Read Masana 1 LABAR-MA-LIYNA 19 Bible Online

1 LABAR-MA-LIYNA 19 - Masana bible

1 LABAR-MA-LIYNA 19

¹Bugol slen kayni, ɗuwgi van ma lina: Nahak mulla vi Amon mita, goora valam ti mulda hay baŋalamu,

²David di'e: Nan min li ŋaat tam Hanun goora vi Nahak, kay bulumu li ŋaat katanu. Nala David cuk sunda talamu kay teŋem iramu kay mitta vi bulumu. Sa sunda vi David co hay nagata vi sa Amonna kat Hanun, kay teŋem iramu.

³May sa ŋulona vi sa Amonna di tam Hanun: Naŋ var ala David cuk sumuni kayni kay tiy buŋ gasiya su? Nam cuksi ay kataŋ kayni kay ɗuw hoyok-ziyna, kay peɗemu, kay tom gaa'a kaw naɗi su?

⁴Ki kayn nala Hanun yaw sa sunda vi David, nam welsi jiwersi goyo, sligar ma tisin nam kaam goy guɓuriya ta-ta kulo cifinsi zaw, bugolda nam gisi irsiya.

⁵Nisi mar labara vi sum nisina mi David, nam cuk sumun kirsiya, kay disi ala: Lakgi ɗawni hay Yeriko, ta-ta jiwergi ɦar tuwa, bugolda nigi hotiya. Kay sum nisina muɗi zulo ŋolo.

⁶Hay li ma ma sum sa Amonna wi ala nisi muɗ tuwsiyawa bisi kir David, Hanun hiɗi Siriyana jok gurjuta ir talente* birim kep tam sum sa Siriya sa hay Mesopotamiya, sa Siriyana sa hay Maaka hiɗi sa hay Soba, kay gar kekena hiɗi sum sa ɓe kulumayna kay dur kuɗsiya.

⁷Nisi fi keken birim dok-ɦidi yam ma', mul ma Maakana hiɗi sumuna valamu kaw, nisi co'o lak goy vok Medeba. Sum sa Amonna cukay goy hay hoyok-ziyna visiya, kay tok tuwsiya, kali kay li duura.

⁸Hay li ma David hum kayni, nam gi Yowab hiɗi soje sa jufayna kuɗum kaf kay tuɗ dursiya.

⁹Sum sa Amonna cukay goyo, nisi zlar goy kay li duura, hay vun hoyok-ziyna; muliyan sa cona ka tuni goy visiya hay sinena.

¹⁰Yowab wi ala duura ka vokom lay bugolom lay, nala nam vilek soje sa dono jar sa Israyella, nam zlarsi goy vok sa Siriyana;

¹¹sum sege sa hinina nam laksi gaa kuɗ gaŋeraŋa vi ɓasulumna Abiskay, nisi zlar goy vok sa Amonna.

¹²Nam di'e: la sum sa Siriyan dono suwanu, naŋ ma co gut kuɗanu; la sum sa Amonna dono suwaŋ naŋu, nan ma co gut kuɗaŋu may.

¹³Laŋ dono'o, lakay dono'o kay sumuna vaya hiɗi hoyok-ziyna vi Lawna vaya, hin Ma-Vatɗina li va ma kiram ŋaana.

¹⁴Yowab hiɗi sum sa kuɗumna ɦur kulo kay dur sa Siriyana, may sa Siriyan mun voksi jaŋi.

¹⁵Hay li ma sa Amonna wi ala sa Siriyan muni jaŋi, nisi kaw mun jaŋi vok Abiskay ɓasum Yowabna, nisi cuk kulo hay hoyok-ziyna; Yowab kali hay Yerusalem.

¹⁶Hay li ma sa Siriyan wi ala sa Israyel kolawa kisiya, nisi gi sunda kay tok yam sa Siriyana sa ay goy hay gal hena vi niy-lumna; Sofak, ma ŋolla vi sojena vi Hadadezer ka tuni voksiya may.

¹⁷Nisi vul labara mi David, nala David tok sa Israyel kaf, nam ɦaw Yordan kulo'o, nam co katsi goboyo, zlar sojen goyo kay li duura. David dur tuwsi hiɗi sa Siriyana, sa Siriyana muni jaŋi vok sa Israyella,

¹⁸David ci sum sa kay keke-ma-duura birim siɗiya, sum sa hiɗi sesi birim dok-fiɗi, nam ci Safak ma ŋolla vi sojena kaw.

¹⁹Hay li ma muliyan sa ka gaa kuɗ gaŋeraŋa vi Hadadezer wi ala sa Israyel kolawa kisiya, nisi li toyta hiɗi David, nisi lak gaa kuɗ gaŋeraŋa valamu; sum sa Siriyana min co'o kay gut kuɗ sa Amonna loɗi.