goy kay moy-kuturuna valam kayni nan mi Lawna su? Kay ci san lay hinim mus iri lay kayn mi Lawna tuta! Nigi ma wi'e, hum kaw ala nam garam hiɗi nan kayn mi cirepe.

⁸Hay li ma Elise sana vi Lawna hum ala mulla jet sligara valam goyo, nam gi sunda tam mulla kay dum ala: Naŋ jet sligara vaŋ goyo kay mige? Naŋ hinim coy katanu, nam ma wi ala sa ma jobta kep ka hay Israyel.

⁹Naaman co'o hiɗi kulumayna valamu hiɗi keke-ma-duura valam kaw, nam col goy vun ziyna vi Elise.

¹⁰Elise gi sunda talamu kay dum ala: Tuɗaŋu muzaŋ tuwaŋ goy sem siɗiya hay Yordan; nala tuwaŋ ma hot muɗ golɓoto, naŋ ma hot goy hay bay-liwista.

¹¹Naaman muɗ ɦiya, nam tun caw kala nam ka di ala: Nan var kayn ala nam ma kali goy katanu kay tuwamu, nam ma yi sem Ma-Vatɗina Lawna valamu, nam ma saw ɓalam kay liy ma kuturuna, ma yerem goyo klasige.

¹²Niy-lum ma hay Damasna, Abana hiɗi Parpar, nam may ŋaa'a suw niy ma hay Israyel kaf ɗisu? Nan as muz tuwan hayamu kay muɗ goy ŋaa'a ɗisu? Nam muɗ ŋoromu, li ɦiy ŋolo, tun caw kala.

¹³May sa sunda valamu co talamu kay law hiɗi namu, nisi ka di talam ala: Bunu, lali sa ma jobta jobaŋ kayn kay va ma lop ŋol kaw naŋ asay a lumɗi su? Wulin kayn nam jobaŋ ala naŋ muz tuwaŋ goyo kay naŋ ma muɗ ŋaa'a ni, naŋ as li kaynɗi su?

¹⁴Nam kali ɗawni, gi tuwam goloŋ hay Yordan sem siɗiya, kuɗ yoboy ma sana vi Lawn dumtina. Nala tuwam muɗ goy golɓot cet-cet' ki goorgoor ma joriyona nala, nam muɗi bay-liwisi.

¹⁵Naaman hot kat sana vi Lawna, hiɗi sum sa kuɗumna kafe. Nam co vok iramu ka dum ala: Wulin kayni nan wi ala gaa kay nagat kaf kayni, Lawn mara'a may goy hay liy maraɗi, say hay Israyel tuta. Wulin kayni nan siɗawaŋu kay naŋ ma vi vulda kayni hay ɓanu.

¹⁶Elise hot dit ala: Hay sem Ma-Vatɗin ma irina ma nan sunumna, nan as vi va hay ɓaŋɗi. Naaman so tuwam talamu kay nam ma vumu, may nam minɗi.

¹⁷Ki kayn nala Naaman di'e: Wulin kayn naŋ min vi vuldaɗi ni, nan siɗawaŋu kay naŋ ma vulan nagana ir hob yam kuron ma'; kay nan as li ɗifin tam lawayn mara'a loɗi, say tam Ma-Vatɗin kepe.

¹⁸May nan job tam Ma-Vatɗina kay nam ma vulan gida, kay hay liy ma mulanna kal hay ziyna vi Rimmon kay girifim kayni, hay li ma nam gah tuwamawa hay banu, nan kaw ma girif gaa vok Rimmon lay. May la nan girif gaa vok Rimmon kaw, Ma-Vatɗina ma vulan gida tage.

¹⁹Elise dumu: Tuɗaŋ hiɗi sle'ta.

²⁰Gehazi sa ma sunda vi Elise ma sunda vi Lawna di hay dikam ala: Wulin kayni mulanna hin Naaman ma Siriyanawa ɦawa'a, slen ma nam maramtina nam min vumɗi; hay sem Ma-Vatɗin ma irina, nan min jaŋ kuɗumu, nan ma fi va'a.

²¹Gehazi fok jaŋi kuɗ Naaman. Hay li ma Naaman wum jaŋay bugolomu, nam jik goy gaa hay kekena kay tuɗ ŋafam iramu. Naaman ka jobom ala mayɗin mige?

²²Nam hot dit ala ɦawa'a. Mulanna ganay taŋ kayn kay daŋ ala: Sum sa joriyon ma' jar gurona vi sa jobta; nisi ay kay hiɗiyta vi Efrayim pa, nisi co talamu, nala nam min siɗawaŋ ala naŋ ma vulum doorotis ir sikel* kep may, sligar ma cuk ma' may, kay nam min vulsita.

²³Naaman dumu: Naŋ ma yaw ir talente ma' kayn ŋaa'a. Nam som dono'o, cuk doorota hay birimna ma', vulum sligar ma cukŋa ma', cuk sa sunda valam kuɗ Gehazi ma' kay nisi ma ziyim vokomu.

²⁴Co kay hiɗiyt kayni, Gehazi yawam hay ɓisiya, lakam kalaf hay ziyna, nam gi ir sumuna, nisi kaliya may.

²⁵Bugol kayni nam kali kat mulamna. Elise dumu: Naŋ may arige Gehazi? Nam hot dit ala nan may tuɗ goy hay liy maraɗi.

²⁶May Elise di'e: Ŋusta van may goy gine hiɗi naŋɗi hay li ma san kayni hin kekena valamu kay co ŋaf hiɗi naŋu. Kay yaw doorota, kay yaw sligara, kay yaw olivena, kay yaw gulda-guldana, kay yaw fok-dimina, kay yaw luwayna, kay yaw sa sunda kaw kayni mi liy namna su?

²⁷Moy-kuturuna vi Naaman ma jaɓ kuɗaŋu, tam jafna vaŋ kaw ta-ta dok-doko. Gehazi vi tuwam goy vok Elise kayni, moy-kuturun jaŋam dil', tuwam ɓo haɓ kaŋ-kaŋ' de.