Read Masana 1 LABAR-MA-LIYNA 15 Bible Online

1 LABAR-MA-LIYNA 15 - Masana bible

1 LABAR-MA-LIYNA 15

¹David kot ziyna valamu hay hoyok-ziyna vi David; nam kot liyn kay timgilla vi Lawna, kot guɗuk kulo kalamu.

²Ki kayn nala David di'e: Timgilla vi Lawna ma ziyim si sa Levitna tuta, kay Ma-Vatɗina vileksi kayni, kay ziy timgilla valamu, kay li lop namna dok-dok si nisiya.

³David tok sum sa Israyel kaf hay Yerusalem kay nisi ma nar timgilla vi Lawna hay liyn ma nam kotom kalamna.

⁴David tok gurona vi Aaron hiɗi sa Levitna:

⁵Jar gurona vi Kehat, Uriyel ma ŋolla hiɗi ɓosiyomna, nisi kis kalam dok-ma'.

⁶Jar gurona vi Merari Asaya ma ŋolla, hiɗi ɓosiyomna, nisi kis-ma' hiɗi diram dok-ma'.

⁷Jar gurona vi Gerson, Jowel ma ŋolla, hiɗi ɓosiyomna, nisi kis kalam dok-ɦidi;

⁸jar jafna vi Elisafan, Semayeya ma ŋolla, hiɗi ɓosiyomna nisi kis-ma';

⁹jar gurona vi Hebron, Eliyel ma ŋolla, hiɗi ɓosiyomna nisi dok-glafandi:

¹⁰Jar gurona vi Uziyel, Aminadab ma ŋolla, hiɗi ɓosiyomna, nisi kis diram doogo yam ma'.

¹¹David yi muliyan-sa-ɗifinna Sadok hiɗi Abiyatar, hiɗi sa Levitna Uriyel, Asaya, Jowel, Semayeya, Eliyel hiɗi Aminadab.

¹²Nam di tisiya: Nigi kayni si sa ŋulona hay jafna vi sa Levitna, ligi tuwgi goy peldete, nigiya hiɗi ɓosiyogina, timgilla vi Ma-Vatɗina Lawna vi Israyel nigi ma maram hay liy ma nan kotom kalamna.

¹³Kay mige hay sem ma jewna nigi may tuɗisɗi, kuɗ na'ta kayni Ma-Vatɗina Lawna vaya nam watma'a, kay numa garam kayni, numa may jik hay gattaɗi.

¹⁴Muliyan-sa-ɗifinna hiɗi sa Levitna li tuwsi goy peldete, kay tuɗ sli timgilla vi Ma-Vatɗina, Lawna vi Israyel.

¹⁵Sum sa Levitna ziy timgilla vi Lawna kulo pelsiya hiɗi zugulla, ki Musus vul hagata kuɗ dita vi Lawn nala.

¹⁶David di tam sa ŋulona vi sa Levitna ala sumuna visi sa gi nulla nisi ma laksi hay liyna visiya, hiɗi sle ma gi nulla ki dilla, dil ŋolla hiɗi kaway ma beɗayna, nisi cum ŋolo, delem ma tiy kulo ŋolo kay ɗek firita visiya.

¹⁷Sum sa Levitna lak sumun kayni hay lopna: Heman goora vi Jowel, jar ɓosiyomna: Asaf goora vi Berekiya; jar gurona vi Merari; ɓosiyosina Etan goora vi Kusaya;

¹⁸hiɗi nisi kayni, ɓosiyosi sa tuni kisina: Zakariya, Ben, Yaasiyel, Semiramot, Yehiyel, Unni, Eliyab, Benaya, Maseya, Matitiya, Elifele, Mikneya, Obed-Edom hiɗi Yeyel, sa lakay ŋom vun-galana.

¹⁹Sa gi nulla Heman, Asaf, hiɗi Etan, nisi ka hiɗi kaway beɗay slawna ma suwana.

²⁰Zakariya, Aziyel, Semiramot, Yehiyel, Unni, Eliyab, Maseya, hiɗi Benaya, nisi ka hiɗi dil ma tiy ɗeŋe.

²¹Hiɗi Matitiya, Elifele, Mikneya, Obed-Edom, Yeyel hiɗi Azayeya, nisi ka hiɗi dil ma zigew glafandina kay sli nulla.

²²Kenaniya, ma ŋolla vi sa Levitna sa ziy jakŋa, nam tun vok sa ziy jakŋa, kay nam nagay kalamu.

²³Berekiya hiɗi Elkana si sa ŋom vun-ziyda vi timgilla.

²⁴Sebaniya, Yosafat, Nataneel, Amasay, Zakariya, Benaya hiɗi Eliyazar, muliyan-sa-ɗifinna ka buw togolomna vok timgilla vi Lawna, Obed-Edom hiɗi Yehiya kayni si sa ŋom vun-ziyda vi timgilla.

²⁵Bugol kayni David, sa maariyana vi Israyel, hiɗi sa ŋulona vi vok ma birimna yaway goy hay hagata, kay tuɗ sli timgilla vi bonota vi Ma-Vatɗina goy hay ziyna vi Obed-Edom pa, hiɗi firit ŋolo.

²⁶Sum sa Levitna ziy timgilla vi bonota vi Ma-Vatɗin kayni, hiɗi gutda vi Lawna; nisi ŋat luway guju siɗiya, fok-gamala siɗiya kaw kay lum ɗifini.

²⁷David ka cuki hiɗi sligar-barawna; sum sa Levitna sa ka ziy timgilla kaw nisi ka cuki ki kayn nala, sa gi nulla, ma ŋolla Kenaniya, sa ziy jakŋa hiɗi sa gi nulla; David ka hiɗi ŋoŋŋa ma barawna cuki talamu may.

²⁸Sum sa Israyel kaf tuɗ sli timgilla vi bonota vi Ma-Vatɗin aya hiɗi ciriyna, hiɗi buwna vi gozona, togolomna hiɗi kaway beɗayna, nisi ka ci dilla hiɗi dil ŋolla.

²⁹Hay li ma timgilla vi Ma-Vatɗina ka kal hay ziyna vi David, Mikal goota vi Sawul ɗuw hay ir-ziyna. Ira' cuk kay mulla David, nam ka pir nulla hiɗi firita, nala na' panam hay dika'a.[8]