Read Masana 1 LABAR-MA-LIYNA 16 Bible Online

1 LABAR-MA-LIYNA 16 - Masana bible

1 LABAR-MA-LIYNA 16

¹Bugol nisi mar timgilla vi Lawn marna, nisi tunum hay guɗukŋa ma David kotom kalamna, nisi li ɗifin ma ŋal-goyna hiɗi ɗifinna vi lop ma slugona vok ir Lawna.

²Hay li ma David ɓalam vat hiɗi ɗifin ma ŋal-goyna hiɗi ɗifinna vi lop ma slugona vatna, nam gi bol kay sumuna hay semda vi Ma-Vatɗina.

³Bugol kayni sum sa Israyel kaf, jufayna hiɗi boyna kaw, nam ɓurawsi fun kisi kep kepe, hambul kep kepe hiɗi gulda-guldana kaw.

⁴Sa Levitna segena sa lopna visi kayni kay yi sem Ma-Vatɗina, Lawna vi Israyel, kay tiyim selemu, kay suburumu kaw, David laksi goy vok timgilla:

⁵Nisi kayni: Asaf ma ŋolla, Zakariya ma mul ma'na, bugolom kayni mi Yeyel, Semiramot, Yehiyel, Matitiya, Eliyab, Benaya, Obed-Edom hiɗi Yeyel. Nisi ka hiɗi sle ma gi nulla: Dilla hiɗi dil ŋolla, Asaf ka ci tasa-beɗayna may.

⁶Muliyan-sa-ɗifinna Benaya hiɗi Yahaziyel ka buw togolomna dok-dok vok timgilla vi bonota vi Lawna.

⁷David vul hagata tam Asaf hiɗi ɓosiyomna kay tiy sem Ma-Vatɗina kayni hay buur na'ta.

⁸Tiygi sem Ma-Vatɗina, yigi semda valamu, ɗekgi lopna valam ŋulona goyo jar jaf-sumuna.

⁹Gigi nul tam Ma-Vatɗina, ligi nul kay ŋolda valamu. Vargi kay sle ma ŋaana valam kafe.

¹⁰Suburgi tuwgi kay semda valamu ta peldetta, hin nisi sa gar Ma-Vatɗina li firiya.

¹¹Gargi Ma-Vatɗina hiɗi donota valamu, gargi dok-dok kay wum vokomu.

¹²Humgi gigi kay slen ma ŋaana ma nam li'e, ɗekka hiɗi kitata vi vunamu,

¹³nigi gurona vi Israyel ma sunda valamu, gurona vi Yakub, sa nam vilekgi goyna,

¹⁴namu mi Ma-Vatɗina, Lawna vaya; kitata valamu li tam nagat kafe.

¹⁵Humgi ma gigi dok-dok kay bonota valamu, kay yoboyna valamu kay jafgi vokgi birimi,

¹⁶kay bonota ta nam juna' hiɗi Abraham, kay va ma nam yi kalamu tam Isaak.

¹⁷Nam tun bonota kuɗ va ma nam dum tam Yakub, kay Israyel ki bonota vatɗita,

¹⁸nam di'e: Nan ma vulaŋ nagata Kanaan, ki vocota ta ir vigiya nala.

¹⁹Hay na'ta nigi ay kiɗaya, nigi ir kiɗay ɦawa, hay liyn ma nigi lakay hay ɗawni.

²⁰Nisi ka jok jar jaf-sumuna sumuna, jok hay mulda tara'a tara'a kay tuɗ tam jaf-sum sara'a sara'a;

²¹May nam min mal hagata tam sa'a kay curoɗsiɗi, may nam law ɦiy kisiya tam muliyan ala:

²²Sumuna vanu sa mul ɦoki kisina nigi ma tun ɓigi tisiɗi, ligi va ma joo'o tam sa jobta vanɗi kaw!

