Read Masana 1 LABAR-MA-LIYNA 14 Bible Online

1 LABAR-MA-LIYNA 14 - Masana bible

1 LABAR-MA-LIYNA 14

¹Hiram mul ma hay Tirus cuk sumun kat David, hiɗi gu-gamna, hiɗi sum sa in ziyna, sa har guna kaw, kay inim ziy ma mulda.

²David wi ala Ma-Vatɗina ka vulum donota kay ti mulda kay sa Israyella, mulda valamu ka muɗ ŋol suwa dok-doko, kuɗ sumuna valam sa Israyella.

³David yaw boyn sara'a hay Yerusalem lo, nam vuɗ guro-jufayna hiɗi guro-boyn lo.

⁴Kayni mi sem gurona sa nam vuɗsi hay Yerusalem: Sammuwa, Sobab, Natan, Salomon,

⁵Yibhar, Elisuwa, Elfelet,

⁶Noga, Nefeg, Yafiya,

⁷Elisama, Belelyada hiɗi Elifelet.

⁸Sum sa Filistin hum ala sum sa Israyella tun Davidawa mul kisiya, nala nisi kaliya kay garamu. David hum kayni, nam kali goyo kay ŋafsi irsiya.

⁹Sum sa Filistin co'o, nisi zlar goyo hay lokŋa vi Refayim.

¹⁰David job Lawna, nam di'e: Nan ma tuɗ dur sa Filistin su? Nan vulsi hay ɓan su? Ma-Vatɗin dumu: Tuɗaŋ dursiya, nan min vulsi hay ɓaŋu.

¹¹Nisi kali hay Baal-Peratsim, ɗawni David cisiya. Bugolda nam di'e: Lawn mal baŋanawa jar sa gawt kanna hiɗi ɓan nanu, ki baŋana ma niyn malamna nala. Kuɗ na'ta kayni liyn namna nisi tunum selem ala Baal-Peratsim.

¹²Nisi hin lawayna visi gaa hay liy namna. David vul hagata kay ŋalam goy hay kuta.

¹³Sum sa Filistin hotay lo, nisi zlar goy hay lokŋa.

¹⁴David job Lawn mara lo, Lawn dumu: Naŋ ma tuɗ ŋorsiɗi, naŋ jik goy galsiya, naŋ co kisi ɗawni jikis kat gu-ganaŋŋa pa.

¹⁵Hay li ma naŋ hum sem san ka tuɗ hay hum ganaŋŋa, naŋ ma kali goy de' kay li duura, kay kal ay goy vokaŋ ɗawni mi Lawna kay dur sa Filistina.

¹⁶David li kuɗ sle ma Lawn dumtina, nala sojena valam ci sa Filistina fokay hay Gabawon pa ta-ta hay Gezer.

¹⁷David selem tiy goy hay nagat kafe, Ma-Vatɗin tiyim selem goyo jar jaf-sumun kafe.