Read Masana 1 LABAR-MA-LIYNA 18 Bible Online

1 LABAR-MA-LIYNA 18 - Masana bible

1 LABAR-MA-LIYNA 18

¹Bugol slen kayni, ɗuwgi slen ma li'e: David kol kay sa Filistina, nam hotsi yisi gaa'a. Gat hiɗi naga ma kuɗa'na nam yawam hay ɓam sa Filistina.

²Nam kol kay sum sa Mowabna, nisi lak gaa kuɗ gaŋeraŋa valamu, nam tun taara kisiya.

³David kol kay Hadadezer mulla vi Soba, hay galla vi Hamat, hay li ma Hamat kaliya kay kol kay niy-lumna Eufrata.

⁴David yaw keke-ma-duura hay ɓalam birim kepe, sa jaŋ kulumayn birim siɗiya, soje sa hiɗi sesi ɦawana birim dok-ma'. Kulumayna nam kaam tiŋtiŋam goy kafe, may nam ŋom kulumay mara'a ir kis.

⁵Sum sa Siriyana sa hay Damas co kay gut kuɗ Hadadezer mulla vi Soba, may David ci sumun kuɗsi birim dok-ma' yam ma.

⁶David tun sojen hay Siriya vi Damas, sum sa Siriyan lak gaa kuɗ gaŋeraŋa valamu, nisi ka wurak taara mi David may. Ma-Vatɗina ka vul kolda mi David hay liyn kaf ma nam ka tuɗ haya.

⁷Maray ma ora ma ka hay ɓam sa sunda vi Hadadezer David yawamu, nam maram hay Yerusalem.

⁸Lo David yaw wayna ŋolo hay Tibkat hiɗi Kun, hoyok-ziyna vi Hadadezer. Salomon kot ŋarak ma yor kawayna, dolla hiɗi sle ma kotom hiɗi wayna kaf.

⁹Tohu, mulla vi Hamat, hay li ma nam hum ala David kolawa kay sojena vi Hadadezer mulla vi Soba,

¹⁰nam gi goora valam Hadoram kat mulla David, kay gum deɓe, kay suburumu kaw, kay nam kolawa kay Hadadezer. Kay hay na'ta duura ka jar Tohu hiɗi Hadadezer. Nam jok ora, doorota hiɗi wayta kaw mi David.

¹¹Mulla David vul sle namna goy ɗifini mi Ma-Vatɗina, doorota hiɗi ora ma nam yawamay goy hay ɓam sumun kaf, ɓam sa Edom, sa Mowab, sa Amonna, sa Filistina hiɗi sa Amalekŋa.

¹²Abiskay goora vi Seruya ci sum sa Edomna birim doogo yam glafandi hay lokŋa vi mandana.

¹³Nam tun sojena hay Edom, sum sa Edomna kaf lakay gaa kuɗ gaŋeraŋa valamu. Ma-Vatɗina vul kolda mi David hay liyn kaf ma nam ka tuɗ haya.

¹⁴David ti mulda kay sa Israyel kafe, nam ka li ɗigerta hiɗi gasita tam sumuna valam kafe.

¹⁵Yowab goora vi Seruya mi ma ŋolla vi sojena; Yosafat goora vi Ahilud mi ma ŋom slena;

¹⁶Sadok goora vi Ahitub hiɗi Abimelek, goora vi Abiyatar si sa li lop ɗifinna; Savoha mi ma ɗo slena;

¹⁷Benaya goora vi Yehoyada mi ma ŋolla vi sa Keretiyena hiɗi sa Peletiyena, gurona vi David kayni si sa lak kulo vun busi goboyna.