²³Gigi nul tam Ma-Vatɗina, nigi sa hay nagat kaf, digi labar ma firina vi su'da valam goy hay buurta kaf,

²⁴Digi labara vi gajijita valamu goy tam jaf-sumuna, digi ŋaata valamu goy tam sumun kaf.

²⁵Kay Ma-Vatɗina nam ŋolo, nam nagay kay fi suburta kaw, narta kuɗum ŋolo suw lawayn kafe;

²⁶kay lawayna vi sum segen kaf nam mi lawayn ma waana, may Ma-Vatɗina mi ma li wuralawna,

²⁷wileta hiɗi jifiyta ka vok iramu, donota hiɗi firita ka hay liy ma musta valamu.

²⁸Nigi jaf-sumuna, vulgi mi Ma-Vatɗina, vulgi mi Ma-Vatɗina gajijita hiɗi gaŋeraŋa!

²⁹Vulgi gajijita hay semda vi Ma-Vatɗina, margi vulda, cukgiyay vok-iranu, girifgi gaa vok Ma-Vatɗina hiɗi ganna ma peldetna,

³⁰Tuwgi ma wirgi vokomu nigi sum sa hay nagat kuɗulu, awa nagat tuni ɗeŋe, na' ma geɗ noŋɗi.

³¹Hin dukalawna li firiya, hin nagat li firiya kaw, digi goy jar jaf-sumuna ala: Ma-Vatɗina ka ti mulu.

³²Hin niy-lumna hiɗi sle ma hayam kafna suwa'a. Hin fulda li firiya hiɗi sle ma haya' kafna.

³³Hin gu ma fulla pat ciriyna, vok ir Ma-Vatɗina, kay nam ka co'o kay ka kitat kay nagata.

³⁴Gigi nul tam Ma-Vatɗina, kay nam ŋaa'a, kay ŋaata valam mus dok-doko.

³⁵Digi ala: Suɗma goyo, Lawn ma su'da vuma'a, tokma yuma'a, yawma goy jar jaf-sumun pa, kay numa ma tiy semda vaŋ ta peldetta, kay numa ma vulaŋ gajijita, suburaŋu kaw.

³⁶Suburta tam Ma-Vatɗina, Lawna vi Israyel hay vatɗita vatɗita, bugolda sumun kaf di ala amen! Nisi subur Ma-Vatɗina kaw.

³⁷David lak Asaf hiɗi ɓosiyomna vok timgilla vi bonota vi Ma-Vatɗina, kay nisi ma li lop ma hay buurta kafna dok-doko vok timgilla.

³⁸Obed-Edom goora vi Yeditun, hiɗi Hosa, hiɗi ɓosiyosina, nisi noŋ pet dok-karkiya yam glafandi, sa ŋom vun-galana;

³⁹Mul-ma-ɗifinna Sadok, muliyan-sa-ɗifinna sa ɓosiyomna, vok tabernaklena vi Ma-Vatɗina, hay liyn ma ɗiŋiriŋŋa ma ka hay Gabawon,

⁴⁰kay nisi ma li ɗifin ma ŋal-goyna dok-doko tam Ma-Vatɗina, grawta hiɗi vulatita, kulo kay giwin ma ŋal ɗifinna, kay nisi ma li kuɗ sle ma ɗoy hay gatta ta Ma-Vatɗina vula' mi sa Israyel kaf.

⁴¹Sum sa ay katsin kayni: Heman, Yeditun hiɗi segena sa vilekaya, sa sesi yiy goyo kay nisi ma tiy sem Ma-Vatɗina. Kay ŋaata valamu mus ta-ta hay vatɗita.

⁴²Sum sa ay katsin kayni: Heman hiɗi Yeditun, hiɗi togolomna, hiɗi kaway-beɗayna kay cumu, hiɗi sle ma gi nul tam Lawna hiɗi namna, nisi lak gurona vi Yeditun hay vun-galana.

⁴³Sumun kaf hot vo hay ziyna visiya visiya. David hot vo'o kaw kay gi bol kay ziyna valamu.