Read Masana 1 LABAR-MA-LIYNA 20 Bible Online

1 LABAR-MA-LIYNA 20 - Masana bible

1 LABAR-MA-LIYNA 20

¹Hay busata ka'ta, hay liyn ma muliyan tuɗ goyo kay li duura, Yowab tun voko hiɗi sojen kuɗum ŋolo, nisi to nagata vi sum sa Amonna, bugolda nisi cap hay Rabba, nisi ŋuya'a. May David hin kulo hay Yerusalem. Yowab kol kay Rabba, nam to hoyok-ziyn gaa'a.

²David sli bogoray ta kay yam mulla, nekka va'a ir talente ma ora kepe, tuwa' kotay hiɗi hiɗiy ma ŋaana. Nisi tun bogoray na'ta kay David. Sle ma ɓuraŋŋa nisi yawamay kulo hay hoyok-ziy namna.

³May sum sa hay hoyok-ziy namna nam yawsiyay kaf goyo, nam harsi goyo hiɗi siina, hiɗi kaway ma jarfayna, calsi hiɗi ceɗna; hoyok-ziyna vi sum sa Amonna kaf nam lum ki kayn nala kaw. Bugol kayni David hotay hay Yerusalem hiɗi sumun kaf.

⁴Bugol kayni, duura li'e hay Gezer hiɗi sa Filistina, Sibbekay ma Husana ci Sippay, kep jar gurona vi sa Refayimna; nisi hot yam sa Filistin gaa'a.

⁵Duur fok hiɗi sa Filistina. Elhanan goora vi Yayir ci ɓasum Goliyatna, Lakmi ma Gatna, kawayta valamu ŋray ca hiɗi gu-malla vi sa ma cil sligara.

⁶Duura li lo hay Gat. Sa mara ka kep wuli fiyoko, cita-selem karkiya karkiya lay, cita-ɓalam karkiya karkiya lay, tapay pet dok-ma' yam fiɗi. Namu mi jafna vi Rafa lay.

⁷Nam tun caw gufut sa Israyella, nala Yonatan goora vi Simeya ɓasum Davidna cum goy mati.

⁸Sum nisin kaf kayni may goy hay jafna vi Rafa hay Gat pa. Nisi mit kayni cisi mi David hiɗi sa sunda valamu.