Read Masana 1 LABAR-MA-LIYNA 11 Bible Online

1 LABAR-MA-LIYNA 11 - Masana bible

1 LABAR-MA-LIYNA 11

¹Sum sa Israyel kaf tok tuwsi kat David hay Hebron, nisi di'e: Wulin kayn numa si zokaŋ naŋ lay sliwaŋ naŋ lay.

²Jewe hay li ma Sawul ay mul kaw, tuni vok sumun kayni mi naŋu. Ma-Vatɗina Lawna vaŋu di taŋ ala: «naŋ ma ŋom sumuna vanu sa Israyella, ma tun vok sumuna van sa Israyella ɗawni mi naŋu».

³Ki kayn nala sum sa maariyana vi Israyel kaf co kat mulla hay Hebron, nala David jun bonot hiɗi nisiya hay Hebron, vok ir Ma-Vatɗina. Nisi ɦok mul kay David, tunum mulu kay sa Israyella, kuɗ yoboy ma Ma-Vatɗin dum hay vun Samuel.

⁴David tuɗ hiɗi sa Israyel kaf (kay dur) Yerusalem ta ya' Yebus. Kay kayni mi liyn ma sum sa Yebusna gurona vi nagata ka hayna.

⁵Sum sa hay Yebusna di tam David: Naŋ as tun seŋ kulo tanɗi. May David sli ziy ma gulmun talamna ma yum Siyon: Kayni mi hoyok-ziyna vi David.

⁶David di goy jew ala: Sa ma kolawa kay sa Yebusna jewe ni, nam ma li ma ŋolla, mi ma yerimana kaw. Yowab goora vi Seruya kali jewe, nala nam muɗi mi ma ŋolla visiya.

⁷David mus hay hoyok-ziy ma gulmunna, kuɗ kayni nisi ka yi hoyok-ziy namna ala hoyok-ziyna vi David.

⁸hoyok-ziyna nam kotom tuwam ma goyn kafe, tun caw Millo pa ta-ta tam dir hoyok-ziyn ma hinina; dir hoyok-ziyn ma hinina Yowab kotomu may.

⁹David ka muɗ vokom ŋol suwa suwa, Ma-Vatɗina vi vok-ma-duura ay hiɗi namu.

¹⁰Kayni si sumuna vi David sa jufayna sa tuni vok sumuna, sum sa vulum gutda, hay li ma nam kal hay mulda hiɗi sum sa Israyel kafe, (nisi tunum mulu) kuɗ yoboyna ma Ma-Vatɗin dum kat sa Israyella.[7]

¹¹Kayni sum sa jufayna vi David kuɗ ŋaɓta visiya: Yakobeyam goora vi Hakmoni, ma ŋolla vi vok ma ɦidina, namu ma selem kep ɦawa, weɗ kawayta valam kay sumun kis-ɦidi, cisi goy kafe.

¹²Bugolom nam kayni mi Eliyazar vi Dodo, ma Ahohitna, kep jar sum sa ɦidina sa donona.

¹³Namu mi ma ay hiɗi David hay Pas-Damim, hay liyn ma sum sa Filistin tok tuwsiya kay li duura. Sine mara ka hay liy namna hobay hiɗi orgena, hay na'ta sum sa Israyella ka jaŋ vok sa Filistina.

¹⁴Nisi lak kulo jar sinena, nisi sli sinena, nisi ci sa Filistina. Ma-Vatɗina li butta-goyta ŋolo hay na'ta.

¹⁵Sa ŋulon ɦidi jar dok-ɦidina jik kulo tam David kay hiɗiyta, kay zul-hiɗiyta vi Adullam, hay li ma kaŋŋa vi sa Filistina ka tuni hay lokŋa vi Refayim.

¹⁶Hay na'ta David ay hay hoyok-ziy ma donona, vok-ma-duura vi sa Filistina hena ka tuni hay Betlehem.

¹⁷David ka di ala: Niy ma ka hay kaata hay vun Betlehem sa ma min garantiya kay nan ma cumu mi gige?

¹⁸Ki kay nala sum sa ɦidina jik hay kaŋŋa vi sa Filistin dono'o, nisi go niy ma hay kaata ta ka vun Betlehem, nisi mar niy namna mi David; may David min ci niy namnaɗi, nam yamam goy ɗifini vok ir Ma-Vatɗina.

