Read Masana 1 LABAR-MA-LIYNA 12 Bible Online

1 LABAR-MA-LIYNA 12 - Masana bible

1 LABAR-MA-LIYNA 12

¹Kayni si sum sa kal kuɗ David hay Siklag hay li ma Sawul goora vi Kis digiɗim goy gine hiɗi namu. Nisi kayni jar sum sa jufayna sa gutumu hay duura.

²Nisi kayni si sum sa dur ɓarawta, sa gi hiɗiyna hiɗi ɓisi ta jufta hiɗi ɓisi ta gulda kaw, gi ɓarawta hiɗi diŋ-diŋŋa kaw. Nisi kayni hay jafna vi Benyamin, jar ɓosiyom Sawulla:

³Ma ŋolla Ahiyezer hiɗi Yowas, goora vi Semaa ma Gibeyana; Yesiyel hiɗi Pelet gurona vi Azmavet; Beraka; Yehu, ma Anatotna;

⁴Yikmayeya, ma Gabawonna, manjuf jar sa dok-ɦidina, tuni vok sa dok-ɦidina kaw;

⁵Yeremiyas, Yahaziyel, Yohanan, Yozabad ma Gederana;

⁶Eluzay ma Yerimotna; Beyaliya; Semariya, Sepatiya ma Harofna;

⁷Elkana, Yikya, Azareel, Yoyezer hiɗi Yokabeyam sa Korena;

⁸Yoyela hiɗi Zebadiya gurona vi Yerkam ma Gedor.

⁹Jar jafna vi Gad, sum sa jufayna sa donona poŋ irsi goyo kay tuɗ kuɗ David hay liyna valam ma ŋayna hay fulda; kayni si sojena sa hatay duura, marayna visi ka'a, kawayna visi ka'a kaw, nisi ŋray ca hiɗi zlona, ciwer ki dukŋa ma kulo kay hiɗiyn nala.

¹⁰Ezer, ma ŋolla, Abdiyas ma mul ma'na; Eliyab ma mul ɦidina;

¹¹Mikamanna ma mul fiɗina; Yeremiyas ma mul vaslna;

¹²Attay ma mul karkiyana; Eliyel ma mul siɗiyana;

¹³Yohanan ma mul glafandina, Elsabad ma mul zleeŋena;

¹⁴Yeremiyas ma mul doogona, Makbanay ma doogo yam kepna.

¹⁵Nisi kayni si gurona vi Gad, ma ŋolla vi sojena, ma kepna ma jarsi goora asay ir sumun kis, ma ŋolla jarsiya asay ir sumun birimi.

¹⁶Kayni si nisi sa ɦaw Yordan kulo'o, hay til ma jewna, hay li ma niyn ka hobay kulo ŋolo, sum sa hay lokŋa nisi munsi kafe, gal kuɗuwu hiɗi gal vulatiya kaw.

¹⁷Gurona vi Benyamin segena hiɗi gurona vi Yuda segena kaw kali kuɗ David hay liyn ma nam ka ŋayay hayna.

¹⁸David kal ay goy kirsiya, nam sli ditiya di tisi ala: La nigi co katan kayni hiɗi toyta kay gutanu ni, dikan ka tap hiɗi nigiya; may la kay ɗutan goy mi sa gawt kanna ni, ɦawlat ma kal hayanu, nala Lawna vi sumiyaya ma wi kayni, nam ma ka kitat jaraya.

¹⁹Ki kayn nala ŋusta cuk kay Amasay, ma ŋolla vi sum sa dok-ɦidina (nam di'e): Hiɗi naŋu David, kataŋ naŋu goora vi Isay, toyta, toyta ma li hiɗi naŋ lige; toyta ma li hiɗi sa ma gut kuɗaŋŋa lige. Kay Lawna vaŋu gutaŋawa. David visiya, nam laksi jar sa ŋulona vi sojena valamu.

²⁰Sumuna vi Manase gi dirsi kuɗ vokŋa vi David, hay li ma nam co kuɗ sa Filistina kay dur Sawul. May nisi fi kay gut sa Filistinɗi; kay hay li ma sa ŋulona vi Filistin job tuwsi jobna, nisi gi ir David, kay nisi di'e: Kay la li ŋalɗi nam ma muɗ diram kuɗ mulamna Sawul, kay cay goyo.

