Read Masana 1 LABAR-MA-LIYNA 10 Bible Online

1 LABAR-MA-LIYNA 10 - Masana bible

1 LABAR-MA-LIYNA 10

¹Sum sa Filistina dur sa Israyella, sum sa Israyella mun jaŋi vok sa Filistina, nisi cuk goy gaa'a, cap mita kulo kay hiɗiyt Gilbowa.

²Sum sa Filistin heb Sawul hiɗi gurona valam goboyo, nisi ci Yonatan, Abinadab hiɗi Malkisuwa gurona vi Sawul.

³nekka vi duura zor kayni kay Sawul; sum sa gi ɓarawta irsi cuk kalamu, tuwam tun caw vun bat-bat' voksi dono ŋolo.

⁴Sawul di tam sa ma ziy sle-ma-duura valamna ala: Pataŋ kew-gaferaŋa vaŋ goyo, jikanu, kay sum sa bay ka-gosayn lakŋi ma co lasanɗi. Sa ma ziy sle-ma-duura valamu may minɗi, kay tuwam muɗi nar ŋolo. Nala Sawul sli kew-gaferaŋa, gi tuwam gaa vunamu.

⁵Hay li ma sa ma ziy sle-ma-duura valamna wi ala nam mitiya, nam gi tuwam vun kew-gaferaŋa valamu, cap mita kaw.

⁶Ki kayn nala Sawul hiɗi gurona valam sa ɦidina mita, sumuna valam kaf fi mitta hay na'ta.

⁷Sum sa Israyella sa hay lokŋa kaf wi ala sa vun duura ka muni jaŋi, nisi wi kaw ala Sawul hiɗi gurona valam kaf fi mittawa. Nala nisi hin hoyok-ziyna visiya, muni jaŋi, sum sa Filistin co'o, lak hay baŋalsiya.

⁸Dolay kayni, hay buurta ka'ta hay li ma sum sa Filistin co'o kay fok sligar ma tam sum sa mitin goyo, nisi fi Sawul hiɗi gurona valam sa ɦidin miti kulo kay hiɗiyt Gilbowa.

⁹Nisi fok sligar ma talamna goyo, nisi slum yalamu, yaw sle-ma-duura valamu kaw, kali hiɗi namu. Bugol kayni nisi vul labara ma ŋaana namna hay nagata vi sa Filistin kaf, hay ziyna vi lawayna visi kaf, tam sumuna visi kafe kaw.

¹⁰Nisi lak sle-ma-duura vi Sawul hay ziyda vi lawayna visiya, zok-ta'aramu nisi gaɓam kulo hay Tempella vi Dagon.

¹¹Hay li ma sum sa hay Yabes hiɗi sum sa hay Galaad kaf hum sle ma sum sa Filistin lum tam Sawul kayni,

¹²sum sa donon kaf yaway kulo'o, nisi sli tuw Sawul hiɗi tuw gurona valamu, nisi pi zokŋa visi gaa kuɗ gu-terebintena* hay Yabes, nisi li laata ir buur siɗiya.

¹³Sawul fi mitta kuɗ bay-vida valamu ta nam muɗ tuwam joo'o vok Ma-Vatɗina hiɗi na'ta. Nam may li kuɗ yoboyna vi Ma-Vatɗinɗi, nam kali job kuɗ sum sa yi sem sa mitina.[6]

¹⁴Nam min job Ma-Vatɗinɗi; nala Ma-Vatɗin cum goyo, nam jok mulda goy mi David goora vi Isay.