Read Masana 1 LABAR-MA-LIYNA 13 Bible Online

1 LABAR-MA-LIYNA 13 - Masana bible

1 LABAR-MA-LIYNA 13

¹David yi dakka hiɗi sa ŋulona vi vok ma birimna hiɗi vok ma kisna, hiɗi sa tuni vok sumun kaf;

²David di tam vokŋa vi Israyel kaf ala: La lawt kayni ɗuw kirgi ŋaa'a, la kayni may vi Ma-Vatɗina Lawna vay pa, gay sunda hay liyn kaf kat ɓosiyayna sa ka lakay hay nagata vi Israyel noŋ kafe, kat muliyan-sa-ɗifinna hiɗi sa Levitna sa ka lakay goy hay hoyok-ziyna visiya kaw, kay nisi ma tok tuwsi kataya.

³Nay ma hot timgilla vi Lawna vay ay katay goboyo, kay hay buura vi Sawul nay may tuɗ garamɗi.

⁴Sumun kaf vi ala nisi ma li ki kayni nala, kay lawta kayni sumun kaf va'a.

⁵David tok sum sa Israyel kafe, tun caway hay Sihor vi Egipte pa ta-ta hay vun Hamat zaw, kay nisi ma tuɗ hay Kiryat-Yeyarim kay mar timgilla vi Lawna.

⁶David hiɗi sum sa Israyel kaf kali hay Baala hay Kiryat-Yeyarim, hay nagata vi Yuda, kay sli timgilla vi Lawna Ma-Vatɗina, ma ka musi jar kerubena*, ma semda valam ka yi'e hay timgil namna.

⁷Nisi tun timgilla vi Lawna hay keke ma wuliya ay hay ziyna vi Abinadab pa, Uzza hiɗi Ahiyo ka tuni vok kekena.

⁸David hiɗi sum sa Israyel kaf ka gi nulla vok Lawna hiɗi dilla, hiɗi zlekemna, hiɗi darayna, hiɗi kaway beɗayna, hiɗi togolomna, hiɗi donota visi kaf nisi ka gi nulla.

⁹Nisi co hay muɗakŋa vi Kidon, Uzza meɗ ɓalam goyo kay mok timgilla kay luwayn sli zlaraŋgadaya.

¹⁰Nala Ma-Vatɗin muɗ hiy kat Uzza, Ma-Vatɗin cum goyo kay nam meɗ ɓalam goyo kay mok timgilla. Uzza mit gaa hay liy namna vok ir Lawna,

¹¹David dikam muɗ ɦiya kay mige Ma-Vatɗin ka kitat kay Uzza kuɗ lawt kayni, liy namna nisi tunum selem ala Peres-Uza ta-ta vaydi.

¹²David li nar kay Lawna hay buur namna, nala nam di'e: Timgilla vi Lawna nan as kalam hay ziyna van ɗawn kaltige?

¹³David min sli timgilla vo valamu hay hoyok-ziyna vi Davidɗi, nam kalam goy hay ziyna vi Obed-Edom hay Gat.

¹⁴Timgilla vi Lawna mus ɗawni hay ziyna vi Obed-Edom ir til ɦidi, ki kayn nala Ma-Vatɗina gi bol kay ziyna vi Obed-Edom hiɗi slena valam noŋ kaf.