¹⁹Nam di'e: Lawna van hinan li nalaɗige. Sum sa vul irita visi vun mitta nan as ci busuwna visi ɗawn citige? Kay niy namna nisi maram kayni nisi tunum goy mi mitsiya. Nala nam min ci niy namna loɗi. Kayni mi va sum nisin sa jufayn sa ɦidina lumna.

²⁰Abiskay ɓasum Yowabna, nam tuni vok sum sa ɦidina, namu mi ma weɗ kawayta valam kay sumun kis-ɦidi cisi goyna, selem tiy jar sum sa ɦidina.

²¹Nam fi gajijit ŋolo jar sum sa ɦidina vi vok ma mul ma'na, nam muɗ mi ma ŋolla kaw. May sum sa ɦidina sa jewna nam may ŋra hiɗi nisiɗi.

²²Benaya, goora vi Yehoyada, nam mi goora vi sa ma manjufu ma li slen ŋolo, sa ma hay Kabseel, namu mi ma cal zlon ma' hay Mowab, namu ma jik gaa hay kaata, cal zlon kep gaa hay kaata, hay buur ma niyn ka si'e.

²³Namu mi ma cal sa ma Egiptena ma fiyokka valam ir goldoŋ vasl, sa ma Egiptena kaway ta hay ɓalamta ɗoray ŋolo, nam kali talamu hiɗi zugulda, sli kawayt hay ɓam sa ma Egiptena, cap cum hiɗi na'a.

²⁴Kayni mi va ma Benaya goora vi Yehoyada lumna; selem tiya jar sum sa jufayna sa ɦidina.

²⁵Nam fi gajijit ŋol suwa jar sa dok-ɦidina, may sum sa ɦidi sa jewna nam may ŋra hiɗi nisiɗi. David vulum liyn jar sa li dakka valam ta goy ŋayayta.

²⁶Sum segena sa jufayna sa donona: Asayel, ɓasum Yowabna, Elhanan goora vi Dodo ma Betlehemna,

²⁷Sammot ma hay Haror, Helet ma hay Palonna.

²⁸Ira goora vi Ikes, ma Tekowana, Abiyezer, ma Anatotna.

²⁹Sibbekay, ma Husana hay ma Ahohana,

³⁰Maharay ma Netofana. Heled goora vi Baana ma Netofana,

³¹Itay goora vi Ribay, ma hay Gibeya vi Benyaminna. Benaya, ma Piratonna,

³²Huray ma Nahale-Gaasna, Abiyel ma Arabana.

³³Azmavet ma Baharumna. Eliyaba ma Saalbonna,

³⁴Bene-Hasem ma Gizonna. Yonatan goora vi Sage, ma Harar,

³⁵Ahiyam goora vi Sakar ma Harar, Elifal goora vi Ur,

³⁶Hefer ma hay Mekerana, Ahiya ma Palonna.

³⁷Hetsro ma Karmella, Naaray goora vi Ezbay.

³⁸Jowel ma ɓasum Natanna, Mibhar goora vi Hagri.

³⁹Selek ma Amonna. Naharay ma Berotna, ma ziy sle-ma-duura vi Yowab goora vi Seruyana.

⁴⁰Ira ma hay Yeter, Gareb ma hay Yeter.

⁴¹Uriyas ma Hititna, Zabad goora vi Aklay,

⁴²Adina, goora vi Siza, hay jafna vi Ruben, ma ŋolla hay jafna vi Ruben, segen dok-ɦidi hiɗi namu.

⁴³Hanan goora vi Maaka. Yosafat ma Mitnina.

⁴⁴Uzziya ma Astarotna, Samma hiɗi Yehiyel, gurona vi Hotam ma Arowera.

⁴⁵Yediyel goora vi Simri, Yoha ɓasulumna, ma Titsina,

⁴⁶Eliyel ma Mahavimna, Yeribay hiɗi Yosaviya, gurona vi Elnaam, Yitma, ma Mowabna.

⁴⁷Eliyel, Obed hiɗi Yaasiyel-Metsobaya.