Read Masana 1 LABAR-MA-LIYNA 28 Bible Online

1 LABAR-MA-LIYNA 28 - Masana bible

1 LABAR-MA-LIYNA 28

¹David tok sa ŋulona vi Israyel kaf hay Yerusalem. Sa ŋulona vi jafna, sa ŋulona vi vok-ma-duura sa ka sun mulla, sa ŋulona vi vok ma birimna hiɗi vok ma kisna, nisi sa tuni kay ŋom slena hiɗi sa ŋom farayna vi mulla, sa lakay kat gurona valamu, sa patayna, sum sa donona hiɗi sum sa asayn kaf.

²Mulla David col kulo kay selemu, nam di'e: Humgiya, nigi ɓosiyonna, nigi sumuna vanu, nan varay jewe kay in ziya kay tun timgilla vi bonota vi Ma-Vatɗina haya, kay ziyd na'ta ma li mi liyn ma Lawna vaya tun selem haya, nan tun caw kot tuwanu kay in ziyda.

³May Lawn di tanu: Naŋ as in ziy hay semda vanɗi, kay naŋ mi sena vi duura, kay naŋ ɦok busuwn goyo kaw.

⁴Ma-Vatɗina Lawna vi Israyel vilekan jar jafna vi sumiyan kaf, kay nan ma mus mi mulla vi Israyel dok-doko; kay nam vilek ziyna vi Yuda kay tun voko, nam vilek jafna vi bunu jar jafna vi Yuda, lo, jar gurona vi bunu nam minanti mi nanu kay nan ma ti mulda kay sa Israyel kafe.

⁵Jar gurona sa nam vulanti ŋolla kayni, (kay Ma-Vatɗina vulan guron ŋolo) nam vilek goora van Salomon kay nam ma mus kay zlamda-mulda vi Ma-Vatɗina, kay sa Israyella.

⁶Nam di tanu: goora vaŋu Salomon ma in ziyda hiɗi wur-daŋŋa; kay nan vilekemu ki goora van nala, nan kay tuwamu ma muɗ mi bulumu may.

⁷Nan ma muɗ mulda valam dono'o kay dok-doko, la nam li kuɗ gatta hiɗi dita vanu dok-doko ki vaydi nala.

⁸Wulin kayni, vok ir Israyel kaf, vok ir tokŋa vi Ma-Vatɗina, vok ir Lawna vaya ma ka humgiya kaw, vun-ma-gatna vi Ma-Vatɗina Lawna vigi kaf nigi ma ŋomom ŋaa'a ŋolo, kay nigi ma lak dok-dok hay nagata na'ta ŋaata tani, kay nigi ma hina' voco'o mi gurona vigi sa bugolgina kay dok-doko.

⁹Taŋ naŋu goora vanu Salomon, naŋ ma wi Lawna vi sumiyaŋu, naŋ ma sunumu hiɗi dikga ma' ma'taɗi, hiɗi ciwta vaŋ koti ŋaa'a, kay Ma-Vatɗina fek dikga kaf, nam poŋ ir varta kaf. La naŋ garamu nam ma hin tuwam a naŋ ma fumu, may la naŋ noyom goyo, nam ma gaŋ goyo kay dok-doko.

¹⁰Wulini naŋ ma wi ala Ma-Vatɗina vilekaŋawa, kay naŋ ma in ziyda ta peldetta valamu. Laŋ tuwaŋ dono'o, laŋ lopo.

¹¹David vul plaŋŋa vi diɓira hiɗi ziyna, ziy guray na cuk timgilla, ziy ma kulona, ziy ma hay kalafna, hiɗi ziyda vi goɓolokona.

¹²Plaŋŋa vi sle ma ka hay dikam kalafna nam vulumta: Kay inda vi wur-daŋŋa vi ziyda vi Ma-Vatɗina, ziy ma hay kalafna, ziy ma lak timgilla hay ziyna vi Lawna, hiɗi timgilla vi slen ma peldetna,

¹³vokŋa vi muliyan-sa-ɗifinna hiɗi sa Levitna, slen kaf ma li lop hiɗi namu hay ziyna vi Ma-Vatɗina, jakŋa kaf ma li lop hiɗi namu hay ziyna vi Ma-Vatɗina.

¹⁴Nam ɗekem kay ora, nekka vi sle ma kotom hiɗi ora, kayn di ala sle ma koti kay lopna mara'a mara'a kaf, hiɗi sle ma koti hiɗi doorota kaf, nekka vi slen ma koti kay lopna mara'a mara'a kaf;

¹⁵nekka vi va ma tun fitilla ma ora, hiɗi fitilla ma ora, va ma tun fitilla hiɗi fitilla ma doorona, kuɗ lopna valamu valamu.

¹⁶Nam vulum ora, ŋray dig nekka vi tablena ma lak fun kalamna, kay tablena kep kep kafe, doorota kay tablena ma doorona kaw.

¹⁷Nam ɗekem kotta vi ɗamta,[9] tasa ma ŋulona, genna ma gurayna ma koti hiɗi or ma bay rigasna, tasa ma ora, hiɗi nekka vi tasan kaf, tasa ma donona; hiɗi nekka vi tasan kaf;

¹⁸nam ɗekem jifta vi giwin-ma-ɗifinna ma koti hiɗi or ma yorayna, hiɗi nekka valamu. Lo nam ɗekem yal ma kot kekena, kerubena* ma ora ma gilaŋatam ka goy meɗiya kay bar yam timgilla vi bonota vi Ma-Vatɗina.

¹⁹David di'e: Slen kayni ɗom mi Ma-Vatɗina hiɗi ɓalam namu, nam vulanta kay nan ma humum cawamu, nam ɗekan yalla ma (naŋ) ma in slen kafna.

²⁰David di tam Salomon: Laŋ tuwaŋ dono'o, laŋ kursuliya, laŋ lopo; li narɗi, tuwaŋ wiraŋɗi, kay Ma-Vatɗina Lawna, Lawna vanu ma li hiɗi naŋu; yalam ma jokaŋɗi, nam noyaŋ goyɗi, ta-ta lop ma kay ziyna vi Ma-Vatɗina vat goy kafe.

²¹Vokŋa vi muliyan-sa-ɗifinna hiɗi sa Levitna kaf ka tani, kay li lop ziyda vi Lawna. Nisi ka kataŋu kay li lopn kafe, sum sa hiɗi minda sa yalla, sa li lop kuɗ jafam kaf ka'a, sa ŋulona hiɗi sumun kaf sa lumaɗna kay hum dita vaŋu.