Read Masana 1 LABAR-MA-LIYNA 22 Bible Online

1 LABAR-MA-LIYNA 22 - Masana bible

1 LABAR-MA-LIYNA 22

¹David di'e: Tan kayni ma li ɗawn mi ziyna vi Ma-Vatɗina, Lawna, tan kayni ma hin ɗawni mi giwin ma ŋal ɗifinna vi sa Israyella.

²David di ala nisi ma tok sum sa pulla sa ka hay nagata vi Israyella, nam vul hagata kay ceɗ hiɗiyna, kay ka hiɗiy ma fiyokŋ goyo kaw kay inda vi ziyna vi Lawna.

³David kot kawayn ŋolo kay oslna vi vun-ziyna, kaway ma jun vun-ziyda, wayn ŋolo kaw, san as kay ŋaɓam noŋɗi,

⁴gu-gamna ma sa as ŋaɓamɗi, kay sum sa Sidonna hiɗi sum sa Tirusna mar gu-gamna ŋolo mi David.

⁵David di'e: Goora van Salomon ka joriyo tuwa, nam bay niy tuwa, may ziy ta nam ina' mi Ma-Vatɗin ɗawni, se' ma tiy ŋolo, na' ma wile kulo ŋolo hay nagat kafe; kuɗ kayni nan min li kotta kay ziy na'ta. Kuɗ na'ta David li kotta ŋolo jew mitta valamu.

⁶David yi goora valamu Salomon, nam vulum hagata kay in ziyda vi Ma-Vatɗina Lawna vi Israyel.

⁷David di tam Salomon: Goora vanu, nan ka hiɗi varta jew pa kay in ziy mi Ma-Vatɗina Lawna vanu.

⁸May Ma-Vatɗina di yoboyn tan ala: Naŋ ɦok busuwn goy ŋolo; naŋ li duur ma ŋulon ŋolo; nala naŋ as in ziy hay semda vanɗi, kay naŋ ɦok busuwn goy ŋolo vok iranu gaa kay nagata.

⁹Humaŋu, naŋ ma vuɗ gooro, nam ma li mi sana vi tun-sukka, nan ma vulum tun-sukka hay li ma nan ma butum goy hay ɓam sa gawta sa galam kafna. Kay semda valam ma ya' Salomon, nan ma vul sle'ta hiɗi tun-sukka mi sa Israyella hay buura irita valamu.

¹⁰ma in ziyda hay semda van ɗawn mi namu. Nam ma li mi goora vanu, nan ma li mi bulumu may, zlamda-mulda valamu nan ma muɗa' dono'o kay dok-doko hay Israyel.

¹¹Wulin kayni, goora vanu, Ma-Vatɗin li hiɗi vaŋu, kay naŋ ma li dono'o, kay naŋ ma in ziyna vi Ma-Vatɗina Lawna vaŋu, ki nam di taŋ nala.

¹²Hin Ma-Vatɗina vulaŋ humda hiɗi yalda vulge, vulaŋ ŋolda kay Israyel kaw, kay naŋ ma li kuɗ gatta vi Ma-Vatɗina Lawna vaŋu.

¹³La ɗota hiɗi dita vi Ma-Vatɗina ta nam vula' mi Musus tam sa Israyella naŋ li kuɗa'a, ŋoma'a kaw, naŋ ma li ŋolo. Laŋ tuwaŋ dono'o, laŋ kursuliya, li narɗi, tuwaŋ wiraŋɗi.

¹⁴Kayni mi sle ma nan kotom hiɗi maŋayta vanu kay ziyna vi Ma-Vatɗina: Ora ir talente* birim kis, doorota ir talente miliyoŋ kep, wayna hiɗi kawayna ka ŋolo, sa as ŋaɓamɗi. Nan kot guna hiɗi hiɗiyna kaw, naŋ ma gar mara talam lo.

¹⁵Sum sa li lopna ka kataŋ ŋolo, sa ceɗ hiɗiyna hiɗi guna, sum sa yal ŋolo hay lopn kafe.

¹⁶Ora, doorota wayna hiɗi kawayna, ma sa as ŋaɓamɗi. Fokaŋ kulo'o, laŋ lopo, kay Ma-Vatɗina ka hiɗi naŋu.

¹⁷David vul hagata tam sa ŋulona vi Israyel kaf kay nisi tap tam goora valam Salomon kay gutumu:

¹⁸Ma-Vatɗina Lawna vigiya may hiɗi nigiɗi su? Nam vulgi tun-sukka hay gal kafɗi su? Kay sum sa hay nagata nam vulsi hay ɓanu, nagata vuli hay ɓam Ma-Vatɗina hiɗi sumuna valamu.

¹⁹Wulin kayni nigi ma vul dikgiya hiɗi ciwta vigi kaw goyo kay gar Ma-Vatɗina. Lawna vigiya, fokgi kulo'o, ingi ziyda vi Ma-Vatɗina Lawna, kay tuɗ timgilla vi bonota vi Ma-Vatɗina hiɗi slen ma vuli ɗifin mi Lawna hay ziyda ta nigi min ina'a hay semda valam ɗawni.