Read Masana 2 MULIYANA 7 Bible Online

2 MULIYANA 7 - Masana bible

2 MULIYANA 7

¹Elise di'e: Humgi dita vi Ma-Vatɗina: Jifini, hay liy ma liyn coowa ki kayn nala, nay ma fi futuw ma digeɗna; ŋaɓta kep ir sikel* kep, ŋaɓta vi orgen ma' kay sikel kep kaw hay vun-galana vi Samariya.

²Ma ŋolla vi sojena ma mulla gah' tuwam hay ɓalamna hot dit tam sana vi Lawna. Sa Ma-Vatɗin mal baŋa ma hay wuralawn goy kaw, va ma ki kayn nala as co su? Elise di'e: Naŋ ma wi kayni hiɗi iraŋu, may naŋ kay tuwaŋ as tiɗi.

³Sum sa kuturun fiɗi ay lakay hay vun-galan lak', nisi ka di jar-tuwsi ala: Mige! Nay as lak tan laki ta-ta cub mitta vay su?

⁴La nay varawa kay kal kulo hay hoyok-ziyna, mayt ka hay hoyok-ziyna, nay ɗawn ma mita, la nay lakay tani, nay ma mit lay. Ŋaat kayni tuɗay cukay kulo jar sa Siriyan hay kaŋŋa, la nisi hinayawa iriya, kayn ŋaa'a, la nisi cayawa goy mati, nay mit maya.

⁵Nisi kali hay ŋarpita, kay cuk kulo hay kaŋŋa vi sa Siriyana; hay li ma nisi co kulo vun kaŋŋa vi sa Siriyan kayni, sa kep kaw may hayamɗi.

⁶hay kaŋŋa vi sa Siriyan kayni, Bum-Sumun hinsi hum suwana vi keke-ma-duura hiɗi suwana vi kulumayna; hiɗi suwana vi soje sa ŋol hini-hinina, nisi laway jar-tuwsi ala: Humgiya, ma li ɗawni, mulla vi Israyel gus muliyana vi Hetna hiɗi muliyana vi sa Egipten ayawa, kay nisi ma co duraya,

⁷Nisi yaway kulo'o hay ŋarpita muni jaŋi, hin guɗukŋa visi goyo, hin kulumayna, hin kurona, hin kaŋŋa kulo hay liyamna ta', meriya kay suɗ tuwsi goyo.

⁸Hay li ma sum sa kuturun co kalaf hay kaŋŋa, nisi kal kalaf hay guɗukŋa, nisi ti'e ci'e. Nisi yaw doorota, ora, sligara kaw, kal ŋayam goyo. Nisi hotay lo, nisi kal kalaf hay guɗuk mara'a, nisi yaw sle mara lo, kal ŋayam goyo.

⁹Bugol kayni nisi ka di jar-tuwsi ala: Nay may li ŋaaɗi: Fatta vaydit zawni ti fatta vi labar ma firina; la nay lak kiliŋ ta-ta liyn fo goyo ni, kitat ma co kaya. Wulin kayn nigiyaya, tuɗay vulay labara mi sa vo vi mulla.

¹⁰Nisi kaliya, nisi yi sum sa ŋom vun-galana vi hoyok-ziyna. Nisi ka disi ala: Numa kal kulo hay kaŋŋa vi sa Siriyana, ɗuw na kayni sa mayɗi, numa may hum del sa ɓislek noŋɗi; ɗuw na kayni, kulumayn ka juniya, guɗukŋ ka viy kulo hay liyamna lak' may.

¹¹Sa ŋom vun-galana siwela, nisi vul labara kayni kalaf hay ziyna vi mulla.

¹²Mulla fok kulo'o hay henjeta, nam di tam sa sunda valam ala: Nan min digi va ma sum sa Siriyan ka lum tayna. Nisi wi ala mayt ka caya, nala nisi hin kaŋŋa visi goy kayni, kay tuɗ ŋay goy hay sinena, fisi diys jar-tuwsi ɗawn ala: Hay li ma nay cukiyawa goy hay hoyok-ziyna, nisi ɗawn ma yaway iriya, cuk kulo hay hoyok-ziyna may.

¹³Kep jar sa sunda vi mulla hot dita: Nay ma yaw kulumayn vasl ma ka hini hay hoyok-ziyna, nam kayni ŋray ca hiɗi sum sa Israyella sa gu' gu' sa hinina, nam kayni ŋray ca kaw hiɗi sum sa Israyella. Sa gu' gu' sa ka mitna, nay ma cuksiya kay ɗuw va ma ka lina.[4]

¹⁴Nisi yaw keke-ma-duur ma' hiɗi kulumayna, mulla cuk sojena kay sli sem sojena vi sa Siriyana, nam ka di ala: Tuɗgiya ɗuwgiya.

¹⁵Nisi kali kuɗsiya ta-ta hay Yordan; nisi fi kayni, hagat kaf ay hobay hiɗi sligara, hiɗi jakŋa ma sum sa Siriyan cukum goyo hay li ma nisi mun jaŋi. Sum sa nisi cuksin hotaya, nisi mar labara tam mulla.

¹⁶Sumun cukay goyo, nisi vurum kaŋŋa. Nisi fi futuw ma digeɗna; ŋaɓta kep ir sikel* kep, ŋaɓta vi orgen ma' ir sikel kep kaw, kuɗ yoboy ma Ma-Vatɗin dumna.

¹⁷Mulla vul ŋomda vi vun-galana hay ɓam soje ma ŋolla ma nam gah' hay ɓalamna; may soje namna sumun tupa talam hay vun-galana, cap kirapam gaa'a, nam mita, kuɗ yoboy ma sana vi Lawn dumu hay li ma mulla co talamu.

¹⁸Hay na'ta kayni sana vi Lawna di tam mulla ala: Nisi ma fi futuw ma digeɗna, ŋaɓta kep ir sikel kep, ŋaɓta vi orgen ma' ir sikel kep kaw, jifini hay fatta ki kayn nala, hay vun-galana vi Samariya.

¹⁹Soje ma ŋolla ma mulla gah' tuwam hay ɓalamna hot dit tam sana vi Lawn ala: La Ma-Vatɗin mal baŋa ma hay wuralawn goy kaw, va ma ki kayn nala as co su? Elise hot dum kayn ala; naŋ ma wi va namna hiɗi iraŋu; may naŋ kay tuwaŋ as tum noŋɗi.

²⁰Kayni mi va ma co talamna yo, sumun kirapam gaa sesiya hay vun-galana, nam cap mita may.