Read Masana 1 LABAR-MA-LIYNA 17 Bible Online

1 LABAR-MA-LIYNA 17 - Masana bible

1 LABAR-MA-LIYNA 17

¹Hay li ma David mus hay ziyna valamu, nam di tam Natan sa ma jobta ala: Wulini nan musi kayni hay ziy ma ini hiɗi gu-gamna, timgilla vi bonota vi Ma-Vatɗina tuni kayni gaa kuɗ guɗukŋa may.

²Natan hot dit tam David ala: Laŋ slen ma kuɗ dikaŋ kafna, kay Lawn ka hiɗi naŋu.

³Hay henjet na'ta kayni, Ma-Vatɗina di yoboyn tam Natan ala:

⁴Tuɗaŋu, daŋ tam sa ma sunda vanu David ala: Ma-Vatɗina ka di'e: Ziyda ta nan min mus haya'ta ɗawni, ma inanti mi naŋɗi,

⁵kay hay li ma nan kal sa Israyel ay goy pa ta-ta vaydi, nan bay mus hay ziy tuwa, may nan ka mus kayni kuɗ guɗukŋa, kuɗ balakŋa.

⁶Arigekaw ma nan ka tuɗ hiɗi sa Israyel kaf kayni, sum sa ka kitata sa nan vulsi hagata kay ŋom sumuna vanu, nan disi sem kep ala nigi min kotan ziy ma hiɗi gu-gamnaɗi kay mige, nan disi nala su?

⁷Wulin kayni naŋ ma di tam sa ma sunda van David ala: Ma-Vatɗina vi vok-ma-duura ka di ala: Nanu mi ma faŋay goy ful kuɗ farayna, nan vaŋay kayni kay naŋ ma tun vok sumuna vanu sa Israyella.

⁸Nan ay hiɗi naŋu hay liyn ma naŋ tuɗi hayna kafe, sa gawt kaŋŋa nan digiɗsi goy vokaŋ kafe, nan muɗaŋ seŋ tiy ŋray ca ki sum sa ŋulona sa gaa kay nagat nala.

⁹Nan vul liyna mi sumuna vanu sa Israyella, nan tunsi gaa'a kay nisi ma lak hay liy namna, may kay geɗ kulo loɗi, kay sum sa bay-ɗigera ma lisi lasi,

¹⁰ki jew naɗi, ki hay li ma nan tun sum sa ka kitana kay sumuna vanu sa Israyella naɗi. Sum sa gawt kigina nan hotsi yisi gaa kuɗgi kaf. Nan min daŋ ala Ma-Vatɗina ma inaŋ ziya.

¹¹Hay li ma buura vaŋ asawa kay naŋ mita, nan ma ŋom jafna vaŋ sa bugoloŋŋa, kep jar gurona vaŋu, nan ma muɗ mulda valam dono'o.

¹²Ma inan ziy ɗawni mi namu, nan ma muɗ zlamda-mulda valam dono'o kay dok-doko.

¹³Nan kay tuwanu ma li mi bulumu, namu ma li mi goora vanu; ŋaata van hiɗi namu nan ma yawa' goyo ki nan yawa' goy hay ɓam sa ma naŋ ka ti mulda hay baŋalam wulini naɗi.

¹⁴Nan ma musum dok-doko hay ziyna vanu hiɗi mulda vanu, mulda valamu ma muɗ dono dok-doko kaw.

¹⁵Slen ma Lawn ɗekem kir Natan kafna nam tuɗa dum goy mi David.

¹⁶Bugol kayni mulla David kaliya, nam col vok ir Ma-Vatɗina nam di'e: Nanu mi gige Ma-Vatɗina? Nan nagay a naŋ con jafna van ta-ta tani su?

¹⁷Kayni mi va ma kiraŋ kiɗay ɦawa Lawna, naŋ ka di kay ziyna vi sa ma sunda vaŋu kay liyn ma vok ginena. Naŋ ɗuwan kayni ki sa ma ŋol nala, naŋ Ma-Vatɗina Lawna ma Kulo-Jamna.

¹⁸Wulin kayni gajijita ta naŋ vulanu nan as daŋgi kuɗa' ɗawn meloge? Naŋ kay tuwaŋu wi sa ma sunda vaŋu.

¹⁹Ma-Vatɗina kay naŋ minan hiɗi dikaŋ kafe, kuɗ na'ta slen ma ŋulon lakŋi naŋ lumu, kay ɗekem goyo.

²⁰Ma-Vatɗina sa ma ŋray hiɗi naŋ mayɗi, Lawn mara'a may goy bugolaŋ naŋɗi, jar slen ma numa humum hiɗi humma kaf lakŋi.

²¹Jaf-sum sara sa hay nagata, sa ki jaf-sumuna vaŋ sa Israyella nala, sa lawayna visi kali butsi goyo kay muɗsi goy sumuna valamu, jaf-sum nisina ka su? Kuɗ seŋ ma tiyna, naŋ li sle ma ŋulona, sle ma ɦuyumna, naŋ digiɗ jaf-sumun goy vok sumuna vaŋu sa naŋ butsiyay goy hay Egipte pana.

²²Sumuna vaŋ sa Israyella naŋ muɗsi goy si sumuna vaŋu dok-doko; naŋu mi Ma-Vatɗina, naŋ muɗi mi Lawna visiya may.

²³Wulin kayni Ma-Vatɗina, yoboy ma naŋ dum kat sa ma sunda vaŋu hiɗi ziyna valamu vunam ma hoba kay dok-doko, laŋ kuɗ dita vaŋu.

²⁴Hin vun yoboyna vaŋ hoba, kay semda vaŋ ma li ŋolo kay dok-doko, kay sumuna ma di ala: Ma-Vatɗina vi vok-ma-duura, Lawna vi Israyel, namu mi Lawna vi Israyel! Hin ziyna vi David ma sunda vaŋu muɗ dono'o vok iraŋu!

²⁵Kay naŋ Lawna vanu kay tuwaŋu naŋ ɗekan ŋayayt kiran ala naŋ ma cukan ziya. Kuɗ na'ta kayni nan fi kursulita kay li siɗawt vok iraŋu.

²⁶Wulin kayni Ma-Vatɗina, naŋu mi Lawna naŋ ɗek ŋaata na'ta goy tam sa ma sunda vaŋu.

²⁷Wulin kayni naŋ miniya kay gi bol kay ziyna vi sa ma sunda caŋu, kay nam mus dok-dok vok iraŋu, kay mige Ma-Vatɗina, va ma naŋ gi bol kalam gina, nam giy bolo ta-ta hay vatɗita.