Read Masana 1 LABAR-MA-LIYNA 21 Bible Online

1 LABAR-MA-LIYNA 21 - Masana bible

1 LABAR-MA-LIYNA 21

¹Satan fok kulo kat sa Israyella, nam zut David kay ŋaɓ sum sa Israyel goyo.

²David di tam Yowab hiɗi sa ŋulona vi sumun ala: Tuɗgiya, ŋaɓgi sa Israyel goyo, fokay hay Ber-Seba pa ta-ta hay Dan, nigi ma vulan labara kay nisi ka gaage nan ma wi'e.

³Yowab di'e: Hin Ma-Vatɗina muɗ sumuna valam ŋol sem kis suwa. Hi! Naŋ mulla, mulanna, nisi kaf kayni may si sa sunda vaŋɗi su? May naŋ min kal sa Israyella hay joota kayn kay mige?

⁴May dita vi mulla suw kay Yowab, nala Yowab kal goyo, nam ŋuy Israyel kafe; bugolda nam hotay hay Yerusalem.

⁵Yowab vul ŋaɓta vi sumuna mi David ki kayn nala: Hay Israyel kaf kayn sum sa gaɓ kew-gaferaŋa nisi miliyoŋ kep hiɗi birim kis, hay Yuda sa gaɓ kew-gaferaŋa tapay birim kis-fiɗi kalam dok-siɗiya may.

⁶Yowab min ŋaɓ jafna vi Levi hiɗi jafna vi Benyamin goyɗi, kay dita vi mulla kayni may cuki kuɗ hayamɗi.

⁷Dita vi mulla na'ta kayni ɓulak dik Lawna, nam ci sa Israyella.

⁸David di tam Lawna, hay li ma nan li va kayni, nan li suluk ma ŋolo! Wulin kayni naŋ vulaŋ gida mi sa ma sunda vaŋ tage kay nan li kayni ki sa ma ɦay-ɦayn nala.

⁹Ma-Vatɗina di tam Gad ma wi-vokomna vi David ala:

¹⁰Tuɗaŋu daŋ tam David, Ma-Vatɗina ka di'e: Nan lak bakmaran vokaŋ ɦidi, vilekaŋ kepe, kay nan min wataŋ hiɗi namu.

¹¹Gad co tam David, nan dum ala: Ma-Vatɗina ka di ala:

¹²Vilekaŋu: busata vi mayt ɦidi lebo, sum sa gawta ma digiɗgi ir til ɦidi, hay li ma kewta vi sa gawt kigina ma calgiya lebo, hiɗi kew-gaferaŋa vi Ma-Vatɗina, hiɗi bakmarana hay nagata, sunda wuralawna vi Ma-Vatɗina ma ŋuy nagata vi Israyel kaf hiɗi cita-goyta ir buur ɦidi su? Wulini ɗuwaŋ jaramu kay nan ma hot dita tam sa ma ganayna.

¹³David hot dit tam Gad: Nan ka hay yorta ŋolo, marya kayni nan mit hay ɓam Ma-Vatɗina kay slugota valamu ka ŋolo; may nan min mit hay ɓam saɗi.

¹⁴Ma-Vatɗina hin bakmarana ni gaa'a kay Israyel, sumun birim dok-siɗiya mit kuɗ sa Israyella.

¹⁵Lawna gi sunda-wuralawna valam aya kay to Yerusalem gaa'a; hay li ma sunda-wuralawna ka to Yerusalem gaa'a, Ma-Vatɗina ɗuwa, nam muɗ yora kay joota na'ta. Nam di tam sunda wuralawna ma ka to liyn gaan ala: Asiya, wulini hotaŋ ɓaŋ goyo. Sunda-wuralawna vi Ma-Vatɗina ka coli goboy hiɗi muɗakŋa vi Ornan ma Yebusna.

¹⁶David poŋ iram kulo na kayni, nam wi sunda-wuralawna vi Ma-Vatɗina ka coli jar nagata hiɗi dukalawn zaw, hiɗi kew-gaferaŋa ka patay goy hay ɓalam kay', iram muɗi kir Yerusalem. David hiɗi sa maariyana, cuki hiɗi sligar bolla, nisi dab voksi gaa kay nagata.

¹⁷David di tam Lawna: Ma-Vatɗina Lawna vanu, sa ma vul hagata kay ŋaɓ sumuna kayni may mi nanɗi su? Li sulukŋa kayn mi nanu, li va ma joon kayn mi nan kaw; may sum nisin kayni, va ma nisi lumna mi mige? Wulin kayni naŋ ma lasanti mi nanu hiɗi ziyna vanu, naŋ gi bakmaran jar sumuna vaŋɗige?

¹⁸Sunda-wuralawna vi Ma-Vatɗina di ay jewe tam Gad kay nam ma di tam mi David ala: David ma tuɗa kay in giwin-ma-ɗifinna tam Ma-Vatɗina, kulo kay muɗakŋa vi Ornan ma Yebusna.

¹⁹David kaliya, kuɗ yoboy ma Gad dumu hay semda vi Ma-Vatɗina.

²⁰Ornan muɗ iramu, nam wi sunda-wuralawna. Gurona valam sa fiɗina hiɗi namu ŋay tuwsiya. Hay na'ta nisi ka to alkamarena.

²¹Hay li ma David co goboy hiɗi Ornan, Ornan cuk iram goy kayni nam wi David; nam kali goy hay muɗakŋa pa nam dab vokom gaa kay nagata vok David.

²²David di tam Ornan; naŋ vulan muɗakŋa vaŋu kay nan min in giwin-ma-ɗifinna tam Ma-Vatɗina nan min gusum hiɗi gurju'u, kay bakmarana ma jar sa Israyella ma kal goyo.

²³Ornan hot dit tam David: Slaŋga mulla vanu, laŋ va ma kiraŋ ŋaana; ɗuwaŋu, nan vul luway ma ŋalam goy ɗifinna, cikakŋa baŋal guna, alkamarena kay li ɗifinna, nan min vulum kafe.

²⁴May mulla David di tam Ornan: A'a, nan gusum gusi kaŋu, nan gusum hiɗi gurju'u, kay slen ma ir vaŋŋa, nan as tuɗum tam Ma-Vatɗina kay li ɗifin ma ŋal-goyna ma ɦawana hiɗi namɗi.

²⁵David vul ora mi Ornan ir sikel* kis-karkiya kay pi giwin-ma-ɗifinna gaa'a.

²⁶David in giwin-ma-ɗifinna hay liy namna, nam li ɗifin ma ŋal-goyna hiɗi ɗifinna vi lop ma slugona, nam siɗaw Ma-Vatɗina, Ma-Vatɗina humumu, nam hin kuta jikay gaa dukalawn pa kay ŋal ɗifinna.

²⁷Ki kayn nala Ma-Vatɗina law tam Sunda-Wuralawna, sunda-wuralawna hot kew-gaferaŋa kulo hay faara valamu may.

²⁸Hay na'ta kayni, hay li ma David wi ala Ma-Vatɗina hotom ditawa kulo kay muɗakŋa vi Ornan ma Yebusna, nam li ɗifini.

²⁹May tabernaklena vi Ma-Vatɗina, ma Musus inim goy hay fulda, hiɗi giwin ma ŋal ɗifinna ay hay na'ta kulo hay liyn ma ɗiŋiriŋŋa vi Gabawon.

³⁰May David fi a tuɗ job Ma-Vatɗin ɗawnɗi, kay nam muɗi yora kay kew-gaferaŋa vi Sunda-Wuralawna vi Ma-Vatɗina.