Read Masana 2 LABAR-MA-LIYNA 1 Bible Online

2 LABAR-MA-LIYNA 1 - Masana bible

2 LABAR-MA-LIYNA 1

¹Mulda vi Salomon goora vi David muɗi dono'o; Ma-Vatɗina Lawna valamu ay hiɗi namu, nam wulum kulo ŋolo.

²Salomon di tam sum sa Israyel kaf, tam sa ŋulona vi vok ma birimna, tam sa ŋulona vi vok ma kisna, tam sa ka kitata, tam sa ŋulona vi Israyel kaf, tam sa ŋulona vi jafna.

³Salomon kali hiɗi tokŋa kaf kulo kay liyn ma ɗiŋiriŋŋa ma ka hay Gabawon, kay guɗuk ma fi-tuwna vi Lawna, ma Musus sa ma sunda vi Ma-Vatɗina kotom hay fulda ka kayni hay liy namna;

⁴may David tuɗ sli timgilla vi Lawna ay hay Kiryat-Yeyarim pa maram hay liyn ma nam kotomna, kay nam kot guɗukŋa kay timgilla hay Yerusalem.

⁵Ɗawni kaw, vok tabernaklena, giwin-ma-ɗifinna ma wayna ma Betsaleel goora vi Uriyas, goora vi Hur kotomna ka zaw. Salomon hiɗi tokŋa job tam Ma-Vatɗina.

⁶Salomon jik kulo kay giwin-ma-ɗifinna ma wayna hay liy namna, vok ir Ma-Vatɗina, ma ka hay guɗuk ma fi-tuwna, ɗawni nam li ɗifin hiɗi farayn birim ɗaw'.

⁷Hay henjet na'ta, Lawn vul tuwam kir Salomon, nam di talam ala: Jobaŋ va ma naŋ mina, kay nan min vulaŋga.

⁸Salomon hot dit tam Lawna: Naŋ li ŋaat ŋolo kat bunu David, nan tunanawa mulu hay baŋalamu.

⁹Wulin kayni, Ma-Vatɗina Lawna, yoboy ma naŋ dum kat bun Davidna hinim vunam hob goyo, kay naŋ hinan ti mulda kay jaf-sumun ŋolo ki ŋeslna ma goloŋ kel niyna nala.

¹⁰Wulin kayni naŋ vulan yalla hiɗi wida, kay nan ma wi yal ma tun vok sumun kayni, kay sumuna vaŋ nisi sa ŋol zututn kayni, sa ma as ŋomsin ɗawni mi gige?

¹¹Lawna di tam Salomon: Kay kayni mi va ma ka hay dikaŋu, kay naŋ may job farayɗi, job slen dak-dakɗi, job gajijitɗi, job mitta vi sa gaw kaŋŋaɗi, job buur ma dak-dakŋa gaa kay nagatɗi, may kay naŋ job yalla hiɗi wida kay ŋom sumuna vanu sa nan tunaŋ mul kisina,

¹²nan vulaŋ yalla hiɗi widawa. Lo nan min vulaŋ farayna, slen dak-dak, hiɗi gajijita kaw, mul mara'a ma jewaŋ naŋu may fi kaynɗi, mara'a bugolaŋ naŋu as fi kaynɗi kaw.

¹³Salomon jikay gaa kay ɗiŋiriŋŋa vi Gabawon, kat guɗuk ma fi-tuwna pa, nam hotay hay Yerusalem. Nam ti mulda kay sa Israyella.

¹⁴Salomon tok keke-ma-duura hiɗi kulumayna, nam ka hiɗi keke-ma-duura birimi hiɗi kis-fiɗi, sa jaŋ kulumayna birim doogo yam ma', nam tunsi hay hoyok-ziy ma sojen ka tuni hayna, tun segen hay Yerusalem talam nam mulla may.

¹⁵Mulla muɗ doorota hiɗi or ŋol dak-dak ki hiɗiyn nala hay Yerusalem, gu-gamna kaw nam muɗum ŋol dak-dak ki gu-sikomora ma ka hay liyn ma beɗna nala.

¹⁶Kulumayna vi Salomon nisi maram ay kayni hay Egipte pa, sum sa li filiwna vi mulla tuɗ yawamay kuɗ vokŋa valamu valamu, hiɗi gusta valam coli col.

¹⁷Keke-ma-duura nisi gusumay hay Egipte kayni, kep ir gurjuta sikel* kis-karkiya, kulum kep ti gurjuta sikel kis kalam dok-vasl may. Nisi ka mar hay ɓisiya kay muliyana vi sa Hititna hiɗi muliyana vi sa Siriyana kaw.

¹⁸Salomon vul hagata kay nisi ma in ziyda kep hay semda vi Ma-Vatɗina, lo in ziyda ta mulda kep malam namu may.