²¹Hay li ma nam hot hay Siklag, kayni si sumuna vi Manase sa gi dirsi kuɗumna: Adnah, Yosabad, Yediyel, Mikayel, Yozabad, Elihu hiɗi Siltay sa ŋulona vi vokŋa vi Manase.

²²Nisi tun vok sojena kay mar gutda visi mi David, kay nisi kaf si sum sa jufaya, sa dono'o, nisi ay si sa ŋulona vi vok-ma-duura.

²³Hay buurta buurta nisi ka co kat David kay gut kuɗumu, ta-ta vokŋa valam muɗ ŋolo, ki vokŋa vi Lawn nala.

²⁴Kayni mi ŋaɓta vi nisi sa ay ganaya kay duura. Nisi kali kat David hay Hebron, kay jokom mulda vi Sawul, kuɗ dita vi Lawna.

²⁵Gurona vi Yuda sa ziy marayna hiɗi kawayna, nisi birim karkiya hiɗi kis-glafandi, gani kay duura.

²⁶Gurona vi Simeyon, sum sa jufayna sa donona, gani kay duura, nisi birim siɗiya hiɗi diram kis.

²⁷Gurona vi Levi, nisi birim fiɗi hiɗi kis-karkiya;

²⁸hiɗi Yehoyada, ma vok jafna vi Aaron, sumun kuɗum birim ɦidi hiɗi kis-siɗiya;

²⁹Sadok, sa joriyo ma kursuliya, ma manjufu, hiɗi jafna valamu, sa ŋulo sa voksin dok-ma' yam ma',

³⁰gurona vi Benyamin ɓosiyom Sawulla, birim ɦidi, kay ta-ta wulini ŋolda visiya ka sunum mi jafna vi Sawul.

³¹Gurona vi Efrayim nisi birim dok-ma' hiɗi kis-glafandi sum sa jufayna sa donona, sum sa sesi tiya, kuɗ vuɗna visiya visiya.

³²Hiɗi gal-jafna vi Manase, nisi birim doogo yam glafandi, nisi fi yit kisi kep kep kaf kay tuɗ tun David mulu.

³³Gurona vi Isakar, sa ka hiɗi wida kay poŋ liyna, kay wi va ma sa Israyel as lumna, nisiya sa ŋulon kis-ma', hiɗi ɓosiyosin kaf gaa kuɗ gaŋeraŋa visiya.

³⁴Jafna vi Zabulon birim dok-vasl, asay kay tuɗ hay duura, tuwsi kotiya kay zlar vun duura, ganay hiɗi sle-ma-duura kuɗ jafam kaf kaw, diksi kotay kay li duura.

³⁵Jafna vi Neftali, sa tuni voksin birim kepe, sumun kuɗsi birim dok-ɦidi yam siɗiya, hiɗi marayna, hiɗi kawayna kaw.

³⁶Jafna vi Dan, sa tuwsi koti kay duura nisi birim dok-ma' yam glafandi hiɗi diram kis-karkiya.

³⁷Jafna vi Aser, asay kay tuɗ hay duura, sa asay kay zlar goy vun duura nisi birim dok-fiɗi.

³⁸Goy hay gal hena vi Yordan, jafna vi Ruben, jafna vi Gad hiɗi gal-jafna vi Manase, sa hiɗi sle-ma-duura vi sojen hay ɓisiya, nisi birim kis kalam dok-ma'.

³⁹Sum nisin kaf kayni, sum sa duura, tuwsi kotiya kay zlar goy vun tuwsi ŋaa'a kay li duura, nisi co hay Hebron hiɗi dik ta gasita kay tun David mulu kay sa Israyella kafe. Caw sa Israyella sa hinina kaf vunsi kepe kay tun David mulu.

⁴⁰Nisi lak ɗawni ir buur ɦidi hiɗi David, ti'e, ci'e kaw, kay ɓosiyosina kotsi sle ma tinay hay ɓisiya.

⁴¹Ɓosiyosina sa goboy tisi hay nagata vi Isakar, Zabulon hiɗi Neftali kaw ka mar sle ma tina kay kurona, kay lamgana, kay kulumayna hiɗi luwayna kaw: Sle ma tina, futuwna, hambulla vi vuɗna vi gumna ma soy goyna, hiɗi gulda-gulda ma soy goyna, hiɗi vinna, mula, fukunayna hiɗi luwayna ŋolo kaw, kay firit ka ŋolo hay Israyel hay na'ta.